14
Pangandol Akosog maka Pangandol Alamma
1 Aniyaꞌ pamituwaku ma kaꞌam ma pasalan aꞌa alamma pangandolna ma si Isa. Bagayunbi iya, daꞌa iya bowahunbi magjawab ma saukat na aniyaꞌ kapamꞌnnalanna saddī. 2 Buwat saupama ma pagkakan, aniyaꞌ aꞌa dakayuꞌ makahalal pagkakan ai-ai sabab ahogot pangandolna ma si Isa Al-Masi. Aniyaꞌ isab aꞌa dangan, hal sayul ya palaukna pagka mbal giꞌ ahogot pangandolna. 3 Na, ya aꞌa makahalal kinakan indaginis subay mbal angudjuꞌ ma aꞌa dangan ya mbal makahalal. Damikiyanna aꞌa amangan sayul sadja, subay mbal anoway aꞌa dangan ma saukat tahalalna kinakan ai-ai. Sabab tinaimaꞌ du aꞌa inān eꞌ Tuhan. 4 Halam aniyaꞌ kapatutbi anoway aꞌa dakayuꞌ bang nggaꞌi ka kaꞌam ya pagnakuraꞌan. Nakuraꞌna sadja ya tag-kapatut amahꞌllingan iya ahāp-alaꞌat. Saguwāꞌ tantu iya mbal tabowa ni kalaꞌatan sabab tinabang iya eꞌ Panghūꞌ Isa angkan makasandal.
5 Bang takdil ni llaw, aniyaꞌ aꞌa angisbat llaw mulliya sabab aheya bang ma bistahanna. Saddī isab bistahan aꞌa dangan, bang ma iya saliꞌ du llaw kamemon. Jari ai-ai pamistabi pasal llaw, daꞌa pagduwa-duwahinbi. 6 Sai-sai angamulliya llaw, Tuhan ya aheya ma atayna pagmahaldikaꞌanna. Sai-sai angahalal kinakan ai-ai, Tuhan ya mahaldikaꞌna sabab Tuhan ya pagsukulanna bang amangan. Damikiyanna isab, sai-sai ameneꞌ pagkakanna, Tuhan du isab mahaldikaꞌna sampay pagsukulanna. 7 Nggaꞌi ka baranta sadja ya pagkaꞌinagonanta tꞌggolta allum. 8 Subay isbatta Panghūꞌ Isa ma kallumta maka ma kamatayta sabab sukuꞌna kita.
9 Ya na itu sababanna angkan Al-Masi bay amatay sampay allum pabīng min kamatayna, supaya iya pagpanghūꞌan saga aꞌa sukuꞌna, ai na ka allum, ai na ka bay magpatayan. 10 Angkanna kam subay mbal anoway atawa angudjuꞌ danakanbi. Makapagbalharap du kitam kamemon maka Tuhan ma llaw damuli boꞌ nihukum eꞌna. 11 Buwat tasulat ma Kitab, ya yuk-i,
“Bꞌnnal sadja bissalaku,” yuk Tuhan.
“Pasujud du ni aku saga manusiyaꞌ kamemon.
Magpanyabut sigām kamemon in aku asal Tuhan.”
12 Manjari in kitam kamemon subay magpamattan ni Tuhan ma sinosōng pasal ai-ai bay hinangtam ma dunya.
Daꞌa Parusahunbi Seheꞌbi
13 Ya itu sababanna angkan kita subay pahali magsoway dangan maka dangan. Ahāp lagiꞌ kita daꞌa magniyat angahinang ai-ai bang hinang inān amowa magdusa ma dakayuꞌ danakanta. 14 Aku itu, pagka parakayuꞌ na ma Panghūꞌ Isa, kataꞌuwanku toꞌongan halam aniyaꞌ pagkakan haram min kaꞌasalna. Sagōꞌ ma seheꞌta dakayuꞌ, bang aniyaꞌ pagkakan haram ma pamistana mbal toꞌongan tasꞌllongna. 15 Na, bang danakannu gantaꞌ asusa ma sabab kaꞌa ya taꞌndaꞌna amangan kinakan ya haram ma pamistana, saliꞌ halam aniyaꞌ lasabi ma iya. Subay ka mbal pasangdan amangan eꞌ-i bang amowa danakannu ni kalaꞌatan, sabab bay amatay Al-Masi ma sababanna inān. 16 Bang ma kaꞌa ahāp pagkakannu, saguwāꞌ mbal ahāp bang binissalahan alaꞌat eꞌ kaseheꞌan. 17 Pagka kita ma deyoman pagparinta Tuhan, mbal subay pahalgaꞌta ma atay pagkakanta atawa paginumta. Ya subay paheyata kahinanganta abontol, maka kasannangan atay, maka kalasigan pamuwan eꞌ Rū Sussi. 18 Jari bang buwattēꞌ paghinangta tudju ni Al-Masi kasulutan du Tuhan ma kita, maka pinagaddatan kita eꞌ pagkahita manusiyaꞌ.
19 Angkan na, subay kita angamohot maghinang ai-ai makapagsulut pagkahita, maka magpahogot pangandolta dangan maka dangan. 20 Daꞌa pakaꞌatunbi hinang Tuhan ma saukat na magbiddaꞌ pangaddatbi pasal pagkakan. Tahalal asal pagkakan kamemon, saguwāꞌ asāꞌ kam bang kam amangan ai-ai, boꞌ kam taꞌndaꞌ eꞌ dakayuꞌ pagkahibi, ati minnēꞌ iya angꞌbba min pangandolna. 21 Ahāp lagiꞌ kita pahondong amangan susumbaliꞌan, atawa anginum binu, atawa angahinang ai-ai bang inaꞌan-i manjari panababan pamowa danakanta angandusa atawa angꞌbba min pangandolna.
22 Manjari ai-ai pamistabi pasal itu-i subay hal kaꞌam maka Tuhan ya makataꞌu. Aheya kalasiganbi bang kam anganiyat angahinang ai-ai ma halam aniyaꞌ dusa tananam ma itikadbi. 23 Sagōꞌ bang aꞌa magduwa-ruwa pasal pagkakan boꞌ amangan na paꞌin, katōngan iya dusa sabab mbal magtaluwaꞌ maka pangandolna. Taga-dusa kita bang aniyaꞌ hinangta mbal magtaluwaꞌ maka pangandolta.