10
1 Saga dauranakanku bebeyaꞌan si Isa, ya pagmatayanku toꞌongan pagkahiku bangsa Yahudi, bang paꞌin sigām lappasan boꞌ makasōd ni deyom sulgaꞌ. Ya koꞌ inaꞌan pangamuꞌ-ngamuꞌku ni Tuhan. 2 Makasaksiꞌ aku ma pasal katuyuꞌ sigām ma Tuhan, sagōꞌ halam tahati eꞌ sigām bang ai kataluwaꞌanna. 3 Halam tahati sigām bang buwattingga eꞌ Tuhan angampun dusa, maka eꞌna amuwan kabontolan ma manusiyaꞌ. Angusul sigām ma agama sigām, ati mbal anambut kabontolan ya pamatꞌnnaꞌ Tuhan ma sigām. 4 Ya saraꞌ bay tasulat eꞌ si Musa taga-katumanan na pagka makapiꞌitu na Al-Masi, manjari sai-sai angandol ma iya niōnan abontol eꞌ Tuhan.
Aꞌa Kamemon Makajari Lappasan
5 Aniyaꞌ isab tasulat eꞌ si Musa pasalan aꞌa amogbogan saraꞌ supaya binista abontol eꞌ Tuhan. Yuk sulat eꞌ, “Sai-sai angahinang panohoꞌan saraꞌ itu, aniyaꞌ kallumna kakkal.” 6 Aniyaꞌ sulat dakayuꞌ pasal kabontolan atay ya pinaniyaꞌan sasuku angandol, yuk-i, “Daꞌa kam atilaw-tilaw ma deyom ataybi bang sai patukad pariyataꞌ ni sulgaꞌ.” (Hatina sai amareyoꞌ Al-Masi minnēꞌ.) 7 “Daꞌa isab kam atilaw bang sai pareyoꞌ ni deyom ahirat.” (Hatina sai amowa Al-Masi pariyataꞌ min lahat kamatayan.) 8 Kira-kirahunbi ayat Kitab dakayuꞌ, ya yuk-i, “Ilu na lapal Tuhan ma kaꞌam. Ilu ma deyom bowaꞌbi. Ilu isab ma deyom ataybi.” Hatina ilu na ma kaꞌam lapal bay nasihat kami pasal pangandol ma si Isa Al-Masi.
9 Bang kam magpasabꞌnnal in si Isa Panghūꞌbi maka magkahagad toꞌongan min deyom ataybi in iya bay pinakallum min kamatay eꞌ Tuhan, tantu kam lappasan boꞌ pasōd ni deyom sulgaꞌ. 10 Sabab min pagkahagadtam ma si Isa ya angkan kitam binista abontol eꞌ Tuhan, ati bang kitam angahaka sabꞌnnal ni aꞌa kaseheꞌan pasal pagkahagadtam, minnēꞌ kitam lappasan. 11 Yuk sulat Kitab isab, “Sai-sai magkahagad ma iya halam aniyaꞌ pagsusunanna sapupud-daya.” 12 Talapay manusiyaꞌ kamemon pinagbissala ma ayat Kitab itu, sabab mbal magbiddaꞌ Yahudi maka nggaꞌi ka Yahudi. Dakayuꞌ du Tuhan ya pameyaꞌan eꞌ sigām kamemon, maka aheya kahāpan pamuwanna ma sasuku parahing ni iya. 13 Buwat tasulat ma deyom Kitab, ya yuk-i, “Sai-sai parahing ni Panghūꞌ, tantu lappasan.”
14 Buwattingga eꞌ sigām parahing ni Panghūꞌ bang halam giꞌ makapamꞌnnal ma iya? Maka buwattingga eꞌ sigām amꞌnnal bang halam giꞌ bay makakale lapal ahāp? Buwattingga isab eꞌ sigām akale lapal ahāp bang halam aniyaꞌ magnasihatan sigām? 15 Maka buwattingga isab eꞌ aꞌa magnasihat bang halam aniyaꞌ bay anohoꞌ iya magnasihat? Sagōꞌ aniyaꞌ bay sinohoꞌ, buwat tasulat ma deyom Kitab, ya yuk-i, “Kahāp du paꞌin bang aniyaꞌ amowahan kita lapal ahāp!” 16 Saguwāꞌ nggaꞌi ka aꞌa kamemon bay akale lapal ahāp itu, buwat na bay pamūng si Isaya inān, ya yuk-i, “O Tuhan, kulang du aꞌa magkahagad ma panglapal kami.” 17 Manjari lapal pasal Al-Masi subay pinagnasihat dahū boꞌ yampa takale eꞌ aꞌa, ati minnēꞌ aniyaꞌ pagkahagad sigām.
18 Amikilan aku pasal bangsa Israꞌil. Kalu bahaꞌ halam takale sigām lapal ahāp pasal si Isa Al-Masi? Sagōꞌ tantu takale sabab atanyag lapal itu, buwat tasulat ma deyom Kitab, yukna,
“Patanyag pamanduꞌ sigām ni kamemon bangsa,
pasampay bissala sigām ni mpat pidju alam.”
19 Amikilan lagiꞌ aku, kalu halam tahati eꞌ bangsa Israꞌil pasal lapal itu. Sagōꞌ tahati du. Si Musa ya makarahū anambung, yukna,
“Pagalakta kam ni bangsa kaseheꞌ,
ya yukbi halam aniyaꞌ gunana.
Papꞌddiꞌku ataybi tudju ni bangsa dakayuꞌ,
ya pangannalbi mbal makataꞌuwan aku.”
20 Atampal du pangallam Tuhan ya tasulat eꞌ si Isaya, yuk-i,
“Tabāk aku eꞌ saga aꞌa bay halam amiha aku.
Panyataꞌ aku ni saga aꞌa halam bay atilaw ma pasalanku.”
21 Saguwāꞌ buwattitu ya pamissala Tuhan ma pasal bangsa Israꞌil, yukna,
“Kahabaꞌ llaw bilahi aku anaimaꞌ saga aꞌa anaggaꞌ aku,
ya anaggaꞌ na paꞌin ma kabayaꞌanku.”