2 TESSALONEKA
1
Sulat si Paul Karuwana ni Saga Aꞌa ma Daꞌira
TESSALONEKA
1 Sulat itu min aku, si Paul, maka min seheꞌku si Silas maka si Timuti, pinasampay piꞌilu ni palhimpunan Tessaloneka, ya kaꞌam sukuꞌ Mmaꞌtam Tuhan maka Panghūꞌtam si Isa Al-Masi.
2 Mura-murahan, bang paꞌin kam pinaniyaꞌan tatabangan maka kasannangan atay eꞌ Mmaꞌta Tuhan maka eꞌ Panghūꞌtam si Isa Al-Masi.
Pagsukulan maka Pangamuꞌ-ngamuꞌ
3 Saga dauranakanku angandol ma Al-Masi, wajib kami magsukul na paꞌin ni Tuhan ma sababbi sakahabaꞌ waktu. Ya angkan kami patut magsukul sabab aheya na kasōngan pagimanbi ni si Isa Al-Masi, maka pasōng gom paꞌin paglasabi dangan maka dangan. 4 Ya na itu sababanna angkan kami amantug ma pasalbi ni saga kajamaꞌahan Tuhan. Sabab minsan kam ma deyom katiksaꞌan maka kabinasahan, asandal kam maka anatas pangandolbi ma iya.
5 Saga pakaradjaꞌan itu kamemon amuwan bainat in hukuman Tuhan abontol, sabab kasandalanbi katiksaꞌan ma sabab sukuꞌ Tuhan kam, ati minnēꞌ kinataꞌuwan in kaꞌam tōp pinasōd ni deyom pagparintahanna. 6 Abontol asal hukuman Tuhan, tiniksaꞌ du eꞌna saga aꞌa bay aniksaꞌ kaꞌam. 7 Kaꞌam sasuku magkasusahan buwattinaꞌan, binuwanan du kasalamatan ma sinosōng, beyaꞌ isab kami. Nihinang itu eꞌ Tuhan bang panyataꞌ Panghūꞌ Isa piꞌitu min deyom sulgaꞌ magbeyaꞌ maka saga malaꞌikatna akawasa. 8 Asahaya kapiꞌituna saliꞌ sapantun api asuleyab. Amatꞌnnaꞌ iya hukuman ma sasuku mbal magmatāw ma Tuhan, maka ma sasuku isab mbal ameyaꞌ ma lapal ahāp pasal Panghūꞌ Isa. 9 Ya pangahukum Tuhan ma saga aꞌa inān mulkaꞌ halam aniyaꞌ katobtobanna. Binutawanan sigām min Panghūꞌtam maka min kawasana asahaya, 10 ma llaw pagbīng si Isa Al-Masi piꞌitu. Ya na inaꞌan waktu pangamahaldikaꞌ iya eꞌ aꞌa sukuꞌna, waktu pamaheya ma iya eꞌ saga aꞌa magpangandol kamemon. Talapay isab kaꞌam ilu ma waktu sinōng inān, sabab tapagkahagadbi saksiꞌ kami pasal si Isa.
11 Angkanna kami angamuꞌ-ngamuꞌ na paꞌin ni Tuhan ma sababbi. Ya pangamuꞌ kami, bang paꞌin kam tubus ma kaul maka piꞌil pagka kam bay tapeneꞌ eꞌ Tuhan. Ya pangamuꞌ kami isab, bang paꞌin kam tinabangan min kawasana boꞌ tatalusbi kamemon niyatbi ma sabab si Isa ya pangandolanbi. 12 Angkan kami angamuꞌ-ngamuꞌ buwattitu supaya pinaheya ōn si Isa Panghūꞌtam ma sababbi. Maka pinaheya du isab kam eꞌna, ma sabab tatabangan min Tuhantam sampay min Panghūꞌ Isa Al-Masi.