4
1 Saga dauranakanku kinalasahan, landuꞌ aku angentom ma kaꞌam. Kaꞌam ya poꞌonan kalasiganku maka kamaujuran hinangku. Angkan buwattitu pahꞌllingku ma kaꞌam: patotogunbi pameyaꞌbi ma Panghūꞌtam!
Pamituwa Katapusan
2 Aniyaꞌ amuꞌku ni duwangan dꞌnda ilu, si Yudi maka si Sintiki, bang paꞌin sigā magsulut sabab magdanakan asal sigā ma deyoman Panghūꞌ Isa. 3 Kaꞌa isab, bagayku kapangandolan, aniyaꞌ panganjunjungku ni kaꞌa pagka kita danseheꞌan maghinang panohoꞌan Tuhan. Tabangun paꞌin duwangan dꞌnda ilu sabab seheꞌku asal amuspus amasaplag lapal ahāp, beyaꞌ isab si Klemen maka aꞌa kamemon bay aneheꞌan aku maghinang. Tasulat na eꞌ Tuhan ōn sigām ma būk ya panunulatan ōn aꞌa taga-kallum kakkal.
4 Magkōg-koyag kam sakahabaꞌ waktu ma sabab Panghūꞌ Isa ya parakayuꞌanbi. Balikanku lagiꞌ: magkōg-koyag kam!
5 Subay ahantap bowahanbi ni aꞌa kamemon. Asekot na waktu kapiꞌitu Panghūꞌ Isa. 6 Daꞌa kasusahinbi ai-ai, saguwāꞌ amuꞌunbi ai-ai kagunahanbi ni Tuhan sakahabaꞌ waktu pangaharapbi iya. Pagsukulinbi iya ma waktu kapangamuꞌ-ngamuꞌbi. 7 Jari pinaniyaꞌan kam kasannangan Tuhan, kasannangan mbal taꞌambat pinikil eꞌ manusiyaꞌ, ati asalamat du paꞌin ataybi maka pamikilbi sabab si Isa Al-Masi ya parakayuꞌanbi.
8 Na, ya katapusanna, saga dauranakanku, pahōpunbi ni deyom pamikilbi ai-ai landuꞌ ahāp maka patut binantug. Pikilunbi ai-ai abontol, asaltun, ahāp kinale, maka ai-ai makasulut atay. 9 Beyaꞌunbi ai-ai bay taꞌanadbi atawa taꞌāꞌbi min aku, ai na ka min bissalaku, ai na ka min palantaraku. Ati patꞌttog ma kaꞌam in Tuhan ya amuwanan kitam kasannangan atay.
Pagsukulan si Paul
10 Aheya pagsarang-sukulanku ni Panghūꞌtam ma sabab pagkaꞌinagonbi ma aku pinabalik na. Bay kam alasa asal ma aku, sagōꞌ halam aniyaꞌ dapatbi amabeyaꞌan aku tatabangan. 11 Mbal yukku in aku kasigpitan, sabab ahantap pangatayanku minsan buwattingga kahālanku. 12 Bay na kalabayanku kasigpitan maka kaniyaꞌ ballabi-labihan, sagōꞌ biyaksa aku amahantap pangatayan minsan ai paniyaꞌ, ai na ka lingantu, ai na ka asso, ai na ka taga-kaniyaꞌ manglabi-labihan, ai na kakulang-kabusan. 13 Kasandalanku ai-ai kamemon ya tumꞌkka ni aku, sabab min kosog Al-Masi ya pamakosogna aku.
14 Saguwāꞌ ahāp addatbi anabangan aku ma deyom kasusahanku itu. 15 Kaꞌam saga aꞌa Pilipi ataꞌu isab ma bay kahālanku, waktu katulakku min lahat Makidunya ilu. Halam aniyaꞌ jamaꞌa Al-Masi saddī min kaꞌam bay amatuntul aku. Luwal kaꞌam ya seheꞌku magtabang-tiyabangi, boꞌ paꞌin bahaꞌu kataꞌubi ma pasal lapal ahāp. 16 Minsan ma waktu kamainaꞌanku ma Tessaloneka, bay kam angabut-ngabut amabeyaꞌan aku tatabangan hinabuku ma deyom asigpit. 17 Sagōꞌ nggaꞌi ka kaniyaꞌbi ya angutku. Ya sadja kabayaꞌanku bang paꞌin aniyaꞌ paluntunganbi aheya bang taꞌabut waktu panungbas kaꞌam eꞌ Tuhan. 18 Boꞌ kataꞌuwanbi, tasambutku na kamemon bay pabeyaꞌanbi aku, magsukul. Gom paꞌin palabi lagiꞌ, jari halam aniyaꞌ kulangku, sabab itiyaꞌ na isab paglasa ya bay pabowabi ma si Epaprode. Sapantun lalabotan ahamut koꞌ itu, tinukbalan ni Tuhan. Kasulutan isab iya. 19 Jari Tuhanku ya amuwanan kaꞌam ai-ai kulangbi min altaꞌna ya mbal tapulaꞌ-pulaꞌ, luwas isab min si Isa Al-Masi.
20 Sanglitantam Tuhantam, ya Mmaꞌtam, sampay ni kasaumulan. Amin.
21 Pasampayunbi paꞌin minsan laꞌa hal lapal kasi-lasaku ni kamemon saga aꞌa Tuhan, ya pasukuꞌ ma si Isa Al-Masi. Ya du saga dauranakantam ma aku itu, amasampay isab lapal kasi-lasa sigām. 22 Ya du isab kamemon saga aꞌa sukuꞌ Tuhan ma lahat itu, lubaꞌ-lagiꞌna sigām ya paokom ma deyom astanaꞌ Sultan Mahatinggi itu, amabeyaꞌ isab ni kaꞌam minsan laꞌa hal lapal kasi-lasa sigām.
23 Mura-murahan bang paꞌin kam pinaniyaꞌan tatabangan eꞌ Panghūꞌtam si Isa Al-Masi. Amin.
Wassalam