3
Pamogbog Saraꞌ Atawa Pangandol ma si Isa
1 Kaꞌam saga aꞌa Galatiya, asāꞌ pahāp akkalbi! Sai bay angakkalan kaꞌam? Bay kam kamattanan ma pasal kamatay si Isa Al-Masi ma hāg boꞌ niampun dusabi. 2 Aniyaꞌ panilawku ma kaꞌam: bay kam anaimaꞌ Rū Tuhan ma sabab pamogbog ma saraꞌ agama? Atawa ma sabab pangandolbi ma lapal ya takalebi? 3 Dupang pahāp kam! Tagnaꞌ kam angandol, Rū Tuhan ya pasangdolanbi. Sagōꞌ buwattinaꞌan hulas-sangsāꞌbi ya pasangdolan. 4 Pangannalbi bahāꞌ halam aniyaꞌ kagunahan ma bay kalabayanbi sangay min tagnaꞌ kapangandolbi ma si Isa? Tantu aheya kagunahanna. 5 Tuhan ya bay amuwanan kaꞌam Rū-na Sussi, maka bay amahinang saga hinang barakatan ma deyomanbi. Angay bahāꞌ? Ma sabab pamogbogbi ma saraꞌ atawa ma sabab pangikutbi maka pagkahagadbi ma lapal ahāp?
6 Pikilunbi si Ibrahim ma masa awal eꞌ: “Bay amꞌnnal si Ibrahim ma pangallam Tuhan, ati tabista iya abontol eꞌ Tuhan ma sabab pamꞌnnalna.” 7 Pahati kam, sasuku angandol ma Tuhan kaōnan panubuꞌ si Ibrahim. 8 Pinagkallam ma deyom Kitab pasal aꞌa nggaꞌi ka Yahudi, in sigām isab binista abontol eꞌ Tuhan ma sabab pangandol sigām. Bay pataꞌuna isab si Ibrahim pasal lapal ahāp ma halam giꞌ taꞌabut waktuna. Yuk Tuhan ma si Ibrahim, “Binuwanan kahāpan ma sababnu saga manusiyaꞌ kamemon ma kaluhaꞌan dunya.” 9 Pinagsabꞌnnal eꞌ si Ibrahim janjiꞌ Tuhan inān, ati kabuwanan iya kahāpan. Ya du sasuku magsabꞌnnal ma Tuhan, kabuwanan kahāpan isab buwat si Ibrahim, ya aꞌa pangangandol.
10 Saguwāꞌ sasuku amogbog saraꞌ agama boꞌ supaya binista abontol eꞌ Tuhan, taluwaꞌ sigām mulkaꞌ Tuhan. Sabab tasulat asal ma deyom Kitab, yuk-i, “Taluwaꞌ mulkaꞌ sasuku mbal makaꞌambat angahinang saga panohoꞌan kamemon ya tasulat ma Kitab Tawrat.” 11 Na, pastiꞌ toꞌongan koꞌ itu. Halam aniyaꞌ binista abontol eꞌ Tuhan ma sabab panohoꞌan-saraꞌ ya bogboganna, sabab aniyaꞌ tasulat ma deyom Kitab, yuk-i, “Taga-kallum kakkal sasuku binista abontol eꞌ Tuhan ma sabab pangandolna.” 12 Wajib bogboganta saraꞌ minsan mbal pangandolanta, buwat tasulat ma deyom Kitab, ya yuk-i, “Sasuku bilahi allum subay amogbog saraꞌ maka panohoꞌanna kamemon, ma halam aniyaꞌ nilakaran minsan dakayuꞌ.” 13 Sagōꞌ mbal taꞌambat binogbog panohoꞌan saraꞌ kamemon, jari mulkaꞌ Tuhan ya kadalta. Malaingkan talꞌkkat kitam eꞌ Al-Masi min mulkaꞌ, sabab iya ya bay makananam mulkaꞌ gantiꞌtam. Buwat tasulat ma deyom Kitab, ya yuk-i, “Bang aꞌa pinasagnat ma hāg pinapatay, aꞌa inān taluwaꞌ mulkaꞌ Tuhan.” 14 Talꞌkkat kitam eꞌ si Isa supaya saga kahāpan ya bay pamuwan ma si Ibrahim pasampay isab ni saga aꞌa nggaꞌi ka Yahudi, labay min si Isa Al-Masi. Jari makataimaꞌ kitam Rū ya panganjanjiꞌ eꞌ Tuhan ma sabab pangandoltam ma Al-Masi.
