EPESOS
1
Sulat si Paul ni Saga Aꞌa ma Daꞌira
EPESOS
1 Sulat itu min aku, si Paul, aꞌa kawakilan eꞌ si Isa Al-Masi min kahandak Tuhan. Pinabeyaꞌ sulat itu ni kaꞌam palsukuꞌan Tuhan ya maglahat ma Epesos, ya ahogot kapagdakayuꞌbi maka si Isa Al-Masi.
2 Mura-murahan, bang paꞌin kam pinaniyaꞌan tatabangan maka kasannangan deyom atay eꞌ Mmaꞌtam Tuhan maka eꞌ si Isa Al-Masi Panghūꞌtam.
Kahāpan min Haddarat Tuhan
3 Pudjitam Tuhan, ya Mmaꞌ Panghūꞌ Isa Al-Masi. Nilidjikiꞌan kitam eꞌna ma sabab kasōdtam ma Al-Masi, angkan kitam pinaniyaꞌan kahāpan indaginis bay min haddarat Tuhan. 4 Sabab pineneꞌ kitam eꞌ Tuhan ma halam giꞌ bay pinapanjari dunya itu, boꞌ pasōd ma Al-Masi ati boꞌ asussi pangatayantam ma halam aniyaꞌ tamaktam ma pangꞌndaꞌ Tuhan. Lasana ya sababan 5 angkan iya bay agaraꞌ min awal lagiꞌ in kitam subay tahinangna anak, sabab min kahinangan si Isa Al-Masi. Min kōgna maka bayaꞌ angkan buwattēꞌ kagaraꞌanna. 6 Patut iya sinanglitan ma sabab aseꞌna maka lasana ya mbal tapulaꞌ-pulaꞌ, ya pangahilasna ma kitam labay min Anakna kinalasahan.
7 Nilꞌkkat kitam min hukuman ma sabab Al-Masi, labay min lahaꞌ sin kamatayna, hatina niampun dusatam eꞌ Tuhan. Mamarahi aheya aseꞌna maka lasana, 8-9 ya pagmurana ma kitam! Nihinang eꞌ Tuhan ma buwat maksudna, min pangitaꞌuna kamemon maka min panahuꞌanna. Pamataꞌuna na ni kitam bang ai kamaksuranna, ya bay halam kinataꞌuwan eꞌ manusiyaꞌ dahū, hatina Al-Masi ya kinahandakan eꞌ Tuhan anuman maksudna. 10 Ya itu maksud Tuhan, ya pinaniyaꞌ ma sinosōng bang maujud na kamemon: in ai-ai pinapanjari kamemon, ai na ka ma deyom sulgaꞌ, ai na ka ma dunya itu, subay pinapagdakayuꞌ ma deyoꞌan Al-Masi.
11 Tahinang kamemon ya minaksud maka kinahandak eꞌ Tuhan, ati kami ya pineneꞌ nihinang palsukuꞌanna, pagka sōd ma Al-Masi. Maksudna koꞌ itu, min awal tagnaꞌ lagiꞌ, 12 in kami itu, ya bay dumahū angaholatan Al-Masi, subay amuwan sababan pananglit Tuhan ma sabab kamahaldikaꞌna.
13 Buwattēꞌ du isab ma kaꞌam. Bay kam angandol ma Al-Masi, waktu kakalebi lapal bꞌnnal, ya lapal ahāp pasal kalappas kaꞌam min hukuman. Maka pamuwan eꞌ Tuhan Rū-na Sussi ma kaꞌam, buwat bay panganjanjiꞌna boꞌ aniyaꞌ tandaꞌ palsaksiꞌan in kaꞌam sukuꞌna na. 14 Rū Sussi itu pamatantu in kitam anambut ai-ai bay panganjanjiꞌ Tuhan ma saga aꞌana, ati minnēꞌ kitam makatantu in aꞌa palsukuꞌan Tuhan pinalimaya toꞌongan du ma sinosōng. Jari sinanglitan Tuhan ma sabab kamahaldikaꞌna.
Pangamuꞌ si Paul ni Tuhan
15-16 Ya itu sababanna angkan aku mbal pahali magsukul ni Tuhan ma pasalanbi sangay min waktu kakaleku habal pasal pangandolbi ma Panghūꞌ Isa maka ma pasal lasabi ma aꞌa palsukuꞌan Tuhan kamemon. Kinannal na paꞌin kam sakahabaꞌ waktu kapangamuꞌku duwaꞌa, 17 ati abut-abut aku angamuꞌ junjung ni Tuhan ya pagtuhanan Panghūꞌtam si Isa Al-Masi maka pagꞌmmaꞌantam mahaldikaꞌ. Ya pangamuꞌku bang paꞌin iya amahōp Rū-na ni kaꞌam boꞌ kam binuwanan panahuꞌan alalom maka panghati pasal kahandak Tuhan, ati boꞌ pasōng pangitaꞌubi ma iya. 18 Amuꞌku isab bang paꞌin pinasawa akkalbi boꞌ kasakupanbi toꞌongan bang ai pangaholatanbi angkan kam pineneꞌ eꞌ Tuhan. Kabayaꞌanku isab subay kasakupanbi bang ai pamusakaꞌ eꞌ Tuhan ma kaꞌam saga aꞌa palsukuꞌanna, hatina saga lidjikiꞌ mamarahi ahāp. 19 Bang paꞌin isab kataꞌuwanbi kawasana landuꞌ apaslod, kawasa mbal tapulaꞌ-pulaꞌ, ya makahāp kitam sasuku angandol ma iya. Dasaliꞌ kawasa Tuhan itu maka kosog barakatna 20 ya bay pamakallumna Al-Masi pabīng min kamatayna. Puwas eꞌ, pinatingkōꞌ iya ma bihing Tuhan tampal ni kowan, mahēꞌ ma sulgaꞌ. 21 Pinabangsa na iya, alanga toꞌongan min binangsa malaꞌikat maka min ai-ai kamemon taga-kawasa, min bangsa pananasat maka min pagnakuraꞌan indaginis ya ma diyataꞌ ayan. Alanga kagꞌllal Al-Masi min kagꞌllal kamemon, ma dunya itu sampay ma ahirat. 22 Pinatꞌnnaꞌ eꞌ Tuhan ai-ai kamemon ma deyoꞌ pād-tapeꞌ si Isa boꞌ pinagbayaꞌan eꞌna. Jari ginꞌllal iya pagmakōkan ma palhimpunan saga jamaꞌana kamemon. 23 ya dalil pagdayaw pamasugpat baranna, ya amuwan kajatuhan ma ai-ai kamemon.