RŌM
1
Sulat si Paul ni Saga Aꞌa ma Daꞌira
RŌM
1 Sulat itu deyoꞌ min aku, si Paul, pinasampay ni kaꞌam ma daꞌira Rōm. Aku itu dakayuꞌ sosohoꞌan si Isa Al-Masi. Tapeneꞌ aku eꞌ Tuhan, kawakilan eꞌna magnasihat lapalna ahāp. 2 Lapal ahāp itu bay panganjanjiꞌ eꞌ Tuhan ma masa awal. Bay pinalatun eꞌna ma saga nabi, ati sinulat eꞌ sigām ma deyom Kitab. 3 Si Isa anak Tuhan ya pinagbissala ma lapal ahāp itu. Bang takdil ni kapagaꞌana, tubuꞌ iya min sultan Daꞌud. 4 Bang takdil ni kajarihanna maka palnyawahanna, asussi iya luwas bay min Rū Sussi, maka manyatakan isab in iya bꞌnnal Anak Tuhan ma sabab kosog kawasa Tuhan ya bay pamakallum iya min kamatay. Si Isa Almasi Panghūꞌtam koꞌ itu. 5 Iya ya palsababan angkan aku kabuwanan kapatut eꞌ Tuhan ati kawakilan magnasihat boꞌ supaya aniyaꞌ saga aꞌa min bangsa kamemon tabowa eꞌku magsabꞌnnal maka ameyaꞌ ma si Isa. 6 Ya du kaꞌam maglahat ma daꞌira Rōm ilu, tapeneꞌ du isab kam eꞌ Tuhan boꞌ pasukuꞌ ma si Isa Al-Masi.
7 Amabeyaꞌ aku sulat itu ni kaꞌam kamemon mailu ma Rōm, aꞌa kinalasahan eꞌ Tuhan maka pineneꞌ eꞌna boꞌ kam manjari aꞌana. Mura-murahan, bang paꞌin kam kaniyaꞌan tatabangan maka kasannangan atay eꞌ Mmaꞌtam Tuhan maka eꞌ si Isa Al-Masi Panghūꞌtam.
Magsukul si Paul ni Tuhan ma Sabab saga Aꞌa Rōm
8 Tagnaꞌanku na bissalaku ma kaꞌam: magsukul aku ni Tuhan labay min si Isa Al-Masi, maka magsukul aku ma pasalanbi kamemon sabab abantug na pangandolbi sampay ma kaluhaꞌan dunya. 9 Saksiꞌku Tuhan ya paghinanganku min deyom atay pagka aku magnasihat lapal ahāp pasal Anakna. Taentomku kam sakahabaꞌ 10 waktu kapangarapku ni Tuhan. Amuꞌku isab ni iya bang paꞌin aku kinahandakan eꞌna supaya makaluhaya piꞌilu patibaw ni kaꞌam ma waktu itu. 11 Landuꞌ toꞌongan aku bilahi magꞌndaꞌ maka kaꞌam sabab aniyaꞌ kahāpan min Rū Tuhan bowahanku kaꞌam, supaya angahogot imanbi tudju ni Tuhan. 12 Saguwāꞌ bang aku makamailu ma kaꞌam, magkalasigan kitam saliꞌ-saliꞌ, kaꞌam ma sabab pangandolku, aku isab ma sabab pangandolbi.
13 Saga dauranakanku, kabayaꞌanku subay kam mbal aꞌawam ma pasalanku. Min heka na aku bay agaraꞌ anibaw kaꞌam, saguwāꞌ aniyaꞌ na paꞌin makabimbang, ya poꞌon aku halam bay makalanjal. Ya maksudku piꞌilu, subay aniyaꞌ paluntungan min pagnasihatku, hatina aniyaꞌ aꞌa tabowaku magsabꞌnnal ma si Isa, buwat bay kapamowaku ma bangsa kaseheꞌ ya nggaꞌi ka isab Yahudi. 14 Sabab aniyaꞌ hinang bay pamaꞌatas ma aku, ya poꞌon aku subay magnasihat lapal ahāp ma aꞌa kamemon minsan ai bangsa, bangsa Girīk ka atawa bangsa saddī, aꞌa taga-pangadjiꞌ ka atawa halam aniyaꞌ pangadjiꞌna. 15 Angkan aku atuyuꞌ toꞌongan magnasihat lapal ahāp itu sampay ma kaꞌam ya maglahat mailu ma daꞌira Rōm.
16 Mbal aku aiyaꞌ magnasihat lapal ahāp itu sabab aniyaꞌ barakatna min Tuhan pamapuwas aꞌa kamemon min hukuman dusa, bangsa Yahudi dahū boꞌ yampa bangsa kaseheꞌ, ya sasuku magsabꞌnnal ma lapal itu. 17 Lapal ahāp itu amahatian kitam bang buwattingga pamabontol Tuhan ma kitam manusiyaꞌ. Subay kitam angandol sadja, min tagnaꞌanna sampay ni katapusanna, buwat bay tasulat ma deyom Kitab, ya yuk-i, “Sai-sai angandol ma Tuhan, boꞌ tabista eꞌna abontol, allum du iya.”
