3
Tuhan ya Kapangandolan
1 Kalu aniyaꞌ atilaw, yuk-i, “Na bang buwattēꞌ, halam bahāꞌ aniyaꞌ kasōngan kami bangsa Yahudi? Maka addat kami pagislam halam aniyaꞌ kapūsanna?” 2 Buwattitu panambungku ma aꞌa inān: tantu aheya kasōngan bangsa Yahudi. Muna-muna, pangandol ma sigām ya dī palman Tuhan.
3 Kalu aniyaꞌ anilaw, yuk-i, “Painay Yahudi kaseheꞌan ya mbal angandol ma Tuhan? Taluwaꞌ bahāꞌ bang yukta in Tuhan mbal kapangandolan ma sabab manusiyaꞌ mbal angandol?” 4 Tantu mbal. Minsan magputing kamemon manusiyaꞌ, mbal magputing Tuhan. Buwat bay tasulat ma deyom Kitab, ya yuk-i,
“Mattan in kaꞌadilannu min ai-ai pamissalanu.
Angandaꞌug sadja ka bang ma paghuhukuman.”
5 Aniyaꞌ giꞌ anganjawab, yuk-i, “Tantu atampal toꞌongan kaꞌadilan Tuhan sabab katā pagbiddaꞌanna maka manusiyaꞌ ya nggaꞌi ka aꞌadil. Jari ai pamikilta bang buwattēꞌ? Asāꞌ bahāꞌ hinang Tuhan bang pagmulkaꞌanna dusatam?” 6 Tantu mbal. Abontol pangamulkaꞌ Tuhan, patut iya amatꞌnnaꞌ hukuman ma binangsa manusiyaꞌ.
7 Aniyaꞌ giꞌ isab anganjawab, yuk-i, “Bang aku saupama magputing, boꞌ minnēꞌ kasakupan du in Tuhan bꞌnnal toꞌongan angkan subay minahaldikaꞌ, angay aku subay pinatꞌnnaꞌan hukuman dusa? 8 Gom giꞌ kita magdusa, sabab minnēꞌ aniyaꞌ pangamahaldikaꞌ ma Tuhan.” Asāꞌ panganjawab eꞌ, sagōꞌ aniyaꞌ saga aꞌa bay anunaꞌan aku in aku konoꞌ bay amitnahan aꞌa subay angandusa paheka boꞌ supaya paheya kamahaldikaꞌan Tuhan. Putingan asal panunaꞌ heꞌ. Saga aꞌa inān tōp pinataluwaꞌan hukuman Tuhan.
Dusahan Manusiyaꞌ Kamemon
9 Na, ahāp bahāꞌ kahālanta bangsa Yahudi itu min bangsa kaseheꞌ? Nggaꞌi ka. Bay na kam pataꞌuku in bangsa kamemon, Yahudi maka nggaꞌi ka, kapagbayaꞌan saliꞌ-saliꞌ eꞌ paldusahan sigām, 10 buwat bay tasulat ma deyom Kitab, ya yuk-i,
“Halam aniyaꞌ manusiyaꞌ abontol ma pangꞌndaꞌ Tuhan.
11 Halam aniyaꞌ pangitaꞌu sigām pasal Tuhan,
halam aniyaꞌ atuyuꞌ angisbat iya.
12 Magsihaꞌan aꞌa kamemon min kabontolan,
halam aniyaꞌ kagunahan sigām.
Halam aniyaꞌ minsan dangan maghinang ahāp.
13 Bowaꞌ sigām saliꞌ dalil kubul halam katambunan,
hal paluwasan bissala pangakkal.
Sapantun sigām sowa sabab makamula bowaꞌ sigām.
