11
Kaꞌaseꞌ Tuhan ma Bangsa Israꞌila
1 Manjari angannal-ngannal lagiꞌ aku: “Tinimanan bahāꞌ eꞌ Tuhan bangsa dakayuꞌ-kayuꞌ ya palsukuꞌanna?” Tantu mbal. Bangsaku koꞌ inān sabab bangsa Israꞌil aku, tubuꞌ si Ibrahim, min panubuꞌ si Benjamin. 2 Halam katimanan eꞌ Tuhan bangsa ya bay tapeneꞌna sangay min awal tagnaꞌ. Kataꞌuwanbi ya tasulat ma deyom Kitab, waktu kapanutul si Elija ni Tuhan pasal bangsa Israꞌil. Yuk si Elija eꞌ, 3 “O Tuhan, pinapatay eꞌ sigām saga nabi sosohoꞌannu. Nilubu eꞌ sigām pagkukulbanan kami ni kaꞌa. Hal aku laꞌa takapin min baꞌanan nabi, ati piniha aku eꞌ sigām boꞌ pinapatay.” 4 Entomunbi bay panambung Tuhan ma panutul si Elija eꞌ, yuk-i, “Aniyaꞌ giꞌ pituꞌ ngibu aꞌa bay kapinanku, aꞌa halam bay makasumba ni taꞌu-taꞌu Baꞌal.” 5 Damikiyanna ma buwattinaꞌan, aniyaꞌ giꞌ takapin bangsa Israꞌil halam pataikut min Tuhan, aꞌa isab tapeneꞌna min lasana maka min kaꞌaseꞌna ma sigām. 6 Bang kasi-lasa Tuhan ya sababanna angkan iya ameneꞌ aꞌa, tantu nggaꞌi ka kahinangan manusiyaꞌ ya makasabab. Sagōꞌ bang Tuhan bay ameneꞌ aꞌa ma saukat na ahāp hinangna, saliꞌ halam aniyaꞌ pūs ma aseꞌ maka lasa Tuhan eꞌ.
7 Jari ai lagiꞌ? Halam tabāk eꞌ bangsa Israꞌil ya pagmatayan sigām. Luwal aꞌa pineneꞌ eꞌ Tuhan ya makabāk. Bay pinatuwas kōk saga aꞌa kaseheꞌan, 8 buwat tasulat ma kitab, ya yuk-i,
“Pinabongog eꞌ Tuhan pamikil sigām, ya poꞌon mbal makahati.
Aniyaꞌ mata sigām sagōꞌ mbal makaꞌndaꞌ,
Aniyaꞌ tainga sigām sagōꞌ mbal makakale.”
9 Aniyaꞌ isab bay pamissala si Daꞌud, yukna,
“Bang paꞌin sigām nijallat eꞌ paglami sigām,
Bang paꞌin sigām palukbuꞌ sampay ahꞌbbaꞌ,
panungbas kalaꞌatan sigām.
10 Bang paꞌin palendom pangꞌndaꞌ sigām boꞌ mbal makaꞌndaꞌ,
bang paꞌin parukkug bukut sigām sampay ni kasaumulan.”
11 Amikilan lagiꞌ aku pasal bangsa Israꞌil itu. Ya kahꞌbbaꞌ sigām inān, anatas bahāꞌ sampay ni kasaumulan? Tantu mbal. Sabab buwattitu ya pinagmohotan eꞌ Tuhan: saga bangsa nggaꞌi ka Israꞌil pasꞌlleꞌ na lappasan min hukuman dusa ma sabab karusahan bangsa Israꞌil. Minnēꞌ isab in bangsa Israꞌil tabowa angihid pagka tinaikutan. 12 Kira-kirahunbi, bang kaniyaꞌan kahāpan saga aꞌa nggaꞌi ka Israꞌil ma sabab karusahan bangsa Israꞌil, maka ma sabab kapanaikut Tuhan ma sigām, luhūy paheya kahāpan ma palbangsa-bangsahan kamemon bang jukup na saga aꞌa Israꞌil magpangahagad.
Pasal Aꞌa Nggaꞌi ka Yahudi
13 Aniyaꞌ pamissalaku ma kaꞌam ya nggaꞌi ka Yahudi. Kawakilan aku eꞌ Tuhan magnasihat ma buwat kaꞌam. Paheyaku isāb pagnasihatku itu ma atay, 14 bang paꞌin pinaihid pagkahiku Yahudi boꞌ supaya aniyaꞌ sigām lappasan min mulkaꞌ. 15 Sabab bang maghāp na Tuhan maka saga palbangsa-bangsahan ma sabab kataikut Tuhan ma bangsa Israꞌil, ai kaluwasanna bang sigām tinaimaꞌ eꞌ Tuhan pabīng? Lumanduꞌan ahāp. Saliꞌ sigām aꞌa pinakallum pabīng min kamatay. 16 Buwat tinapay bang ma pangaddat Yahudi. Niakup dangkuriꞌ min addunan bay panukbal ni Tuhan, paltandaꞌan in tinapay inān kamemon palsukuꞌan Tuhan du. Atawa poꞌon kayu, panukbal gamutna ni Tuhan, jari palsukuꞌanna katibuꞌukan kayu inān sampay ni sangana.
Kayu Jaitun Niꞌipat maka Kayu Jaitun Talunb
17 Na, magparalilan aku: bang aniyaꞌ sanga sinagpeꞌ min poꞌon kayu niꞌipat, boꞌ aniyaꞌ sanga kayu talun pinabatuk ni bay panagpeꞌan sanga tagnaꞌ, jari kabahagiꞌan kajatuhan min kayu niꞌipat saga magdalos na maka gamutna. 18 Sagōꞌ daꞌa pagabbu-abbuhinbi, sabab kaꞌam ilu hal sanga, maka nggaꞌi ka sanga ya amuwan kallum ma gamut. Gamut ya amuwan kallum ma sanga.
