12
Hinang Makasulut Atay Tuhan
1 Saga dauranakanku, landuꞌ kitam kinaꞌaseꞌan eꞌ Tuhan, angkan buwattitu junjungku ma kaꞌam: pamasukuꞌunbi baranbi ni Tuhan, panukbalunbi ni iya tꞌggolbi allum. Ai-ai hinangbi subay ma iya sadja, maka subay makasulut atayna. Bang buwattēꞌ ajatu du paꞌin pagtaꞌatbi ma Tuhan. 2 Daꞌa panunurinbi kajarihan ya maumu panunuran ma ahil jaman itu, sagōꞌ parūlunbi Tuhan amabahaꞌu deyom panahuꞌanbi boꞌ supaya pinindahan eꞌna addat-tabiꞌatbi kamemon. Bang buwattēꞌ kasakupanbi du bang ai kahandak Tuhan, kahāpna maka kasampulnaꞌanna, ati kataꞌuwanbi bang ai makasulut iya.
3 Bay aku kinahāpan eꞌ Tuhan, binuwanan kapatut magnasihat, angkan yukku ma kaꞌam kamemon, daꞌa kam maglaku-laku in kaꞌam alanga min bay pamatꞌnnaꞌ kaꞌam. Subay kam amikilan di-bi pahāp-hāp. Bistahunbi toꞌongan bang ai bay pamatulun Tuhan ma kaꞌam kaniya-kaniya, sabab min pangandolbi. 4 Dalilunbi baran manusiyaꞌ. Baranta itu dakayuꞌ du, boꞌ magginis pagdayawna. Magbiddaꞌ isab hinang pagdayaw dakayuꞌ maka dakayuꞌ. 5 Buwattēꞌ isab ma kitam magpangandol ma si Isa. Minsan kitam aheka, sapantun kitam dakayuꞌ baran atibuꞌuk pagka sukuꞌ kitam Al-Masi. Magsugpat kitam dangan maka dangan minsan magbiddaꞌ kahinangantam, buwat pagdayaw baran. 6 Kabuwanan kitam kapandayan ginisan ma sabab lasa Tuhan, saddī ma dangan maka ma dangan. Maka kapandayan itu subay ginuna pahāp-hāp, pinapagtongod maka pangandoltam. Bang aꞌa kabuwanan kapandayan magpaluwas bissala deyoꞌ min Tuhan, subay paluwasna toꞌongan. 7 Bang aꞌa kabuwanan kapandayan anabangan pagkahina, subay tabanganna toꞌongan. Bang kapandayan magpanduꞌ, subay amanduꞌ toꞌongan. 8 Bang kapandayan amalasig atay kaseheꞌ, subay amalasig toꞌongan. Bang aꞌa anulung ma sukkal kaseheꞌ, subay hilas panulungna. Bang aꞌa binuwanan kapatut magnakuraꞌ, subay atukid eꞌna magpalꞌngngan ai-ai. Bang aꞌa binuwanan kapandayan angayura aꞌa kasigpitan, subay iya magkalasigan angayura.
9 Ya lasabi ma seheꞌbi subay min deyom atay. Kabꞌnsihinbi ai-ai alaꞌat, balutinbi ai-ai ahāp. 10 Subay kam maglasa-liyasahi toꞌongan sabab magdanakan kam ma deyoman si Isa Al-Masi. Magaddat-iyaddati kam min deyom atay. 11 Subay kam mbal lisuꞌan sabab Panghūꞌ Isa ya paghinanganbi. Subay kam atukid sadja ma ai-ai pamahinang kaꞌam. 12 Subay kam magkakōgan ma pangaholatbi ma Tuhan. Bang kam taluwaꞌ sukkal sandalinbi sadja, maka daꞌa kam pahali angamuꞌ-ngamuꞌ ni iya. 13 Buwaninbi pagkahibi sukuꞌ Tuhan bang kasigpitan, paꞌiddahunbi isab sasuku pahapit ni lumaꞌbi.
14 Bang aniyaꞌ angalaꞌat kaꞌam, amuꞌinbi sigām kahāpan ni Tuhan. Daꞌa balosinbi suknaꞌ. 15 Ameyaꞌ kam magkōg-koyag bang aniyaꞌ seheꞌbi magkōg-koyag, ameyaꞌ kam magtangis bang aniyaꞌ seheꞌbi gantaꞌ magtangisan. 16 Magsulut-siyuluti kam dapagkahian. Daꞌa palangahunbi bowahanbi, maka daꞌa kam aiyaꞌ magbagay maka aꞌa areyoꞌ. Daꞌa kam maglaku-laku in pangitaꞌubi alalom.
17 Bang aniyaꞌ angalaꞌat kaꞌam, daꞌa pellenginbi laꞌat. Ai-ai binista abontol eꞌ saga aꞌa kamemon, ya na heꞌ subay tukirinbi. 18 Amanuyuꞌ kam magsulut maka aꞌa kamemon. Bang aniyaꞌ pagsaggaꞌan subay nggaꞌi ka kaꞌam ya amowa saggaꞌ. 19 Saga bagay, daꞌa toꞌongan kam amalos bang kam nilaꞌat. Sagarinbi sigām binalos eꞌ mulkaꞌ Tuhan. Entomunbi bay tasulat ma deyom Kitab, ya yuk-i, “Aku na amalos, aku na anungbas, yuk Panghūꞌ.” 20 Ahāp bang beyaꞌbi panohoꞌan itu, ya bay tasulat isab ma Kitab, yuk-i,
“Bang aniyaꞌ bantabi lingantu, pakanunbi.
Bang iya patay boheꞌ, painumunbi,
sabab bang buwattēꞌ lasabi ma iya, kalu iya sinōd susun.”
21 Bang kam gantaꞌ nilaꞌat, daꞌa balosinbi. Hāpunbi aꞌa angalaꞌat inān boꞌ taraꞌug laꞌatna sabab min kahāpbi.