4
Si Ibrahim Panunurantam
1 Manjari ai na pamūngta pasal bay kalabayan si Ibrahim, ya pagꞌmmaꞌan pangkattam Yahudi? 2 Saupama si Ibrahim, bang iya bay binista abontol eꞌ Tuhan ma sabab ahāp kahinanganna, aniyaꞌ pamantugna ma baranna. Saguwāꞌ halam aniyaꞌ pamantuganna ma pangꞌndaꞌ Tuhan, sabab nggaꞌi ka min kahinanganna ya angkan iya binista abontol. 3 Entomunbi bay tasulat ma deyom Kitab, ya yuk-i, “Bay amꞌnnal si Ibrahim ma Tuhan, ati binista iya abontol sabab min kapamꞌnnalna.” 4 Saupama bang aniyaꞌ aꞌa maghinang ni aꞌa dakayuꞌ boꞌ ginadjihan, mbal yukta in gadji inān hal paglasa ma iya. Tuꞌud gadjina, tongod hulas-sangsāꞌna. Bang halam aniyaꞌ hinangna, halam du aniyaꞌ tongodna. 5 Buwattitu isab hatulanna: bang aꞌa mbal angandol ma hinangna, sagōꞌ angandol ma Tuhan ya amuwan kaꞌadilan ma manusiyaꞌ baldusa, in aꞌa inān binista abontol eꞌ Tuhan ma sabab pangandolna. 6 Buwattēꞌ du isab bissala si Daꞌud, waktu kapamissalana pasal kalasig aꞌa bang binista abontol eꞌ Tuhan ma halam aniyaꞌ hinang ahāp pasangdolanna. Yukna heꞌ,
7 “Aheya kahāpan ma sasuku niampun kalaꞌatanna,
maka sasuku pinapasan paldusahanna.
8 Aheya kahāpan ma iya bang mbal niꞌitung dusana eꞌ Tuhan.”
9 Kalu pangannalbi in kahāpan ya binissala eꞌ si Daꞌud itu pamasukuꞌ ma saga Yahudi sadja, pagka bangsa magislam. Nggaꞌi ka, sabab pamasukuꞌ isab sampay ma bangsa kaseheꞌ, ya mbal magislam. Bay na sambatku si Ibrahim dahū inān, in iya bay binista abontol eꞌ Tuhan ma sabab pamꞌnnalna. 10 Na, sumiyan bay kapamista Tuhan itu? Dahū min kapagislam ma si Ibrahim, atawa damuli? Kataꞌuwanta, si Ibrahim bay tabista abontol eꞌ Tuhan dahū lagiꞌ min bay kapagislam ma iya. 11 Bay iya amꞌnnal ma janjiꞌ Tuhan dahū boꞌ yampa niꞌislam tandaꞌ palsaksiꞌan in iya bay tabista abontol eꞌ Tuhan ma halam giꞌ bay niꞌislam. Manjari itu si Ibrahim saliꞌ hantang pagꞌmmaꞌan aꞌa kamemon ya magpamꞌnnal ma Tuhan, sasuku tabista abontol eꞌ Tuhan minsan halam bay makalabay pagislam. 12 Pagꞌmmaꞌan isab si Ibrahim ma sasuku bay magislam, nggaꞌi ka ma saukat na niꞌislam, saguwāꞌ ma sabab panunud sigām ma si Ibrahim, ya bay angandol ma Tuhan ma halam giꞌ bay niꞌislam.
13 Na aniyaꞌ bay janjiꞌ Tuhan ma si Ibrahim ma masa awal eꞌ, in iya maka saga panubuꞌna subay pinusakaꞌan kaluhaꞌan dunya itu. Ya poꞌon si Ibrahim nijanjiꞌan buwattēꞌ, nggaꞌi ka min pamogbogna ma saraꞌ sagōꞌ min pangandolna ma Tuhan, angkan iya binista abontol. 14 Bang hal aꞌa amogbogan saraꞌ ya panganjanjiꞌan pusakaꞌ, halam du aniyaꞌ pūs pangandolta ma Tuhan. Maka janjiꞌ Tuhan inān halam aniyaꞌ kamaujuranna bang saraꞌ ya subay binogbogan. 15 Sabab hatina, in saraꞌ itu amuwan palsababan ma mulkaꞌ Tuhan. Bang bay halam aniyaꞌ saraꞌ halam aniyaꞌ bay makalanggal iya.
16 Angkan yukta in panganjanjiꞌ Tuhan subay ajatu labay min pangandol manusiyaꞌ. Ati minnēꞌ atayudtud, in janjiꞌna nggaꞌi ka hal tungbas, saguwāꞌ pamusakaꞌna ma saga panubuꞌ si Ibrahim kamemon. Nggaꞌi ka sadja ma bangsa Yahudi, ya amogbogan saraꞌ itu, saguwāꞌ ma aꞌa kamemon sasuku angandol ma Tuhan buwat bay pangandol si Ibrahim. Jari pagꞌmmaꞌantam si Ibrahim, 17 buwat tasulat ma Kitab, ya yuk-i, “Hinangta ka pagꞌmmaꞌan saga kabangsa-bangsahan kamemon.” Jari pagꞌmmaꞌantam si Ibrahim bang ma bistahan Tuhan, sabab amꞌnnal iya ma Tuhan, in iya makapakallum aꞌa magpatayan maka amaniyaꞌ ai-ai bay halam aniyaꞌ, min pangallamna sadja.
18 Binꞌnnal eꞌ si Ibrahim janjiꞌ Tuhan, ati angagad iya ma halam aniyaꞌ niholat. Angkan iya wajib pagꞌmmaꞌan eꞌ kamemon bangsa, buwat bay panganjanjiꞌ Tuhan ma iya. Buwattitu ya tasulat ma deyom Kitab, yuk-i, “Ya heka tubuꞌnu buwat du heka bituꞌun.” 19 Ya umul si Ibrahim waktu bay kapanganjanjiꞌ Tuhan ma iya maraiꞌ na dahatus tahun, saguwāꞌ halam apinda pangandolna minsan tapikilna baranna inān agon-agon amatay na. Sampay hꞌndana si Sara, mbal na makaꞌanak, 20 sagōꞌ halam iya bay pahondong angandol ma Tuhan. Halam aniyaꞌ pagduwa-duwana pasal bay janjiꞌ Tuhan eꞌ, sagōꞌ pasōng gom paꞌin pangandolna maka eꞌna magmahaldikaꞌan Tuhan. 21 Tatantuna asal in Tuhan makagaꞌos du angahinang ai-ai bay panganjanjiꞌna. 22 Angkan si Ibrahim bay binista abontol eꞌ Tuhan, ma sabab pangandolna. 23 Maka nggaꞌi ka hal si Ibrahim bay pinagsulat inān, ya yuk-i, “binista iya abontol eꞌ Tuhan.” 24 Sampay kitam, sabab tahinang kitam abontol ma bistahan Tuhan, sasuku kitam amꞌnnal ma iya, ya bay amakallum Panghūꞌtam si Isa min kamatay. 25 Bay tinukbalan si Isa pinapatay ma sabab dusatam, maka pinakallum iya pabīng eꞌ Tuhan supaya kitam binista abontol.