5
Kaluhayaꞌan ma Sabab Al-Masi
1 Kitam itu, aluhaya na min bay pagbanyagaꞌan tagnaꞌ, sabab pinuwasan kitam eꞌ Al-Masi. Angkanna kam subay mbal pasagad binanyagaꞌ pabalik. Subay kam patotog sadja ma kaluhayaꞌanbi.
2 Ikutunbi bissala itu sabab baranku ya ahꞌlling: bang kam gantaꞌ angahoꞌ pinagislam boꞌ supaya kam binista abontol eꞌ Tuhan, tahinangbi Al-Masi saliꞌ halam aniyaꞌ gunana ma kaꞌam. 3 Bandaꞌanta kam toꞌongan. Sasuku pinagislam ma buwat panohoꞌan-saraꞌ tasulat si Musa, subay angisbat panohoꞌan-saraꞌ inān kamemon. 4 Sasuku kam magupama in kaꞌam binista abontol eꞌ Tuhan ma sabab saraꞌ ya bogboganbi, saliꞌ kam angꞌbba min Al-Masi. Alawak na kam min aseꞌ maka lasa Tuhan. 5 Saguwāꞌ aholat kitam pinaniyaꞌan kabontolan atay labay min Rū Sussi, ya poꞌon kitam angandol. 6 Sabab bang kitam sōd na ma si Isa Al-Masi saliꞌ-saliꞌ du kitam kamemon ma pangꞌndaꞌ Tuhan, niꞌislam kitam maka halam. Ya sadja ahalgaꞌ ma Tuhan bang aniyaꞌ pangandoltam maka bang lasa ni pagkahi ya katꞌkkahanna.
7 Ahāp bay pameyaꞌbi ma panduꞌ bꞌnnal pasal si Isa, ibarat aꞌa maglomba. Saguwāꞌ sai bahāꞌ bay amidjakan kaꞌam boꞌ kam pahondong ameyaꞌ? 8 Nggaꞌi ka Tuhan, sabab iya ya bay ameneꞌ kaꞌam ameyaꞌ ma Al-Masi. 9 Buwat lling kamattoꞌahan, “Minsan dangkuriꞌ du pasulig abuskag katibuꞌukan addunan.” 10 Sagōꞌ makatantu aku labay min Panghūꞌ Isa in kitam dauyunan du. Tantu isab tinambahan kabinasahan ya aꞌa anasaw pikilanbi, pinapagtongod eꞌ Tuhan maka bay dusana, minsan sai-na.
11 Saga dauranakan, mbal aku bay pininjalaꞌ eꞌ saga Yahudi bang bay masi pamanduꞌku in addat pagislam subay binogbog. Sabab bang buwattēꞌ pamanduꞌku, halam aniyaꞌ sababan paglaꞌatan sigām atay ma pasal kamatay si Isa ma hāg. 12 Ya kabayaꞌanku ma saga aꞌa ya anasaw pikilanbi ilu, gom lagiꞌ sigām kapellengan laring tudju ni harapan sigām.
13 Manjari kaꞌam, saga dauranakan, bay tapeneꞌ eꞌ Tuhan boꞌ aluhaya min usulan saraꞌ. Sagōꞌ pahalliꞌ kam, daꞌa dūlinbi napsu baranbi ma saukat na kam aluhaya na. Ahāp lagiꞌ bang kam atukid magtabang-tiyabangi ma sabab lasabi dangan maka dangan. 14 Ya na itu kamaujuran panohoꞌan-saraꞌ, tumabeyaꞌ kamemonna ma panohoꞌan dakayuꞌ itu, ya yuk-i, “Kalasahinbi pagkahibi manusiyaꞌ buwat eꞌbi alasahan baranbi.” 15 Sagōꞌ bang kam magjingki-jingki maka magkosog-kosogan, buwat hantang eroꞌ maglꞌkkob, subay kam ahalliꞌ toꞌongan sabab tantu kam makani-kalaꞌatan.
Rū Tuhan atawa Napsu Manusiyaꞌ
16 Aniyaꞌ pamissalaku ma kaꞌam: beyaꞌunbi Rū Sussi magbayaꞌ ma baranbi ati tantu mbal karūlan napsubi. 17 Magbesod kabayaꞌan napsuta maka kabayaꞌan Rū Sussi. Mbal maguyun duwa ginis bayaꞌ itu, ya poꞌon kitam mbal makarapat angahinang ai-ai ya anguttam. 18 Sagōꞌ bang kitam pinagnakuraꞌan eꞌ Rū Sussi, puwas du kitam min pagbayaꞌan saraꞌ.
19 Atampal du saga kahinangan ya luwas min kajarihanta tagnaꞌ: hinang kalumuꞌan dꞌnda maka lꞌlla, hinang kasabulan, pagbaꞌis, 20 paghulmat ma saga taꞌu-taꞌu, paghinang pantak, pagbanta maka pagbonoꞌ, paglindi-lindi, pangastol, paglanga-langa min pagkahi, pagsuꞌal, pakaniya-kaniya tumpukan, 21 pangandaliꞌit ma pagkahi, paglami-lami makalanduꞌ, maka paglango. Aniyaꞌ giꞌ hinang sigām buwattēꞌ. Balikanku bay pamituwaku ma kaꞌam waktu dahū, sai-sai maghinang saga hinang alaꞌat itu mbal toꞌongan pinasōd ni deyom pagparintahan Tuhan.
22 Saguwāꞌ buwattitu ya kahinangan aꞌa pinagbayaꞌan eꞌ Rū Tuhan: patilasahun iya, taptap kalasiganna, asannang pamikilna, patiluꞌuyun iya ma pagkahina, patitabangun maka ahatul bowahanna. Kapangandolan iya, 23 areyoꞌ pagatayna, ataꞌu isab angahawid napsuna. Halam aniyaꞌ saraꞌ makapaginꞌmbal ma hinang buwattēꞌ. 24 Manjari sai-sai magpasukuꞌ ma si Isa Al-Masi pinahalam eꞌ sigām kajarihan sigām tagnaꞌ. Sapantun sigām bay paunung ma Al-Masi amatay ma hāg. Hatina napsu maka bayaꞌ sigām kamemon pinahalam sabab mbal na karūlan. 25 Kabuwanan kita kallum bahaꞌu min Rū Tuhan, angkan kita subay ameyaꞌ pinagbayaꞌan eꞌna. 26 Daꞌa kita magabbu-abbu, atawa anukas ma pagkahitam, atawa angalindi.