Saraꞌ maka Janjiꞌ Tuhan
15 Saga danakanku, buwananta kam paralilan. Bang aniyaꞌ duwangan magsulut boꞌ bay na makapagsapa, tantu mbal kapindahan kapagsulutan sigā. 16 Buwattēꞌ isab bowahan janjiꞌ Tuhan. Bay iya anganjanjiꞌ ma si Ibrahim maka ma panubuꞌna, boꞌ nggaꞌi ka panubuꞌ si Ibrahim kamemon ya kapanganjanjiꞌan. Ya niōnan panubuꞌna itu dakayuꞌ du, hatina Al-Masi. 17 Buwattitu isab: aniyaꞌ kapagsulutan Tuhan bay patꞌnnaꞌna ma waktu kapanganjanjiꞌna ma si Ibrahim. Jari palabay paꞌin mpat hatus maka tꞌllumpūꞌ tahun, aniyaꞌ saraꞌ bay patꞌnnaꞌna. Malaingkan in kapagsulutan tagnaꞌ inān mbal kapindahan ma saukat na aniyaꞌ saraꞌ, maka janjiꞌ Tuhan inān mbal kapindahan. 18 Bang saupama si Ibrahim bay pinahampitan pusakaꞌ ma sabab kalꞌngnganan saraꞌ, saliꞌ halam aniyaꞌ kagunahan ma bay janjiꞌ Tuhan. Sagōꞌ ya bꞌnnalna, kabuwanan iya pusakaꞌ ma sabab kasi-lasa Tuhan ma iya, luwas min janjiꞌna.
19 Na, bang buwattēꞌ kahālanna, ai kagunahan saraꞌ? Aniyaꞌ saraꞌ bay pinasugpat eꞌ Tuhan ni janjiꞌna supaya tasayu eꞌ manusiyaꞌ saga dusa sigām. Buwattēꞌ na paꞌin sampay ni waktu palahil piꞌitu dakayuꞌ tubuꞌ si Ibrahim ya panganjanjiꞌan eꞌ. Bay pinatꞌnnaꞌ saraꞌ inān labay min saga malaꞌikat, maka si Musa ya magpatiꞌllot amasampay saraꞌ ni manusiyaꞌ. 20 Sagōꞌ halam aniyaꞌ magpatiꞌllot kinagunahan ma waktu kapanganjanjiꞌ Tuhan ma si Ibrahim. Luwal Tuhan dakayuꞌ-kayuꞌ.
Maksud Saraꞌ Agama
21 Kalu tapikilbi aniyaꞌ palsaggaꞌan ma saraꞌ tasulat si Musa maka janjiꞌ Tuhan inān, sagōꞌ halam, dakagaraꞌan du. Bang bay aniyaꞌ saraꞌ taga-kawasa amuwan kallum kakkal ma manusiyaꞌ, makajari kitam niōnan abontol eꞌ Tuhan ma sabab pamogbogta ma saraꞌ. Saguwāꞌ halam aniyaꞌ saraꞌ buwattēꞌ, 22 maka dusahan kitam manusiyaꞌ kamemon, saliꞌ pinagagihan eꞌ dusa, buwat tasulat ma deyom Kitab. Malaingkan kabuwanan kitam kahāpan ya bay panganjanjiꞌ Tuhan ma sasuku angandol ma si Isa Al-Masi.
23 Satꞌggol halam pinalahil bowahan pangandol itu, in kitam manusiyaꞌ ibarat pilisu katambolan eꞌ saraꞌ. Subay pinabukis pasal pangandol ma si Isa boꞌ yampa kitam pinaluwas. 24 Biniꞌat kitam eꞌ saraꞌ si Musa satꞌggol halam giꞌ piꞌitu Al-Masi, supaya kitam binista abontol eꞌ Tuhan bang iya palahil na ni dunya. 25 Jari taꞌabut na masa kapangandoltam ma si Isa, ati mbal na kitam pinagagihan eꞌ saraꞌ.
26 Kaꞌam ilu, anak Tuhan du kam kamemon ma sabab pangandolbi ma si Isa Al-Masi ya parakayuꞌanbi. 27 Bay na kam pinandi tandaꞌ saksiꞌ in kaꞌam sōd na ma Al-Masi, ati kajarihan Al-Masi ya kajarihanbi na. 28 Manjari halam aniyaꞌ pagbiddaꞌan Yahudi maka nggaꞌi ka Yahudi. Halam aniyaꞌ pagbiddaꞌan ata maka nggaꞌi ka ata. Halam aniyaꞌ pagbiddaꞌan lꞌlla maka dꞌnda, sabab magdakayuꞌ na kam kamemon pagka sōd na kam ma si Isa Al-Masi. 29 Pagga kam sukuꞌ ma Al-Masi, binista kam saliꞌ panubuꞌ si Ibrahim, ati kaniyaꞌan kam kahāpan bay panganjanjiꞌ Tuhan ma si Ibrahim eꞌ.