GALATIYA
1
Sulat si Paul ni Saga Aꞌa ma Lahat
GALATIYA
1 Sulat itu min aku, si Paul, pinasampay ni kaꞌam maglahat ma Galatiya. Kawakilan aku magnasihat sagōꞌ nggaꞌi ka pangwakil min manusiyaꞌ. Nggaꞌi ka isāb manusiyaꞌ bay anganggꞌllal aku. Tuꞌud aku kawakilan eꞌ si Isa Al-Masi, sampay eꞌ Mmaꞌtam Tuhan ya bay amakallum ma si Isa min kamatayna. 2 Kami maka dauranakantam maitu, maguyun amabeyaꞌ minsan laꞌa hal lapal kami ni kaꞌam saga jamaꞌa si Isa Al-Masi ma baꞌanan palhimpunan ma lahat Galatiya.
3 Mura-murahan, bang paꞌin kam pinaniyaꞌan tatabangan maka kasannangan deyom atay eꞌ Mmaꞌtam Tuhan sampay eꞌ si Isa Al-Masi Panghūꞌtam. 4 Bay maglillaꞌ amatay si Isa pamapuwas dusatam supaya kitam limaya min kalaꞌatan ya taptap nihinang ma ahil jaman itu. Ya na kabayaꞌan Mmaꞌtam Tuhan subay hinangna. 5 Patut iya pinudji saumul-umul. Amin.
Dakayuꞌ du Lapal Ahāp
6 Landuꞌ aku ainu-inu ma kaꞌam. Asaꞌut pahāp kam pataikut min Tuhan ya bay ameneꞌ kaꞌam ma sabab aseꞌ maka lasa Al-Masi! Apinda kam magtūy ni lapal saddī! 7 Saguwāꞌ halam aniyaꞌ kaōnan lapal ahāp bang saddī min lapal pasal si Isa. Atampal asal, aniyaꞌ aꞌa bilahi anasaw pikilanbi maka amindahan lapal pasal Al-Masi. 8 Minsan kami, minsan isāb malaꞌikat min deyom sulgaꞌ, bang aniyaꞌ amanduꞌ lapal saddī min bay panganasihat kami ma kaꞌam, aꞌa inān subay taluwaꞌ mulkaꞌ saumul-umul. 9 Balikanku bay pamissala kami dahū: bang aniyaꞌ amanduꞌ lapal saddī min lapal ahāp ya bay taimaꞌbi, aꞌa inān subay minulkaꞌan.
10 Kira-kirahunbi bang ai mohotku: sanglit min manusiyaꞌ atawa sanglit min Tuhan? Kabayaꞌanku bahāꞌ anulut manusiyaꞌ? Bang aku bay bilahi anulut manusiyaꞌ, mbal aku niōnan sosohoꞌan Al-Masi.
Si Paul Kawakilan eꞌ Tuhan
11 Saga danakanku, aniyaꞌ pamahatiku kaꞌam. Ya lapal pagnasihatku itu nggaꞌi ka min pikilan manusiyaꞌ ya paluwasanna. 12 Halam bay tasambutku min manusiyaꞌ, maka nggaꞌi ka manusiyaꞌ bay pagguruhanku. Tasambutku asal min si Isa Al-Masi, bay pamabukis ni aku.
13 Kataꞌuwanbi pasal kajarihanku tagnaꞌ, waktu kapamogbogku ma agama Yahudi, bay apaslod paminjalaꞌku ma saga jamaꞌa si Isa, ya pinagsambatan palhimpunan Tuhan. Kabayaꞌanku subay halam aniyaꞌ min sigām takapin allum. 14 Biddaꞌ du aku min saga topad-sibuꞌku Yahudi bang takdil ni pangisbat ma agama kami. Atuyuꞌ lagiꞌ aku min sigām amogbog ma usulan bay min kamattoꞌahan kami.
15 Sagōꞌ tapeneꞌ aku eꞌ Tuhan ma sabab aseꞌna maka lasana tudju ni aku. Pineneꞌ asal aku ma halam giꞌ bay nianakan. 16 Ya kahandak Tuhan ma aku subay kasakupanku pasal Anakna, boꞌ supaya aku makapagnasihat lapal ahāp ma pasalanna ni kabangsahan nggaꞌi ka Yahudi. Jari halam bay pangaruhanku sai-sai. 17 Halam aku minsan patukad ni Awrusalam anibaw sigām ya bay kawakilan eꞌ si Isa dahū min aku. Bay aku patūy kaleya ni lahat Arab, ati pagubus, pabīng aku ni daꞌira Damaskus.
18 Palabay paꞌin tꞌlluntahun, patukad aku ni Awrusalam boꞌ magkataꞌu maka si Petros, ati pahantiꞌ aku ma iya duwa pituꞌ tꞌggolna. 19 Saddī min si Petros, halam aniyaꞌ taꞌndaꞌku mainaꞌan aꞌa kawakilan eꞌ si Isa, luwal si Yakub ya siyali Panghūꞌtam. 20 Saksiꞌku Tuhan, bꞌnnal sadja ya panulatku itu. Nggaꞌi ka puting. 21 Puwas inaꞌan, bay aku pehēꞌ ni saga kalumaꞌan ma lahat Siriya sampay ma lahat Silisi. 22 Ma waktu inaꞌan, mbal aku takilā eꞌ saga jamaꞌa Al-Masi ya ma baꞌanan palhimpunan Al-Masi ma lahat Yahudiya. 23 Ya sadja takale sigām habal pasal kapindaku min bay kajarihanku tagnaꞌ. Yuk habal eꞌ, “Pinasaplag lapal ahāp eꞌ aꞌa bay angalaꞌat kajamaꞌahan si Isa, nirapitan eꞌna bowahan pangandol ya bay saggaꞌna tagnaꞌ.” 24 Jari pinudji Tuhan eꞌ saga aꞌa ya makakale habal pasalan aku.