6
Magtabang-tiyabangi Kam
1 Saga dauranakanku, bang aniyaꞌ seheꞌbi ilu taꞌabut angahinang dusa, kaꞌam ya pinagbayaꞌan eꞌ Rū Tuhan subay amanduꞌ ma iya boꞌ supaya angꞌbba min dusana heꞌ. Sagōꞌ subay ahanunus pamanduꞌbi ma iya. Subay kam pahatul-hatul isab ma baranbi boꞌ mbal tabowa-bowa maghinang dusa. 2 Magtabang-tiyabangi kam dangan maka dangan bang aniyaꞌ kabuhatan. Bang buwattēꞌ, bineyaꞌ eꞌbi panohoꞌan Al-Masi. 3 Bang aniyaꞌ aꞌa alanga atayna, pangannalna in iya ahāp min kaseheꞌ, aꞌa inān hal angakkalan di-na. 4 Subay kam ananding di-bi kaniya-kaniya, boꞌ tataꞌubi bang buwattingga kaul-piꞌilbi. Bang hati ahāp, makajari kam magkōg-koyagan di-bi. Daꞌa kam magbantug-bantug ma sabab aniyaꞌ hinangbi labi ahāp min hinang aꞌa dangan. 5 Subay kitam ananggung ai-ai bay panganggantaꞌ kitam dangan maka dangan.
6 Sasuku kam makapagguru pasal palman Tuhan subay anabang ma aꞌa pagguruhanbi. Pahampitinbi iya min ai-ai ahāp ya ma kaꞌam.
7 Daꞌa kam asāꞌ ma pamikilbi, mbal tarupang Tuhan. Buwat aꞌa magtanom, niani du eꞌna bang ai bay tanomna. Buwattēꞌ du isab ma hinangan manusiyaꞌ. 8 Bang aꞌa angandūlan napsuna karuhunan du laꞌatna ati tinungbasan iya kamatay saumul-umul. Bang aꞌa ameyaꞌ pinagbayaꞌan eꞌ Rū Tuhan, minnēꞌ iya tinungbasan kallum kakkal ma deyom sulgaꞌ. 9 Daꞌa kita sinumu maghinang ahāp. Sabab bang mbal bbahanta hinang ahāp, tantu kita katungbasan pahalaꞌ ma waktu sinosōng. 10 Angkanna isab, subay kita maghinang kahāpan ma aꞌa kamemon sakahabaꞌ waktu, ya lagiꞌna ma dauranakantam ya angandol ma si Isa.
Bissala Katapusan
11 Ndaꞌunbi katapusan sulat itu, sulatan tanganku ya aheya batang sulatna. 12 Aniyaꞌ ilu ma kaꞌam saga aꞌa hal maglaku-laku pangāꞌan sigām bantug. Saga aꞌa ilu angalogos kaꞌam subay niꞌislam. Tuꞌud sigām tināw nilaꞌat ma sabab pagsabꞌnnal sigām ma kamatay Al-Masi ma hāg.
13 Minsan saga aꞌa magislam ma buwat saraꞌ si Musa, mbal taꞌambat binogbogan eꞌ sigām panohoꞌan saraꞌ heꞌ. Pinogos kam eꞌ sigām subay magislam, boꞌ supaya sigām makapagbantug in kaꞌam tapogos eꞌ sigām. 14 Saguwāꞌ, halam aniyaꞌ pagbantuganku saddī min kamatay Panghūꞌtam si Isa Al-Masi. Apuwas na aku min dusaku ma sabab kamatayna ma hāg inān, ati halam na aniyaꞌ bayaꞌku ma napsu dunya itu. Halam isab aniyaꞌ lamudku ma legot dunya. 15 Mbal aheya ma atayku bang aꞌa pinagislam atawa halam. Ya sadja aheya ma atayku bang pinabahaꞌu kajarihanta eꞌ Tuhan. 16 Sasuku angahoꞌ ma pamituwaku itu, mura-murahan bang paꞌin sigām pinaniyaꞌan kasannangan maka kaꞌaseꞌ. Talapay isab saga aꞌa sukuꞌ Tuhan kamemon, ya pinagsambatan ‘Israꞌil sin Tuhan’.
17 Aubus na. Subay halam aniyaꞌ anasaw aku pabīng puwas itu, sabab aniyaꞌ limpaꞌ bakat ma baranku, bainat in aku sosohoꞌan si Isa.
18 Saga dauranakanku, mura-murahan bang paꞌin kam pinaniyaꞌan tatabangan eꞌ Panghūꞌtam si Isa Al-Masi. Amin. Wassalam