4
1 Palanjalku giꞌ pamanduꞌku. Bang saupama aniyaꞌ ondeꞌ-ondeꞌ amatay mmaꞌna, pamusakaꞌ ma iya pangaltaꞌ mmaꞌna heꞌ. Sagōꞌ satꞌggol halam giꞌ asangpot umulna mbal iya pinahampitan pamusakaꞌ. Sapantun iya ata lagiꞌ. 2 Pinagbayaꞌan iya sampay pangaltaꞌna eꞌ saga aꞌa angulip iya. Subay taꞌabut waktu bay panugilaꞌ eꞌ mmaꞌna boꞌ yampa aniyaꞌ kapatutna magbayaꞌ ma altaꞌ inān. 3 Buwattēꞌ isab kahālanta ma waktu tagnaꞌ, hinabu kita ondeꞌ-ondeꞌ lagiꞌ, pinagbayaꞌan kita eꞌ kagaꞌosan ya mbal taꞌndaꞌ mata. 4-5 Saguwāꞌ taꞌabut paꞌin waktu bay panugilaꞌ eꞌ Tuhan, sinohoꞌ eꞌna Anakna piꞌitu ni dunya. Nianakan iya eꞌ manusiyaꞌ supaya kitam makataimaꞌ kapatutan ya pamusakaꞌ panganak. Bangsa Yahudi iya, nianakan ma deyoꞌan saraꞌ agama, supaya tapaluwas eꞌna sasuku binanyagaꞌ eꞌ saraꞌ.
6 Pagga kam panganak Tuhan na, pinahōpan kam Rū si Isa ya anak Tuhan. Angkan kitam makajari na angōn Mmaꞌ ma Tuhan, ma sabab Rū-na ya patꞌnnaꞌ ma deyom pangatayantam. 7 Angkan kam mbal na kaōnan banyagaꞌ, sagōꞌ panganak Tuhan na. Ati ma kaꞌam pusakaꞌ kamemon ya pamuwan eꞌ Tuhan ma saga anakna, pagka anak Tuhan na kam.
Kasusa si Paul Pasal Aꞌa Galatiya
8 Ma waktu tagnaꞌ, ma halam giꞌ kam ataꞌu ma Tuhan, sapantun kam banyagaꞌ pinagbayaꞌan eꞌ kagaꞌosan ya mbal taꞌndaꞌ. 9 Sagōꞌ magkataꞌu na kam maka Tuhan, kinilā kam eꞌna, jari angay kam pabalik pinagbayaꞌan eꞌ kagaꞌosan ya halam aniyaꞌ kawasa atawa pūsna? Kabayaꞌanbi bahāꞌ binanyagaꞌ pabīng? 10 Sabab ilu kam angisbat llaw mulliya maka bulan, musim maka tahun! 11 Asusa aku ma pasalbi, kalu kaliman bay sangsāꞌku ma deyomanbi.
12 Saga dauranakanku, aniyaꞌ panganjunjungku ni kaꞌam. Sengorinbi aku, sabab ya du aku bay anengoran kaꞌam. Halam aniyaꞌ laꞌat tahinangbi ma aku. 13 Kataꞌuwanbi asal bay kahālanku waktu kahantiꞌku ma kaꞌam tagnaꞌ. Bay aku tꞌkkahan saki, angkan aku bay pahantiꞌ ma kaꞌam anganasihatan kaꞌam lapal ahāp. 14 Halam aku bay palehombi, halam aku bay sulakbi, minsan kam kabuhatan ma sabab sakiku. Gom paꞌin saginabi aku buwat eꞌbi anagina malaꞌikat min Tuhan. Bay aku taimaꞌbi buwat eꞌbi anaimaꞌ si Isa Al-Masi bang gantaꞌ patibaw ni kaꞌam. 15 Ai bay tumaluwaꞌ ni kakōganbi tagnaꞌ? Saksiꞌanta kam, bang sadja makajari, bay kam lillaꞌ angalugit matabi panganggantiꞌ mataku. 16 Bantahanbi na aku bahāꞌ, pagka aku amissala kasabꞌnnalan ma kaꞌam?
