2
Tinaimaꞌ si Paul eꞌ saga Aꞌa Kawakilan
1 Palabay paꞌin sangpūꞌ maka mpat tahun minnēꞌ, bay aku pabalik ni Awrusalam. Si Barnabas ya seheꞌku, maka bay bowaku isab si Titus. 2 Angkan aku pehēꞌ sabab aniyaꞌ pamabukis ni aku eꞌ Tuhan subay beyaꞌku. Bay hakaꞌanku saga aꞌa ma palhimpunan inān pasal lapal ya pagnasihatku ma aꞌa nggaꞌi ka Yahudi. Nggaꞌi ka kamemon ya binissalahan, hal saga aꞌa ya pangannalku pagnakuraꞌan sabab nihanggaw aku. Kalu mbal tinaimaꞌ hinangku, ati halam aniyaꞌ pūs ma hulas-sangsāꞌku. Sagōꞌ kasulutan sigām, 3 ati halam bay amogos si Titus subay niꞌislam minsan iya bangsa Girīk. 4 Aniyaꞌ palkalaꞌ asal pasal si Titus itu, sabab aniyaꞌ aꞌa bay palamud ma kami magbauꞌ-bauꞌ in sigām bebeyaꞌan Al-Masi. Sagōꞌ ya maksud sigām subay anipihan kaluhayaꞌan ya pinaniyaꞌan kami eꞌ si Isa Al-Masi pagka apuwas na min hatulan saraꞌ. Tuꞌud sigām bilahi amanyagaꞌ kami pabīng. 5 Malaingkan halam kami bay angahoꞌ ma sigām minsan dansasaꞌat sabab ya pagmatayan kami subay pataptap ma kaꞌam in kasabꞌnnalan pasal si Isa.
6 Halam aniyaꞌ bay pinasugpat ni pamanduꞌku eꞌ saga pagnakuraꞌan inān, ya pangannalku taga-kapatut. Mbal aheya ma atayku bang aꞌa taga-kapatut atawa halam, sabab saliꞌ-saliꞌ du aꞌa kamemon ma pangꞌndaꞌ Tuhan. 7 Halam aniyaꞌ pagsoway-soway sigām. Gom paꞌin aku niakuhan eꞌ sigām in aku bꞌnnal bay pangandolan eꞌ Tuhan magnasihat lapal ahāp pasal si Isa Al-Masi ma saga bangsa nggaꞌi ka Yahudi. Buwat isab si Petros, bay pangandolan eꞌ Tuhan magnasihat ma bangsa Yahudi. 8 Sabab min kawasa Tuhan ya angkan aku makapagnasihat ma bangsa kaseheꞌ. Damikiyanna isab si Petros, min kawasa Tuhan isab angkan iya makapagnasihat ma bangsa Yahudi. 9 Jari takilā aku eꞌ disi Yakub, si Petros maka si Yahiya, ya taga-ōn ma palhimpunan sigām, in aku taga-barakat min Tuhan. Ati magsalam sigām maka aku maka si Barnabas, tandaꞌ in kami dambeyaꞌan maka sigām. Magtūy arakayuꞌ garaꞌ kami in kami subay magnasihat pehēꞌ ni bangsa kaseheꞌ, ati sigām ya magnasihat na paꞌin ma deyoman bangsa Yahudi. 10 Ya sadja niamuꞌ eꞌ sigām bang paꞌin kami angannal ma saga bebeyaꞌan si Isa ya kulang-kabus ma deyoman sigām eꞌ. Buwattēꞌ isab katuyuꞌanku.
Sinulang si Petros eꞌ si Paul
11 Na ma waktu dakayuꞌ, mainaꞌan paꞌin kami ma daꞌira Antiyuk, bay pahantiꞌ isab si Petros mainaꞌan. Jari bay tampalku iya sabab aniyaꞌ hinangna inān mbal magtaluwaꞌ. 12 Tagnaꞌ, bay iya makapagsalu maka saga jamaꞌa Al-Masi ya nggaꞌi ka Yahudi. Saguwāꞌ pagtꞌkka paꞌin saga Yahudi bay pinapehēꞌ eꞌ si Yakub, paokat iya min bay paumpiganna inān, pagka tināw iya pinabukagan eꞌ saga aꞌa tꞌkka bahaꞌu. Yahudi asal sigām, ya amogbog na paꞌin ma addat pagislam. 13 Ya du tināw saga Yahudi kaseheꞌ, angkan sigām anunuran si Petros ati mbal na magsalu maka saga aꞌa nggaꞌi ka Yahudi. Minsan si Barnabas, abowa-bowa isab maghinang buwattēꞌ. 14 Pagꞌndaꞌku hinang sigām mbal magtaluwaꞌ maka panduꞌ bꞌnnal ya katōpan lapal ahāp, magtūy pahꞌllinganku si Petros ma matahan sigām kamemon. “Kaꞌa ilu,” yukku, “Yahudi ka, sagōꞌ ameyaꞌ na ma addat bangsa saddī itu. Angay logosnu saga bangsa nggaꞌi ka Yahudi subay amogbog addat Yahudi?
15 “Ya bꞌnnalna, bangsa Yahudi kitam sabab tubuꞌ min bangsa Yahudi, saddī min aꞌa kaseheꞌ, ya pinagbahasa ‘bangsa baldusa’. 16 Saguwāꞌ kataꞌuwan kami halam aniyaꞌ aꞌa niōnan abontol ma saukat na saraꞌ agama ya bogbogna. Ya sadja binista abontol eꞌ Tuhan bang aꞌa angandol ma si Isa Al-Masi. Kami bangsa Yahudi, angandol ma si Isa Al-Masi, ati binista kami abontol eꞌ Tuhan. Nggaꞌi ka ma sabab saraꞌ agama ya niꞌisbat, sabab halam aniyaꞌ binista abontol eꞌ Tuhan minsan painay pamogbogna ma saraꞌ.
17 “Na, bang manyatakan in kami masi dusahan, hinabu kami pasōd ma Al-Masi boꞌ binista abontol, ai bahāꞌ pahꞌllingta? Al-Masi bahāꞌ ya sababan angkan kami magdusa? Tantu mbal! 18 Bang aku saupama pabalik amogbogan saraꞌ bay taikutanku, mattan in aku dusahan, 19 sabab sapantun aku aꞌa amatay bang takdil ni saraꞌ si Musa, supaya aku allum bang takdil ni Tuhan. 20 Bang pinaꞌamu, angꞌbba na aku min bay kahālanku tagnaꞌ, buwat ibarat aꞌa bay paunung ma Al-Masi pinapatay ma hāg. In kallumku buwattinaꞌan nggaꞌi ka min baran-baranku, saguwāꞌ min Al-Masi, ya patꞌnnaꞌ ma deyom pangatayanku. Tꞌggolku allum ma dunya itu, angandol aku ma Anak Tuhan. Alasa iya ma aku sabab maglillaꞌ iya amatay ma sababku. 21 Mbal taikutanku lasa Tuhan maka aseꞌna. Bang bay kita makajari binista abontol ma sabab pamogbog saraꞌ agama, kaliman kamatay Al-Masi ma sababtam!”