19 Kalu yukbi, “Bꞌnnal koꞌ ilu, saguwāꞌ sinagpeꞌ sigām eꞌ Tuhan supaya kami kapabatukan.” 20 Ahoꞌ, bꞌnnal. Sagōꞌ ya poꞌon sigām bangsa Israꞌil sinagpeꞌ sabab agagga amꞌnnal ma Tuhan, ati kaꞌam ya pinabatuk ni poꞌon kayu ma sabab kapamꞌnnalbi. Sagōꞌ daꞌa pagmalangkahianbi inaꞌan-i. Gom paꞌin kam magmatāw, ya aniyaꞌ kam sinagpeꞌ buwat bay sigām. 21 Sabab hatina, bang mbal allog Tuhan ma saga sanga porol, ya du kaꞌam mbal kaꞌlloganna.
22 Kira-kirahunbi kaꞌaseꞌ Tuhan maka kabꞌngngisna. Kabꞌngngisanna saga aꞌa ya pataikut min iya, saguwāꞌ kaꞌaseꞌanna kam bang paꞌin pataptap ma kahāpna, mbal maglaꞌan-laꞌan. Bang kam gantaꞌ pataikut min pangandolbi, ya du kaꞌam sinagpeꞌ du buwat ibarat sanga kayu. 23 Ya balikna, pinabatuk bangsa Israꞌil ni bay bai sigām, bang sigām gantaꞌ pahali anulak Al-Masi. Sabab halam aniyaꞌ ahunit ma Tuhan. 24 Ya hantang hatulanna, bang kaꞌam bay niāꞌ min kayu jaitun talun boꞌ pinabatuk ni kayu niꞌipat, labi aluhay bang bangsa Israꞌil pinabīng ni kayu bay panagpeꞌan sigām tagnaꞌ, sabab ya na poꞌonan sigām.
Lappasan Bangsa Israꞌil Kamemon ma Sinōng
25 Saga dauranakanku, aniyaꞌ bay pamataꞌu aku eꞌ Tuhan ma pasal bangsa Israꞌil itu. Bilahi aku amahatian kaꞌam supaya kam mbal amikil di-bi in kaꞌam ahāp min sigām. Buwattitu: in bangsa Israꞌil itu bay agagga amꞌnnal ma si Isa Al-Masi, saguwāꞌ mbal anatas kagagga sigām. Bang ajukup na kahekaꞌan aꞌa min bangsa saddī ameyaꞌ ma Tuhan, ameyaꞌ isab bangsa Israꞌil. 26 Manjari lappasan isab bangsa Israꞌil kamemon, buwat bay sinulat ma deyom Kitab, ya yuk-i,
“Piꞌitu min lahat Siyun ya Manglalappas.
Pahalamna saga laꞌat bay tahinang eꞌ panubuꞌ si Yakub.
27 Makapiꞌilu paꞌin aku, laꞌananku dusa sigām kamemon,
buwat bay asal tajanjiꞌku ma sigām.”
28 In bangsa Israꞌil itu bay banta Tuhan sabab tasulak eꞌ sigām lapal ahāp pasal si Isa Al-Masi, sagōꞌ in kahāpan bay ma sigām tagnaꞌ papelleng na ni bangsa saddī. Saguwāꞌ mbal du taptap kapanaggaꞌ sigām, sabab nientom eꞌ Tuhan bay kapameneꞌna ma kaꞌmboꞌ-mboꞌan sigām, angkan sigām kinalasahan na paꞌin. 29 Sabab Tuhan, bang aniyaꞌ aꞌa bay pineneꞌ eꞌna sampay lidjikiꞌanna, mbal toꞌongan apinda niyatna. 30 Kaꞌam nggaꞌi ka Yahudi ilu, bay kam anulang kabayaꞌan Tuhan ma waktu palabay inān, mandaꞌ kinaꞌaseꞌan kam eꞌna buwattinaꞌan ma sabab kapanulang bangsa Yahudi. 31 Ya du isab bangsa Yahudi, tasulang eꞌ sigām kabayaꞌan Tuhan buwattinaꞌan, sagōꞌ kinaꞌaseꞌan sigām eꞌ Tuhan buwat kaꞌaseꞌna ma kaꞌam. 32 Min kahandak Tuhan angkan in kamemon bangsa manusiyaꞌ tahinang saliꞌ sapantun pilisu mbal makalimaya min kapanulang sigām, boꞌ supaya in sigām kamemon pinatꞌkkahan aseꞌna.
Pananglit ma Tuhan
33 Mbal tapulaꞌ-pulaꞌ kahāp Tuhan, kaꞌaseꞌna, pangitaꞌuna maka panahuꞌanna. Halam aniyaꞌ min kitam makahati ma kagaraꞌanna maka ma kahinanganna. 34 Buwat yukna ma deyom Kitab,
“Sai makataꞌu panahuan Tuhan?
Sai makapituwahan iya?
35 Sai bay makabuwanan Tuhan ai-ai,
atawa bay makapautang ma iya?”
36 Min Tuhan asal ai-ai kamemon. Iya ya bay amaniyaꞌ kamemon maka iya isab sababanna angkan paniyaꞌ baꞌanan ai-ai kamemon. Sanglitanta iya ni kasaumulan. Amin.