17 Aheya pangannal saga aꞌa inān ma kaꞌam, sagōꞌ aniyaꞌ maksud sigām mbal ahāp. Ya kabayaꞌan sigām subay kam niokat min aku boꞌ amanuyuꞌ ma sigām sadja. 18 Ahāp isab bang kam magpanuyuꞌ bang paꞌin ahāp maksudna. Ahāp bang aku mailu ma kaꞌam, sagōꞌ labi-labi ahāp bang aku alikut. 19 Kaꞌam saga anak-mpuku, kahunitan pikilanku pabīng ma pasalbi, buwat ibarat dꞌnda kahunitan bang anganak. Asigpit pikilanku ma pasalbi satꞌggol halam giꞌ ajatu kajarihan Al-Masi ma deyom pangatayanbi. 20 Aheya kabayaꞌanku bang paꞌin aku makamailu ma kaꞌam buwattinaꞌan, boꞌ ahanunut pamissalaku ma kaꞌam. Sabab alengog pikilanku ma pasalanbi.
Pamaralilan pasal si Hagar maka si Sara
21 Aniyaꞌ tilawku ma kaꞌam: sasuku kam bilahi amogbog panohoꞌan-saraꞌ, kataꞌuwanbi bahāꞌ ya tasulat ma deyom Tawrat? 22 Tasulat pasal si Ibrahim, aniyaꞌ anakna lꞌlla duwa hekana. Dangan inān min atana si Hagar, dangan min si Sara, ya hꞌndana poꞌon. 23 Ya anakna min ata inān bay nianak buwat panganak kaseheꞌ ma dunya itu. Sagōꞌ biddaꞌ anakna min hꞌndana poꞌon, ya dꞌnda alimaya heꞌ, sabab anak panumanan bay panganjanjiꞌ Tuhan ma iya.
24 Na buwattitu hatulanna: in duwangan dꞌnda itu saliꞌ dalil duwa pagsulutan Tuhan maka manusiyaꞌ. Jari in pagsulutan dakayuꞌ bay min būd Turusina. Bang niralil, ya na si Hagar ya anganakan ata. 25 Si Hagar itu saliꞌ dalil būd Turusina mahēꞌ ma lahat Arab. Taparalil isab iya ni daꞌira Awrusalam ma patahunan ītu, sabab tabanyagaꞌ isab saga aꞌana. 26 Sagōꞌ in daꞌira Awrusalam porol, ya ma deyom sulgaꞌ, limaya asal. In iya pag-inaꞌan ma sasuku kitam angandol ma si Isa. 27 Aniyaꞌ ayat Kitab pasal Awrusalam, yuk-i,
“Magkōg-koyag ka, arung,
minsan ka halam bay makalabay paganak!
Angolang ka patanog ma sabab kakōgannu,
minsan ka halam bay makananam pꞌddiꞌ panganak!
Sabab aheka lagiꞌ anak ma hꞌnda kaꞌbbahan
min anak hꞌnda taga-pagholaꞌ.”
28 Na, saga dauranakan, kaꞌam ilu saliꞌ dalil anak panumanan janjiꞌ Tuhan, buwat si Isaꞌak. 29 Bistahunbi bay masa si Ibrahim eꞌ. Ya anakna min si Hagar bay nianakan ma buwat paganak kaseheꞌ. Aheya paꞌin iya, bay iya angalaꞌat danakanna, ya nianakan labay min barakat Rū Tuhan. Damikiyanna isab kitam ma buwattinaꞌan, aniyaꞌ na paꞌin pangalaꞌat kitam. 30 Kira-kirahunbi ya bay tasulat ma deyom Kitab, yuk-i, “Palaꞌanunbi dꞌnda ata maka anakna, sabab mbal manjari binahagiꞌan pusakaꞌ ya pangꞌbba anak min hꞌnda poꞌon, ya alimaya.” 31 Manjari itu, saga dauranakanku, nggaꞌi ka kitam panganak dꞌnda ata. Panganak kitam dꞌnda alimaya, ya nggaꞌi ka ata.