2
Hukuman Tuhan ma Manusiyaꞌ
1 Angkanna kam mbal makaraꞌawa, sasuku kam anoway pagkahibi ma sabab alaꞌat hinangna. Yukbi in sigām patut pinatꞌnnaꞌan hukuman, sagōꞌ amatꞌnnaꞌan kam di-bi hukuman sabab ya du kaꞌam maghinang kalaꞌatan. Hatina, bang kam anoway kaseheꞌanbi, saliꞌ kaꞌam baranbi ya sinoway. 2 Kataꞌuwanta asal, abontol hukuman Tuhan ya pamatꞌnnaꞌna ma sasuku maghinang ginisan laꞌat bay sambatku heꞌ. 3 Kumpasbi bahāꞌ in kaꞌam makapuwas min hukuman Tuhan, boꞌ paꞌin masi maghinang kalaꞌatan ya panowaybi seheꞌbi? 4 Maꞌaseꞌ Tuhan ma kaꞌam, angkan kam halam pinatꞌnnaꞌan hukuman saruꞌun-duꞌun, sagōꞌ halam tapaheyabi ma atay in kahāpanna, maka kaꞌaseꞌna, maka kalunuk pangatayanna. Ya sadja kabayaꞌanna in kaꞌam subay pataikut sampay angꞌbba min dusabi. 5 Sagōꞌ atuwas kam, mbal bilahi apinda min dusabi. Angkanna paruhun kabinasahan ma kaꞌam bang taꞌabut llaw pamatuwaꞌ eꞌ Tuhan astolna maka hukumanna abontol. 6 Sabab in manusiyaꞌ kamemon tinungbasan du eꞌ Tuhan pakaniya-pakaniya, pinapagtongod maka ai-ai bay hinang sigām ma dunya. 7 Aniyaꞌ manusiyaꞌ kaseheꞌ atukid maghinang ahāp sabab sanglit maka hulmat min Tuhan ya niangut eꞌna, maka kallum kakkal. Ya pamuwan Tuhan ma aꞌa buwattēꞌ kallum taptap ni kasaumulan. 8 Aniyaꞌ isab aꞌa kabintanan magpalanga di-na min kaseheꞌanna. Sinulak eꞌ sigām kasabꞌnnalan ati ameyaꞌ ma kalaꞌatan. Tantu pinatꞌkkahan mulkaꞌ Tuhan saga aꞌa buwattēꞌ. 9 Sasuku biyaksa maghinang alaꞌat taluwaꞌ du katiksaꞌan maka kabinasahan, bangsa Yahudi boꞌ yampa bangsa kaseheꞌ. 10 Saguwāꞌ sasuku maghinang ahāp sinanglitan du eꞌ Tuhan, binuwanan kahulmatan maka kasannangan atay, bangsa Yahudi boꞌ yampa isab bangsa kaseheꞌ, 11 sabab Tuhan mbal amapagbiddaꞌ ma manusiyaꞌ. Saliꞌ-saliꞌ sigām ma pangꞌndaꞌna minsan ai bangsa.
12 Saga bangsa kaseheꞌ, ya halam bay kapatꞌnnaꞌan saraꞌ si Musa, amutawan du min Tuhan minsan halam aniyaꞌ saraꞌ pangalanggalan sigām. Maka bangsa Yahudi isab, taluwaꞌ sigām hukuman ma buwat panohoꞌan saraꞌ si Musa. 13 Sabab nggaꞌi ka min kakaleta ma saraꞌ si Musa ya angkan kita abontol ma pangꞌndaꞌ Tuhan, saguwāꞌ min kapameyaꞌta ma panohoꞌanna. 14 Halam aniyaꞌ saraꞌ si Musa ma saga aꞌa ya nggaꞌi ka Yahudi, sagōꞌ bang sigām angahinang kahāpan luwas min deyom atay sigām, hatina tabeyaꞌ eꞌ sigām saraꞌ Tuhan. 15 Aniyaꞌ tandaꞌ saksiꞌ in panohoꞌan saraꞌ patꞌnnaꞌ asal ma deyom itikad sigām, jari minnēꞌ aniyaꞌ pangitaꞌu sigām pasal hinang ya patut nihinang maka mbal. 16 Manjari bang taꞌabut llaw damuli, ya llaw pangahukum Tuhan ma manusiyaꞌ labay min si Isa Al-Masi, tinanding eꞌna ai-ai bay katapukan ma deyom pamikil, ati minnēꞌ sigām nihukum. Buwattēꞌ isab ma lapal ahāp ya pagnasihatku.
