5
Maghāp na Kitam maka Tuhan
1 Manjari itu, pagka niampun na kitam sampay nihinang abontol ma bistahan Tuhan ma sabab pangandoltam, magkahāp na kitam maka iya, min bay tahinang eꞌ Panghūꞌtam si Isa Al-Masi. 2 Pinananaman kitam kaheya tabang Tuhan ma sabab pangandoltam ma si Isa, ati pataptapantam tabang itu buwattinaꞌan. Magkōg-koyag kitam sabab aniyaꞌ holatantam in kitam pinahampitan kasahayaꞌan Tuhan. 3 Nggaꞌi ka isab hal pakaradjaꞌan sinōng ya amuwan kakōgan, sampay pakaradjaꞌan ma buwattinaꞌan minsan kitam ma deyom katiksaꞌan, sabab kataꞌuwantam isab, bang kalabayantam katiksaꞌan pasōng lagiꞌ kasandaltam. 4 Bang kitam anandal, kaꞌamuhan du Tuhan ma kaul-piꞌiltam. Maka bang iya kaꞌamuhan, tantu aniyaꞌ holatantam ahāp. 5 Halam aniyaꞌ pagsusunantam bang buwattēꞌ kaholatantam, sabab itiyaꞌ 5 asal Tuhan pinatꞌnnaꞌ ma deyom pangatayantam, labay min Rū Sussi ya pamuwan eꞌ Tuhan.
6 Sabab hatina, ma waktu bay panugilaꞌ eꞌ Tuhan, waktu halam aniyaꞌ gaꞌostam, bay amatay Al-Masi gantiꞌ saga aꞌa baldusa. 7 Alahang aniyaꞌ manusiyaꞌ lillaꞌ amatay gantiꞌ seheꞌna minsan painay kaꞌadilna. Kalu-kalu bang aꞌa ahāp toꞌongan kasuddahanna, ya aniyaꞌ makatawakkal amatay ma pasalna. 8 Saguwāꞌ pinaꞌndaꞌan kitam eꞌ Tuhan bang buwattingga heya lasana ma kitam, sabab amatay Al-Masi gantiꞌtam, ma waktu lagiꞌ kitam masi ma deyom karusahan.
9 Na, pagka kitam abontol ma bistahan Tuhan ma sabab kamatay si Isa, manantuhi kitam lappasan eꞌna min mulkaꞌna. 10 Maghāp na kitam maka Tuhan sabab min kamatay Anakna, waktu lagiꞌ kitam masi amantahan Tuhan. Na, bang kitam nihāp eꞌ Tuhan ma sabab kamatay Anakna, palabi giꞌ kalappastam ma sabab kallumna pabalik. 11 Maka nggaꞌi ka hal eꞌ-i. Aniyaꞌ giꞌ isab kakōgantam aheya ma sabab bay tahinang eꞌ si Isa Al-Masi Panghūꞌtam, angkan kitam maghāp na maka Tuhan.
Pagbiddaꞌan si Mboꞌ Adam maka Al-Masi
12 Na, aniyaꞌ dangan manusiyaꞌ bay makarusa, ya poꞌon aniyaꞌ dusa ma dunya itu. Bay iya makahinang dusa, ati minnēꞌ aniyaꞌ kamatay ma dunya. Ya kamattihanna aniyaꞌ kamatay ma manusiyaꞌ kamemon, sabab magdusa kitam kamemon. 13 Ma halam giꞌ aniyaꞌ saraꞌ bay pamuwan ma si Musa eꞌ Tuhan, aniyaꞌ asal dusa ma dunya itu. Sagōꞌ satꞌggol halam aniyaꞌ saraꞌ pinalꞌngngan, in dusa sigām mbal kaōnan langgal saraꞌ. 14 Malaingkan in binangsa manusiyaꞌ kamemon min si Adam sampay ni si Musa bay kapagbayaꞌan heꞌ kamatay. Beyaꞌ isab saga aꞌa ya mbal magsaliꞌ dusa sigām maka bay dusa si Adam waktu kapanaggaꞌna panohoꞌan Tuhan.
Si Adam itu saliꞌ suntuꞌan pangāꞌantam panghati pasal aꞌa dangan ya piꞌitu ni dunya ma llaw damuli. 15 Sagōꞌ atā pagbiddaꞌan dusa si Adam maka kahāpan ya pamuwan kitam eꞌ Tuhan. Magpatayan bangsa manusiyaꞌ ma sabab dusa aꞌa dakayuꞌ inān, sagōꞌ ballabi-labihan kahāpan Tuhan ya pangahilasna ma manusiyaꞌ labay min kasi-lasa si Isa Al-Masi, ya aꞌa dakayuꞌ itu. 16 Lāgi, magbiddaꞌ ya pamuwan eꞌ Tuhan maka kamattihan dusa si Adam. Dakayuꞌ du dusa bay tahinang eꞌna ati minnēꞌ kitam kamemon katōngan dusa. Saguwāꞌ saddī kahāpan ya pangahilas Tuhan ma manusiyaꞌ supaya sigām tabistana abontol, minsan landuꞌ aheka paldusahan bay tahinang sigām. 17 Hatina, in manusiyaꞌ kamemon kapagbayaꞌan na paꞌin eꞌ kamatay ma sabab dusa aꞌa dangan, malaingkan in kamatay itu mbal makaꞌatu ma kabontolan atay ya pamuwan eꞌ Tuhan ma sasuku anaimaꞌ aseꞌna maka lasana. Ya kamaujuranna, sasuku makataimaꞌ kasi-lasa itu tahinang saliꞌ sultan makapagbayaꞌ ma dusa, sabab min aꞌa dakayuꞌ, ya si Isa Al-Masi.
18 Ya hatulanna, dakayuꞌ du dusa tahinang eꞌ dangan aꞌa, jari hukuman Tuhan ya kamattihanna ma saga aꞌa kamemon. Damikiyanna, dakayuꞌ du hinang abontol tahinang eꞌ aꞌa dangan, jari kabontolan maka kallum kakkal ma aꞌa kamemon ya kamattihanna. 19 Dakayuꞌ du aꞌa bay anaggaꞌ panohoꞌan Tuhan, ati aheka tabowa angandusa ma sabab iya ya panunuran. Damikiyanna isab ma damuli itu, dakayuꞌ du aꞌa bay ameyaꞌ ma panohoꞌan Tuhan, ya si Isa Al-Masi, ati aheka tahinang abontol ma bistahan Tuhan labay min si Isa heꞌ.
20 Na, pagka dusahan asal saga manusiyaꞌ, aniyaꞌ saraꞌ bay pinatꞌnnaꞌ eꞌ Tuhan boꞌ supaya kakꞌnnopan kalanggal saraꞌ sigām. Saguwāꞌ minsan buwattingga kosog dusa manusiyaꞌ, palabi lagiꞌ lasa maka aseꞌ Tuhan ma sigām. 21 Jari in binangsa manusiyaꞌ kamemon bay kapagbayaꞌan asal eꞌ dusa sigām, ati kamatay ya kamattihanna. Saguwāꞌ kapagbayaꞌan na kitam eꞌ lasa maka aseꞌ Tuhan, ati kallum kakkal ya kamattihantam, sasuku kitam tabista abontol eꞌ Tuhan ma sabab bay kahinangan si Isa Al-Masi Panghūꞌtam.