Epesos i

EPESOS

Pahati pasal sulat itu

Epesos itu ōn daꞌira aheya ma bihing tahik, ma lahat niōnan Asiya Dikiꞌ. Daꞌira abantug koꞌ inān ma masa awal ma sabab karaya saga aꞌana maka ma sabab aheka ai-ai pinagdagangan mainaꞌan. Abantug isab ma sabab aniyaꞌ pagtuhanan sigām dꞌnda, ōnna si Artemes. Tꞌlluntahun ya tꞌggol si Paul ma Epesos magnasihat pasal si Isa Al-Masi, maka aniyaꞌ isab hinang makainu-inu bay tahinang eꞌna. Aheka aꞌa Epesos bay makakale ma lapal nasihatna sampay angandol ma si Isa. Puwas paꞌin tꞌlluntahun eꞌ, alaꞌan si Paul minnaꞌan boꞌ palanjal ni kalahatan saddī.

Sulat itu bay sinulat eꞌ si Paul ma samantalaꞌ iya ma deyom kalabusu ma lahat Rōm. Nggaꞌi ka hal aꞌa Epesos ya pinabeyaꞌan, sampay isab saga aꞌa maglahat ma baꞌanan kauman ya ma jadjahan inaꞌan. Ya pamanduꞌ si Paul ma deyom sulat itu in si Isa Al-Masi subay pagmakōkan ai-ai kamemon, ya lagiꞌna ma saga aꞌa angandol ma iya, aꞌa kabuwanan Rū Sussi tandaꞌ in sigām palsukuꞌan si Isa. Aniyaꞌ isab pamanduꞌ maitu pasal kaul maka piꞌil ya patut panunuran sigām, maka bang buwattingga eꞌ sigām angatu ma nakuraꞌ saitan.