Bangsa Yahudi maka Pamogbog Saraꞌ
17 Na kaꞌam saga Yahudi, ya pasangdol ma saraꞌ-panohoꞌan min si Musa boꞌ supaya kam tinaimaꞌ eꞌ Tuhan. Tuhan isab ya pagmalangkahianbi ni aꞌa kaseheꞌan. 18 Kataꞌuwanbi bang ai pangahandak Tuhan ma kaꞌam, maka bang ai ya wajib hinangbi ma sabab saraꞌ si Musa ya pangadjiꞌanbi. 19 Pangannalbi in kaꞌam tōp magmalim ma aꞌa buta, ya halam pangadjiꞌna. Yukbi in kaꞌam saliꞌ sawa pamasawa akkal aꞌa kaseheꞌ, ya ma deyom kalendoman. 20 Pangannalbi isab in kaꞌam jukup ma akkal maka ma pangitaꞌu sabab ilu saraꞌ ma kaꞌam, angkan yukbi in kaꞌam ataꞌu amaguru ma aꞌa mbal ataꞌu, amituwa isab ma saga aꞌa aꞌawam. 21 Ataꞌu kam amanduꞌ ma aꞌa kaseheꞌan, angay kam mbal amanduꞌan di-bi? Bandaꞌanbi aꞌa kaseheꞌ subay mbal anangkaw, boꞌ kaꞌam ya anangkaw du! 22 Pamanduꞌbi subay mbal angaliyu-lakad ma nggaꞌi ka pagholaꞌna, boꞌ kaꞌam ya labi magdꞌnda. Asammal konoꞌ ma pangꞌndaꞌbi bang aꞌa anumba taꞌu-taꞌu, boꞌ paꞌin kaꞌam ya angagaw ai-ai ahalgaꞌ min lumaꞌ pagsusumbahan taꞌu-taꞌu inān! 23 Magabbu-abbu kam in kaꞌam kabuwanan saraꞌ Tuhan, sagōꞌ kaꞌam ya amuwan kamaruhan ma Tuhan pagka halam beyaꞌbi panohoꞌanna. 24 Buwat bay tasulat ma deyom Kitab, ya yuk-i, “Kaꞌam saga Yahudi ya sababna angkan Tuhan pinahꞌllingan pangkal eꞌ bangsa kaseheꞌan.”
25 In kitam Yahudi sinōꞌ niꞌislam tandaꞌ saksiꞌ in kitam aꞌa sukuꞌ Tuhan. Saguwāꞌ bang kam maglalanggal saraꞌ, saliꞌ halam aniyaꞌ pūs ma pagislambi. Ahāp lagiꞌ kam halam bay niꞌislam. 26 Bang takdil ni aꞌa nggaꞌi ka Yahudi, aꞌa halam bay niꞌislam, abila sigām ameyaꞌ ma panohoꞌan saraꞌ, binista sigām eꞌ Tuhan sukuꞌna saliꞌ du maka aꞌa bay niꞌislam. 27 Manjari kaꞌam saga Yahudi katōngan dusa eꞌ bangsa kaseheꞌ inān, minsan kam kaniyaꞌan Kitab Tawrat. Katōngan kam dusa sabab kaꞌam ya angalanggal saraꞌ minsan bay niꞌislam, sagōꞌ sigām ya angisbat saraꞌ minsan halam bay niꞌislam.
28 Ya dī Yahudi nggaꞌi ka aꞌa ya amogbogan addat maka usulan Yahudi, ya taga-bainat pagislam isab ma baranna. 29 Ya taluwaꞌ niōnan Yahudi toꞌongan bang aꞌa taga-bainat ma deyom pangatayanna. Hinang Rū Tuhan koꞌ itu, nggaꞌi ka min pamogbogna ma saraꞌ. Aꞌa inān mbal sinanglitan eꞌ pagkahina manusiyaꞌ bang buwattēꞌ kapagyahudina, sagōꞌ sinanglitan iya eꞌ Tuhan.