13
Subay Beyaꞌta Angꞌntan Pagparinta
1 In kitam manusiyaꞌ kamemon subay ameyaꞌ ma saga aꞌa magparinta ma paglahattam sabab halam aniyaꞌ kabuwanan kapatut magparinta bang nggaꞌi ka min kahandak Tuhan. 2 Sasuku anaggaꞌ ma aꞌa magparinta, saliꞌ Tuhan maka panohoꞌanna ya saggaꞌna, angkan iya taluwaꞌ hukuman. 3 Bang aꞌa maghinang ahāp mbal du tināw ma parinta. Luwal aꞌa maghinang kalaꞌatan ya tināw. Bang kam mbal bilahi tināw ma aꞌa magparinta, subay ahāp sadja hinangbi. Sinanglitan kam eꞌna 4 sabab sosohoꞌan Tuhan iya, aꞌa pinatꞌnnaꞌ maghinang kahāpan ma pasalanbi. Saguwāꞌ bang kam gantaꞌ maghinang kalaꞌatan, patut kam tināw, sabab nakuraꞌ inān taga-kapatut aminasa kaꞌam. Sosohoꞌan Tuhan iya, wajib aminasa sasuku maghinang alaꞌat. 5 Angkan kam subay magmaluluy ma saga aꞌa angꞌntan pagparinta, kaissana ma sabab kam tināw bininasa, karuwana ma sabab kataꞌuwanbi ma deyom itikadbi bang ai subay hinangbi.
6 Ya heꞌ sababanna angkan kam subay amayad sukay parinta, sabab sosohoꞌan Tuhan saga aꞌa ya maghinang ma deyoꞌan parinta inān. 7 Subay kam amayaran sigām sukay pila-pila ya katongoranna, ai na ka tongod ni usahabi, ai na ka tongod ni baranbi. Pagaddatinbi sigām kamemon bang aniyaꞌ kawasa sigām patut pinagaddatan. Pagmahaltabatinbi bang patut pinagmahaltabatan.
Subay Kita Maglasa-liyasahi
8 Bang aniyaꞌ utangbi, bayarinbi bang taꞌabut waktuna. Aniyaꞌ isab utang mbal kabayaran, ya na lasa ma pagkahibi. Bang kam alasa ma pagkahibi tatuman eꞌbi panohoꞌan-saraꞌ bay tasulat eꞌ si Musa, 9 ya yuk-i, “Wajib kam daꞌa angaliyu-lakad min pagholaꞌbi. Wajib kam daꞌa amapatay, daꞌa anangkaw, daꞌa anganapsuhan altaꞌ kaseheꞌanbi.” Ya panohoꞌan panambatku itu maka panohoꞌan kaseheꞌ, tapagdakayuꞌ maka panohoꞌan dakayuꞌ-dakayuꞌ, ya yuk-i, “Kalasahinbi pagkahibi buwat eꞌbi alasahan baranbi.” 10 Hatulanna, sasuku alasa ma pagkahina mbal toꞌongan bilahi angalaꞌat iya. Angkan bang kitam alasahan pagkahita manusiyaꞌ, tatuman eꞌtam saraꞌ Tuhan maka panohoꞌanna kamemon.
11 Patut subay hinangbi panohoꞌan itu sabab song na waktu pabīng si Isa. Asekot na min katagnaꞌ pamꞌnnalta ma si Isa. In kitam saliꞌ hantang aꞌa bay magtulihan, sagōꞌ abatiꞌ na. 12 Sōng palabay kalendoman, ya masa pangandusa. Apoteꞌ na sobangan, angkan subay bbahanta kahinangan alaꞌat, ya nihinang ma deyom kalendoman. Subay kita sakap anaggaꞌ kalaꞌatan, buwat ibarat sundalu magsakap. 13 Kaul-piꞌilta subay ahāp, ya tōp ma aꞌa patꞌnnaꞌ ma deyom kasawahan. Angkan daꞌa subay dumasiyaw paglami-lamita, daꞌa kita maglango-lango, daꞌa magbaꞌis, daꞌa magkasabulan. Daꞌa kita magbonoꞌ, daꞌa isab maglindi-lindi. 14 Sapantun badjuꞌ paghaggut, ahāp lagiꞌ bang Panghūꞌtam si Isa Al-Masi ya pangalampikbi. Daꞌa kannalunbi napsu baranbi bang buwattingga eꞌbi amarūl.