3
Ya Pasangdolan si Paul
1 Na, saga dauranakanku, ya itu katapusanna: magkōg-koyag kam ma sabab Panghūꞌbi si Isa. Mbal makainay ma aku bang aku anulatan kaꞌam pabalik pasal itu, bang paꞌin kam asalamat.
2 Halliꞌinbi saga aꞌa maghinang kalaꞌatan ilu, ya sapantun eroꞌ landuꞌ abꞌngngis. Tagihan sigām anganggaliꞌan kuwit aꞌa, bainat in sigām sukuꞌ Tuhan. 3 Sagōꞌ hakaꞌanta kam, kitam ya taga-bainat bꞌnnal. Amudji kitam ni Tuhan sabab min Rū-na Sussi, maka magkōg-koyag isab kitam ma sabab si Isa Al-Masi. Halam aniyaꞌ pasangdolantam ma hinangan baran. 4 Sagōꞌ bang aku subay taga-pasangdolan ma hinangan baran, aniyaꞌ du kahinangan ma aku.
Bang pangannal saga aꞌa kaseheꞌ aniyaꞌ kapatutan sigām pasangdol ma pamogbog sigām ma agama, lubaꞌ-lagiꞌna na aku. 5 Sabab taꞌabut paꞌin walungꞌllaw min bay kapaganak ma aku, niꞌislam aku ma buwat addat kami Yahudi. Bangsa Israꞌil aku, panubuꞌ si Benjamin asal kamattoꞌahanku. Porol aku bangsa Hibrani. Bang takdil ni pamogbog ma saraꞌ agama Yahudi, umpigan Parisi aku ya atukid amogbog ma saraꞌ agama. 6 Landuꞌ aku atukid ma agama Yahudi, ya poꞌon bay pinjalaꞌku saga jamaꞌa Al-Masi. Bang aniyaꞌ aꞌa tabista aꞌadil ma sabab kapamogbogna ma panohoꞌan-saraꞌ si Musa, lubaꞌ-lagiꞌna na aku itu, sabab halam aniyaꞌ sallaꞌku.
7 Malaingkan ai-ai bay pangannalku amowa aku ni kahāpan mbal na pamagayku bang paꞌin aku taga-lamud ma Al-Masi. 8 Maka nggaꞌi ka hal eꞌ-i. Ai-ai bay ahalgaꞌ ma aku dahū itungku na saliꞌ halam aniyaꞌ pūsna, bang paꞌin kataꞌuwanku Panghūꞌku si Isa Al-Masi. Sabab ahalgaꞌ giꞌ iya min kamemon. Taikutanku na kamemon bay bistaku pangaltaꞌ ma waktu tagnaꞌ, ati itungku na saliꞌ sꞌggit, bang paꞌin taꞌangutku Al-Masi, 9 sampay makaparakayuꞌ na ni iya. Mbal paheyaku ma atay in kabontolan luwas min pamogbogku ma saraꞌ bay tasulat si Musa. Binista aku abontol eꞌ Tuhan sabab min pangandolku ma Al-Masi. Ya na koꞌ ilu kabontolan pamuwanna ma sasuku angandol. 10 Ya sadja pagmatayanku bang paꞌin kasakupanku Al-Masi, boꞌ tananamku isab barakat Tuhan ya bay pamakallum Al-Masi min kamatayna. Bilahi aku pasaliꞌ ni iya anandalan kabinasahan buwat bay panandalna, sampay ni kamatay. 11 Sabab bang buwattēꞌ kapameyaꞌku ma Al-Masi makaholat aku pinakallum pabīng min kamatay.
Si Isa ya Pagmatayantam Sakahabaꞌ Waktu
12 Halam giꞌ taꞌabut kamemon ya pagmatayanku, maka mbal giꞌ aku sampulnaꞌ ma kaul maka piꞌil. Sagōꞌ amanuyuꞌ na paꞌin aku boꞌ taꞌangutku kamemon ya minaksud eꞌ si Isa Al-Masi angkan iya bay ameneꞌ aku. 13 Hakaꞌanta kam saga dauranakan, mbal aku amikil di-ku in aku makaꞌangut na. Sagōꞌ buwattitu na paꞌin hinangku: bbahanku na ai-ai bay talabayku inān, ati angutku na ai-ai ya pinama-aku ma sinosōng. 14 Amanuyuꞌ aku sampay taꞌabutku kahāpan ya pangabbitan aku eꞌ Tuhan labay min si Isa Al-Masi, hatina kallum kakkal ma deyom sulgaꞌ.
15 Kitam kamemon, sasuku kitam asangpot na ma pangandol maka ma akkal, subay saliꞌ-saliꞌ panganguttam. Bang hati aniyaꞌ amikilan saddī pasal ai maka ai, pinasawa du eꞌ Tuhan pamikilna. 16 Sagōꞌ minsan painay, subay tukiranta ai-ai bay taꞌabutta min katagnaꞌ pangandolta sampay ni kabuwattituhan.
17 Saga danakanku, subay kam dauyunan anunuran aku. Pandogahinbi isab saga aꞌa kaseheꞌan, ya ameyaꞌ ma suntuꞌan bay pangꞌbba kami ma kaꞌam. 18 Araran itu bay pahꞌllingku ni kaꞌam ma waktu palabay, maka balikanku hinabu aku anangis: aheka aꞌa anulakan panduꞌ pasal kamatay Al-Masi ma hāg. 19 Nalkaꞌ ya kamattihan sigām, sabab tabanyagaꞌ sigām eꞌ napsu, maka pagbantugan sigām saga hinang makaiyaꞌ-iyaꞌ. Luwal legot dunya ya kinannal eꞌ sigām. 20 Saguwāꞌ mbal buwattēꞌ ma kitam. Sulgaꞌ ya lahattam luggiyaꞌ, maka aniyaꞌ Manglalappas lagarantam pabalik piꞌitu minnēꞌ, hatina Panghūꞌtam si Isa Al-Masi. 21 Makapiꞌitu paꞌin iya, pinindahan eꞌna ginhawa barantam ya magkalamma maka magkamatay itu. Pinindahan ni buwat baranna asahaya, min kawasana ya panganggaꞌosna ma ai-ai kamemon.