Bangsa Manusiyaꞌ Taga-dusa Kamemon
18 In mulkaꞌ Tuhan pinabukis na min deyom sulgaꞌ, pinatꞌkkahan saga manusiyaꞌ ma sabab ya nihinang eꞌ sigām ma halam aniyaꞌ pagmatāw ma Tuhan. Katambunan eꞌ sigām in pangitaꞌu bꞌnnal. 19 Patut sigām minulkaꞌan sabab manyatakan asal kajarihan Tuhan, sabab baran Tuhan ya bay amataꞌuwan sigām. Tuꞌud sigām mbal bilahi amꞌnnal. 20 Sangay min waktu bay pamapanjari dunya itu eꞌ Tuhan atampal asal palantarana, minsan iya mbal taꞌndaꞌ eꞌ manusiyaꞌ. Atampal in iya taga-kawasa taptap ni kasaumulan. Atampal isab in iya Tuhan, takilā asal min kamemon ai-ai bay papanjarina. Manjari halam aniyaꞌ aꞌa makaraꞌawa in iya aꞌawam pasal Tuhan.
21 Makataꞌu asal sigām ma pasal Tuhan, in iya patut pagtuhanan, saguwāꞌ mbal sigām bilahi angamahaltabat iya atawa angōn Tuhan ma iya. Mbal sigām minsan magsarang-sukul. Ya pinikil na paꞌin eꞌ sigām pikilan halam aniyaꞌ kagunahanna, ati alendom akkal sigām kabowa karupangan ya tahinang sigām. 22 Maglaku-laku sigām in sigām taga-pangitaꞌu sagōꞌ magkarupangan sadja. 23 Arapun sigām amudji Tuhan ya taptap allum, saguwāꞌ ya pinudji eꞌ sigām saga taꞌu-taꞌu pinaka luwa manusiyaꞌ ya magkamatay. Pinudji isab eꞌ sigām taꞌu-taꞌu luwa hayop, luwa manuk-manuk, luwa ai-ai maglelehan ma kuwit tanaꞌ.
24 Angkanna manusiyaꞌ itu pinasagaran eꞌ Tuhan magdūl-bayaꞌ ma kasabulan ai-ai kinanapsuhan eꞌ sigām. Magkahinangan na paꞌin sigām kalumuꞌan dapagkahian. 25 Sinulak eꞌ sigām bissala bꞌnnal pasal Tuhan ati pineneꞌ eꞌ sigām bissala puting. Ya sinumba eꞌ sigām saga ai-ai bay pinapanjari eꞌ Tuhan, sagōꞌ Tuhan ya mbal sinanglitan minsan iya ya Magpapanjari angkan patut subay pinudji sampay ni kasaumulan. Amin.
26 Pagka buwattēꞌ kahinangan manusiyaꞌ, pinasagaran sigām eꞌ Tuhan magpangandūlan napsu sigām makatamparasa. Angꞌbba karꞌndahan min addat sigām karꞌndahan boꞌ magkabayaꞌ maka pagkahi dꞌnda maghinang alaꞌat. 27 Damikiyanna isab kalꞌllahan, mbal bilahi ma dꞌnda sagōꞌ magkabayaꞌ maka pagkahi sigām lꞌlla. Magbeyaꞌ sigām maghinang kasabulan, angkan sigām pinatꞌkkahan laꞌat pinapagtongod maka kalaꞌatan ya bay tahinang sigām.
28 Na, pagka bangsa manusiyaꞌ itu mbal bilahi angisbat pangitaꞌu bꞌnnal pasal Tuhan, pinasagaran sigām eꞌna magpikil karupangan, ati nihinang eꞌ sigām ya mbal manjari nihinang. 29 Apꞌnnoꞌ panahuꞌan sigām eꞌ kalaꞌatan maka dusa kaginisan, hawa napsu maka kajahilan. Makalanduꞌ heka kalaꞌatan ma deyom pangatayan sigām, buwat saga angalindi, amonoꞌ pagkahi sigām manusiyaꞌ, angalugat, angulliꞌ, anganjahulakaꞌ, amalatun bissala alaꞌat, 30 angalimut isab sigām ma kaseheꞌan sigām. Abꞌnsi saga aꞌa buwattēꞌ ma Tuhan. Ajingki sigām ma pagkahi sigām, alanga toꞌongan atay sigām maka magabbu-abbu na paꞌin. Ya sadja pinikil eꞌ sigām bang buwattingga kasōng hinang sigām alaꞌat-i. Agagga sigām ma pamiꞌat mattoꞌa 31 maka alaꞌat pamikil sigām. Mbal sigām kapangandolan, mbal alasa atawa maꞌaseꞌ ma pagkahi sigām, mbal tabowa magkahāp. 32 Makataꞌu saga manusiyaꞌ itu abontol asal pangahandak Tuhan ma pasal aꞌa maghinang saga dusa itu, in sigām subay pinapatay. Sagōꞌ minsan buwattēꞌ, luhūy sigām maghinang kalaꞌatan maka kinōgan gom paꞌin bang aniyaꞌ aꞌa kaseheꞌ makasaliꞌ ni sigām.