14 Anuknaꞌ na paꞌin sigām, sabab landuꞌ abꞌnsi.
15 Tagihan sigām anganjuri, kabintanan sigām amapatay.
16 Kabiyaksahan sigām amakaꞌat, amasukkal.
17 Mbal sigām ataꞌu angahāp atawa amapagsulut.
18 Halam aniyaꞌ pagmatāw sigām tudju ni Tuhan.”
19 Kataꞌuwanta asal, ai-ai panohoꞌan ma deyom saraꞌ inān bay pinatꞌnnaꞌan saga aꞌa ya ma deyoꞌan saraꞌ, supaya halam aniyaꞌ makapangandaꞌawa bang katōngan dusa. Manjari tabowa manusiyaꞌ kamemon pinatꞌnnaꞌan hukuman eꞌ Tuhan. 20 Sabab halam toꞌongan aniyaꞌ manusiyaꞌ binista abontol eꞌ Tuhan ma sabab pameyaꞌna ma panohoꞌan saraꞌ. Saguwāꞌ saraꞌ Tuhan ya poꞌonanna angkan tataꞌutam in kitam dusahan.
Pasal Kapangampun Tuhan ma Manusiyaꞌ
21 Saguwāꞌ ma buwattinaꞌan pinataꞌu kita bang buwattingga kapangampun Tuhan ma dusa manusiyaꞌ, boꞌ supaya sigām tabista eꞌna abontol minsan nggaꞌi ka min pamogbog saraꞌ. Tasulat asal ma deyom Kitab Tawrat maka Kitab Jabul pasal maksud Tuhan itu, 22 hatina sai-sai angandol ma si Isa Al-Masi, minsan ai bangsa, niampun dusana ati abontol iya ma bistahan Tuhan. Halam aniyaꞌ kapagbiddaꞌan manusiyaꞌ, 23 sabab makarusa sigām saliꞌ-saliꞌ ati halam aniyaꞌ makaꞌabut ni kaꞌadilan Tuhan. 24 Malaingkan pinaꞌndaꞌan eꞌ Tuhan lasana maka aseꞌna ni manusiyaꞌ minsan halam aniyaꞌ tongodna. Ati tahinang sigām abontol ma bistahanna, saliꞌ halam bay makarusa, ma sabab kapangalꞌkkat sigām min hukuman dusa eꞌ si Isa Al-Masi. 25 Bay pinalahil si Isa eꞌ Tuhan boꞌ supaya amabuꞌus lahaꞌna pangampun dusa manusiyaꞌ, sasuku angandol ma iya. Buwattēꞌ hinang Tuhan pamaꞌndaꞌna kabontolanna, sabab halam bay inayna karusahan manusiyaꞌ ma waktu palabay, hal bay sabalanna. 26 Taꞌndaꞌ isab kabontol Tuhan ma buwattinaꞌan, sabab aniyaꞌ na taluwaꞌ hukuman ma sabab dusa manusiyaꞌ. Minnēꞌ magmattan in Tuhan abontol toꞌongan, maka sasuku angandol ma si Isa abontol isab ma pangꞌndaꞌ Tuhan.
27 Jari bang buwattēꞌ kahinangan Tuhan ma kitam, mbal na kita makapagabbu pasal ai-ai bay hinangta. Kalu-kalu bang bay kita binista abontol ma sabab kapamogbogta ma saraꞌ, sagōꞌ nggaꞌi ka. Subay min pangandolta sadja ya angkan kita binista abontol eꞌ Tuhan. 28 Atampal du, ya poꞌon manusiyaꞌ tabista abontol eꞌ Tuhan, min pangandolna sadja, nggaꞌi ka min pamogbogna ma saraꞌ. 29 Araiꞌ pangannalbi in Tuhan itu pagtuhanan eꞌ bangsa Yahudi sadja, sagōꞌ nggaꞌi ka. Pagtuhanan iya sampay eꞌ bangsa nggaꞌi ka Yahudi, 30 sabab dakayuꞌ du Tuhan. Bangsa Yahudi maka bangsa kaseheꞌ, saliꞌ-saliꞌ du sigām binista abontol eꞌ Tuhan, sasuku sigām angandol ma si Isa. 31 Kalu yukbi in saraꞌ Tuhan inān subay tinimanan pagka aniyaꞌ na pangandolta ma si Isa. Sagōꞌ mbal isāb, sabab bang si Isa ya pangandolanta, gom paꞌin isbatta saraꞌ Tuhan.