2
Addat Al-Masi ya Panunurantam
1 Na, kataꞌuwanku ahogot imanbi ma sabab pagbeyaꞌbi maka Al-Masi. Kauliꞌan kasusahanbi ma sabab lasana maka aniyaꞌ kapagdakayuꞌbi atay sabab min Rū Sussi. Aheya isab kasi-lasabi dangan maka dangan. 2 Manjari, pagga buwattēꞌ kahālanbi, pajatuhun lagiꞌ kakōganku. Magdakayuꞌ kam ma pamikilbi, papagsaliꞌ-saliꞌunbi lasabi, magdaꞌatay kam toꞌongan. Bang aku beyaꞌbi buwattēꞌ, jukup du paꞌin kakōganku. 3 Ai-ai hinangbi subay daꞌa min pangihidbi atawa min kabayaꞌanbi magmalangkahi. Subay areyoꞌ sadja pangatayanbi. Bistahunbi pagkahibi ilu alanga giꞌ min kaꞌam. 4 Daꞌa pikilunbi kahāpan ni baranbi sadja, saguwāꞌ magkaꞌinagon kam dangan maka dangan. 5 Ya pangatayanbi subay pasaliꞌ ni buwat pangatayan si Isa Al-Masi.
6 Tuhan asal iya min kaꞌasalna,
sagōꞌ halam tapikilna in kapagdakayuꞌna maka Tuhan subay gomgomanna.
7 Gom paꞌin bbahanna kaniyaꞌna kamemon,
ati maglillaꞌ iya magpaꞌata.
Bay iya magpabaran manusiyaꞌ piꞌitu ni dunya,
8 pasengod iya ni kajarihan manusiyaꞌ.
Bay iya magpareyoꞌ di-na,
ati beyaꞌna kabayaꞌan Tuhan sampay ni kamatay,
minsan pinapatay ma hāg.
9 Angkan iya pinalanga eꞌ Tuhan ni langa katapusan.
Kabuwanan iya ōn alanga min ōn kamemon,
10 boꞌ magsujuran ni iya binangsa ai-ai kamemon,
ai na ka ma sulgaꞌ, ai na ka ma dunya,
ai na ka isab ma deyom ahirat.
11 Magpasabꞌnnal sigām kamemon
in si Isa Al-Masi Panghūꞌ toꞌongan,
maka Mmaꞌtam Tuhan ya pinagmahaldikaꞌan.
Sawa Pamasawa Dunya
12 Manjari itu, saga bagay kalasahanku, beyaꞌunbi na paꞌin pamituwaku buwat bay sakahabaꞌ. Bay asal beyaꞌbi ma kamailuku lagiꞌ, sagōꞌ lubaꞌ-lagiꞌna na bang aku alikut. Isbatunbi Tuhan, pagmatāwinbi, hinabubi amanuyuꞌ boꞌ tatuman kalappasbi. 13 Sabab Tuhan ya angahinang na paꞌin ma deyom pangatayanbi boꞌ aniyaꞌ bayaꞌbi maka kosogbi angahinang ai-ai pangahandakna.
14 Hinangunbi ai-ai panohoꞌan kaꞌam ma halam aniyaꞌ karugalan atawa panganjawabbi, 15 supaya halam aniyaꞌ laꞌat atawa sallaꞌ panāꞌan kaꞌam. Jari anak Tuhan na kam halam taga-tamak minsan kam palamud ma saga aꞌa ya abengkok pikilan sigām maka alaꞌat kasuddahan sigām. Sapantun kam bituꞌun asahaya amuwan sawa ma bꞌttong langit, 16 saltaꞌ kaꞌam amasampay lapal min Tuhan ni saga aꞌa ma dunya itu, lapal makabuwanan sigām kallum taptap. Bang hinangbi inaꞌan, pamantuganku kaꞌam bang taꞌabut llaw kabalik Al-Masi, sabab kaꞌam ya saliꞌ bainat in hinangku maka sangsāꞌku taga-kamattihan du.
17 Na, ya pangandolbi ma Al-Masi saliꞌ dalil pagkulban tinukbalan ni Tuhan. Maka bang aku saupama pinapatay, lahaꞌku saliꞌ dalil lalabotan pamajukup ni pagkulbanbi. Jari mbal aku magang-ang amutawanan nyawaku, gom paꞌin aku magbeyaꞌ maka kaꞌam magkōg-koyagan. 18 Damikiyanna isab kaꞌam ilu, subay kam kinōgan na paꞌin sampay ameyaꞌ ma kakōganku.
Si Timuti maka si Epaprode
19 Agaraꞌ aku amabeyaꞌ si Timuti pasaꞌut piꞌilu, bang kabayaꞌan Panghūꞌ Isa isab. Jari bang iya pabīng piꞌitu amowahan aku habal pasal kahālanbi, aheya kalasiganku. 20 Sabab halam aniyaꞌ angatu ma si Timuti itu bang takdil ni pagkaꞌinagon ma kaꞌam. 21 Kahekaꞌan saga aꞌa itu hal angannal ma baran sigām sadja, mbal angannal pasal pakaradjaꞌan si Isa Al-Masi. 22 Sagōꞌ kataꞌuwanbi si Timuti maka kahatulna. Bay iya anabangan aku magnasihat lapal ahāp, buwat panabang aꞌa ma mmaꞌna. 23 Angkan aku magniyat amapiꞌilu si Timuti, sagoꞌ subay kataꞌuwanku dahū bang ai tumꞌkka ni aku. 24 Pasangdol isab aku ma Panghūꞌ Isa, bang paꞌin aku makasaunuꞌ ni kaꞌam.
25 Bang ma kumpasanku ahāp subay pabalikku ni kaꞌam danakanku si Epaprode, ya bay sohoꞌbi piꞌitu anabangan aku. Seheꞌku iya maghinang ni Tuhan, gapiꞌku angosogan lapal ahāp. 26 Angentom iya ma kaꞌam kamemon, maka asusa isab iya pagka takalebi habal pasal sakina. 27 Bꞌnnal bay abangat sakina, arak iya amatay, mandaꞌ iya kinaꞌaseꞌan eꞌ Tuhan. Ya du aku kinaꞌaseꞌan, sabab bang iya gantaꞌ bay amatay, magduruhun karukkaꞌanku. 28 Angkanna aheya bayaꞌku amabalik iya ni kaꞌam, boꞌ kam kinōgan pagꞌndaꞌbi ma iya, ati pahantap bay kasusahanku. 29 Sampangunbi iya pahāp luwas min pagkōg-koyagbi, sabab Panghūꞌ Isa ya pameyaꞌanbi saliꞌ-saliꞌ. Pagaddatinbi saga aꞌa ya pasaliꞌ ni si Epaprode itu, 30 sabab arak toꞌongan iya amatay ma sabab hinangna tudju ni Al-Masi. Bay panūkna kallumna, bang paꞌin iya pagantiꞌ min kaꞌam amatuntul aku.