27
Si Paul Palintas ni Daꞌira Rōm
1 Tagaraꞌ paꞌin in kami subay pinatulak ni Itali, si Paul maka saga pilisu kaseheꞌ bay pinajagahan ma si Juliyus, dakayuꞌ kapitan ma saga sundalu Rōm. Magnakuraꞌ iya ma dambaꞌan sundalu niōnan ‘Baꞌanan sundalu Sultan Mahatinggi’. 2 Paruwaꞌ kami ni dakayuꞌ kappal min lahat Aramittu, maraiꞌ na atulak ni saga lahat paghapit-hapitan ma bihing lahat Asiya. Manjari akꞌtta na kami min Kesareya heꞌ. Ameyaꞌ isab ma kami si Aristarkus aꞌa Makidunya min daꞌira Tessaloneka.
3 Pagkꞌllat paꞌin llaw dakayuꞌ, pahapit kami ni Sidun. Kinahāpan si Paul eꞌ si Juliyus. Pinabaꞌid iya anibaw saga bagayna ma lahat Sidun eꞌ, boꞌ iya tatabang eꞌ sigām ma ai-ai kakulanganna. 4 Makalanjal paꞌin kami minnēꞌ, anusulan kami min limbu pūꞌ Kiprus sabab anaggaꞌ baliyu. 5 Puwas eꞌ palintas kami ni dambilaꞌ sꞌllang, min dilaut Silisi maka Pampiliya, boꞌ yampa kami makatandan ni Mira, dakayuꞌ kauman ma lahat Likiya. 6 Aniyaꞌ kappal taꞌndaꞌ eꞌ kapitan mahēꞌ, kappal min daꞌira Iskandari song atulak palanjal ni Itali. Jari pinariyataꞌ kami eꞌna pinaꞌan boꞌ atulak na. 7 Agon kami mbal pasōng ma deyom daka pilambahangi. Kahunitan kami tumandan ni kauman Kinidus. Manjari itu, pagka alandos baliyu, mbal kami makasangsang angkan kami palabay min limbu pūꞌ Kerete, min dilaut tōng Salmone. 8 Anusul-nusul kami min bihing deya, maka kahunitan kami isab makatꞌkka ni loꞌok, ya niōnan Parungguꞌan Asalamat. Asekot-sekot isab inān ni daꞌira Laseya.
9 Pagka atꞌggol-tꞌggol kami mainaꞌan, mbal na kami makalanjal sabab piligdu. Palabay na waktu pagpuwasa ati timpu pamaliyu lagiꞌ. Ginaraꞌan saga aꞌa inān eꞌ si Paul, yukna, 10 “Saga tuwan, ma pandogahanku, bang kitam gantaꞌ palanjal minnitu, asiya-siya kitam. Piligdu, magkaꞌat kappal itu maka duwaꞌanna, maka aniyaꞌ isab amatay.” 11 Sagōꞌ kapitan saga sundalu heꞌ, tabowa magkahagad ma bissala nakuraꞌ kappal maka tag-dapu. Jari halam sigām bay ameyaꞌ ma garaꞌ si Paul. 12 Ya parungguꞌan inān mbal ahāp paglihanan bang saltaꞌ timpu pamaliyu, angkan kahekaꞌan saga aꞌa inān bilahi akꞌtta minnēꞌ tudju ni lahat Pinik, bang paꞌin mura-murahan makatandan, ati boꞌ pinalabay timpu pamaliyu mainaꞌan. Pinik heꞌ dakayuꞌ parungguꞌan ahāp ma pūꞌ Kerete, patampal ni hilagaꞌ maka satan.
Baliyu Alandos ma Dilaut
13 Manjari itu, pagka aniyaꞌ baliyu satan mbal sakit akosog, kinabāꞌ eꞌ saga aꞌa inān ahāp na tinawakkalan bay kagaraꞌan sigām. Angkan nihellaꞌ na sau boꞌ yampa kami anusul min bihing pūꞌ Kerete. 14 Sagōꞌ mbal giꞌ atꞌggol patumbuk na baliyu min deya, baliyu habagat. 15 Jari katumbukan kami eꞌ baliyu. Mbal na tasaggaꞌ kami baliyu heꞌ, angkan kami pabīng mundaꞌ ati hal kami magpatūt laꞌa. 16 Makalabay paꞌin kami min limbu Kauda, pūꞌ-pūꞌ arikiꞌ, yampa kami makabaggot buti-buti bay tundanan eꞌ, sagōꞌ kahunitan giꞌ kami. 17 Taruwaꞌ paꞌin buti-buti eꞌ sigām ni diyataꞌ kappal, magtūy binaggot baran kappal maka kꞌllat boꞌ mbal pasisa tapiꞌna. Puwas eꞌ, pagka sigām tināw binowa pasanglad ni katꞌbbahan asekot pehēꞌ ni Libiya, pinahagmak leha eꞌ sigām. Manjari kappal eꞌ pinasagaran eꞌ sigām tabowa eꞌ baliyu. 18 Abinasa kami sidda eꞌ goyak angkanna pagkꞌllat llaw dakayuꞌ, anagnaꞌ sigām animanan saga duwaꞌan kaseheꞌ. 19 Taꞌabut paꞌin katꞌllumbahangina, tinimanan eꞌ sigām kapanyapan kappal takapin. 20 Daka pilambahangi kami halam bay makaꞌndaꞌ mata llaw atawa bituꞌun. Halam isab aniyaꞌ kahondongan baliyu. Angkan kami mbal na magniyat lappasan.
21 Sakali itu, pagka atꞌggol saga aꞌa inān halam bay makakakan, anꞌngge si Paul ma tꞌngngaꞌ sigām amissala. “Saga bagay,” yukna, “arapun bay beyaꞌbi kagaraꞌan daꞌa subay atulak min pūꞌ Kerete. Bang bay aku beyaꞌbi mbal kitam bay magkaꞌat maka halam aniyaꞌ ai-ai alungay. 22 Sagōꞌ buwattinaꞌan sohoꞌta kam paiman, sabab halam du aniyaꞌ min kaꞌam amatay. Luwal du kappal itu magkaꞌat. 23 Sabab dibuhiꞌ,” yuk si Paul, “aniyaꞌ bay panyataꞌ ni aku dakayuꞌ malaꞌikat min Tuhan ya asal pagtaꞌatanku. Aku itu palsukuꞌanna asal. 24 Yuk malaꞌikat ni aku, ‘Paul, daꞌa ka tināw. Subay ka paharap ni Sultan Mahatinggi. Pinakallum du isab saga seheꞌnu ma kappal itu, ma sabab kahāp Tuhan ma kaꞌa!’ 25 Angkan, saga bagay,” yuk si Paul, “subay kam aiman. Sabab angandol aku ma Tuhan in bay pamissalana ma aku maujud du. 26 Sagōꞌ tabowa du kitam eꞌ baliyu paragsaꞌ ni dakayuꞌ pūꞌ.”
27 Manjari itu, taꞌabut paꞌin sangpūꞌ maka mpat bahangi min katagnaꞌ badju inān, tapepe na paꞌin kami eꞌ baliyu ma olangan sꞌllang Adriya. Sōng-sōng paