PILIPI
1
Sulat si Paul ni Saga Aꞌa ma Daꞌira
PILIPI
1 Sulat itu min si Paul maka si Timuti, duwangan sosohoꞌan si Isa Al-Masi. Pabeyaꞌ kami piꞌilu ni kaꞌam saga aꞌa sōd si Isa Al-Masi kamemon ya maglahat mailu ma Pilipi, beyaꞌ isab pagmattoꞌahanbi maka saga aꞌabi magpanabang.
2 Mura-murahan, bang paꞌin kam pinaniyaꞌan tatabangan maka kasannangan atay eꞌ Mmaꞌtam Tuhan sampay eꞌ Panghūꞌ Isa Al-Masi.
Pangamuꞌ-ngamuꞌ maka Pagsukul si Paul
3 Aheya pagsukulanku ni Tuhan sakahabaꞌ waktu bang kam taentomku. 4 Sakahabaꞌ waktu kapanambahayangku, akōd aku angamuꞌan kaꞌam kahāpan kamemon, 5 sabab taentomku bay tabangbi ma aku magnasihat lapal ahāp, sangay min waktu tagnaꞌ sampay ni kabuwattituhan. 6 Makatantu aku pasal hinang ahāp ya tinagnaꞌan eꞌ Tuhan ma deyom pangatayanbi, sabab tantu tukiranna sampay taꞌabut llaw kapiꞌitu pabalik si Isa Al-Masi.
7 Patut aku magkaꞌinagonan kaꞌam kamemon, sabab itiyaꞌ kam taptap ma pangatayanku. Bay kam palamud kamemon ma hinang ya pamasukuꞌ aku eꞌ Tuhan. Bay aku gapiꞌbi, minsan ma kapagsambungku himumungan maka saga aꞌa ya anulang pagnasihatku, minsan maitu ma deyom kalabusu. 8 Saksiꞌku Tuhan, bꞌnnal sadja pahꞌllingku ya yukku aheya pangentomku ma kaꞌam. Alasa aku ma kaꞌam buwat lasa Al-Masi ma aku.
9 Angamuꞌ-ngamuꞌ na paꞌin aku ni Tuhan ma pasalbi, bang paꞌin magkakꞌnnop na paꞌin paglasabi dangan maka dangan, sampay pangitaꞌubi harap ni Tuhan. Bang paꞌin pasōng isab akkalbi boꞌ ahāp eꞌbi amikilan ai-ai, 10 ati boꞌ kam makataliꞌ bang ai ya hinangbi ahāp katapusan. Bang tataliꞌbi pahāp, tantu alanuꞌ ataybi, maka halam aniyaꞌ dusa panāꞌan kaꞌam bang atꞌkka llaw kabalik Al-Masi. 11 Pinꞌnnoꞌan du kam kahāpan indaginis labay min si Isa Al-Masi ma addat-tabiꞌatbi, ati pinudji Tuhan maka sinanglitan ma sababbi.
Pangalabusu ma si Paul Ahāp Kaluwasanna
12 Saga dauranakanku, kabayaꞌanku subay kataꞌuwanbi in pakaradjaꞌan kalabayanku itu ahāp sadja kamattihanna, sabab minnēꞌ pasaplag gom paꞌin lapal ahāp pasal si Isa Al-Masi. 13 Kinataꞌuwan na eꞌ saga jaga ma deyom astanaꞌ itu maka saga aꞌa kamemon ma jadjahan ītu, in aku kinalabusu ma sabab Al-Masi ya pameyaꞌanku. 14 Jari pahogot lagiꞌ pangandol kahekaꞌan saga danakantam sukuꞌ Panghūꞌ Isa ma sabab kili-kili ya pangengkot aku itu, ati pasōng katawakkal sigām amasaplag lapal Tuhan. Mbal na sigām tināw.
15 Ya bꞌnnalna aniyaꞌ saga aꞌa kaseheꞌ magnasihat pasal Al-Masi ma sabab pangihid maka pangalindi sigām. Sagōꞌ aniyaꞌ kaseheꞌan magnasihat min atay poteꞌ 16 ma sabab lasa sigām ma aku. Kinataꞌuwan asal eꞌ sigām in aku bay pinamaitu min kahandak Tuhan boꞌ tꞌnggehanku lapal ahāp. 17 Magnasihat pasal Al-Masi saga aꞌa angalindi inān, sagōꞌ magduwa baihuꞌ sigām sabab ya maksud sigām toꞌongan subay karuhunan susaku hinabuku ma deyom kalabusu.
18 Saguwāꞌ minsan buwattēꞌ, mbal pamagayku. Gom paꞌin aku kinōgan bang paꞌin pinagnasihat Al-Masi, ai na ka min atay poteꞌ, ai na ka min panganjingki. Maka taptap du kakōganku, 19 sabab kataꞌuwanku in aku pinaluwas du min deyom kalabusu, labay min pangamuꞌ-ngamuꞌbi ni Tuhan. Tinabang isab aku eꞌ Rū si Isa Al-Masi. 20 Ya angutku toꞌongan, maka holatanku, bang paꞌin aku mbal karapatan ma hinang bay pamasukuꞌ aku eꞌ Tuhan. Bilahi aku anawakkal sakahabaꞌ waktu, ya lagiꞌna ma waktu itu, boꞌ supaya aniyaꞌ sanglit ma Al-Masi min ai-ai hinangku, ma kallumku ka atawa ma kamatayku. 21 Sabab ahalgaꞌ ma atayku Al-Masi satꞌggolku allum. Maka bang aku gantaꞌ amatay na, labi ahāp toꞌongan. 22 Bang pinaꞌamu, satꞌggol halam taꞌabut gantaꞌanku, paheka gom paꞌin kahinanganku ajatu. Sagōꞌ dalam duwa giꞌ aku. Mbal kataꞌuwanku bang ingga ya subay peneꞌku, ni kamatay atawa ni kallum. 23 Magduwa-ruwa deyom pikilanku. Bilahi aku amutawan minnitu boꞌ paꞌatag ma Al-Masi, sabab labi hāpna bang kita ma atagna na. 24 Sagōꞌ muna-muna ahalgaꞌ ma kaꞌam bang pinatahaꞌ lagiꞌ umulku. 25 Manantuhi aku bang ingga ya makahāp kaꞌam, angkan aku mbal giꞌ amutawan min kaꞌam. Maitu lagiꞌ aku ma kaꞌam boꞌ supaya pasōng pangandolbi maka kakōganbi. 26 Jari bang aku makamailu ma kaꞌam pabīng, aku ya sababan angkan manglabi-labihan kakōg-koyagbi.
27 Na, minsan ai paniyaꞌ, pahantapunbi palantarabi boꞌ makatōp ma saga aꞌa ya angisbat lapal ahāp pasal Al-Masi. Jari minsan aku mailu ma kaꞌam, atawa hal pinahabalan sadja ma pasal kahālanbi, kataꞌuwanku du in kaꞌam dauyunan sadja. Kataꞌuwanku isab in kaꞌam magdakayuꞌ amogbogan lapal ahāp. 28 Daꞌa kam tināw ma saga aꞌa ya amantahan kaꞌam, minsan kam niꞌinay. Sabab bang taꞌndaꞌ eꞌ sigām in kaꞌam mbal tapakitāw, nahas koꞌ inān pamataꞌu sigām in sigām magkaꞌat du, maka kaꞌam ya lappasan ma sabab katabang Tuhan ma kaꞌam. 29 Ahāp ya panganggantaꞌ Tuhan ma kaꞌam ma sabab Al-Masi ya pameyaꞌanbi, nggaꞌi ka hal pamarassayabi ma iya, lāgi makananam kam kabinsanaꞌan isab ma pasalanna. 30 Sabab ilu kam binowa magsuꞌal maka saga aꞌa ya magpanaggaꞌ lapal ahāp, buwat bay taꞌndaꞌbi ma aku waktu kapagsuꞌalku maka aꞌa kaseheꞌ. Maka takalebi isab buwattinaꞌan in aku masi binowa magsuꞌal.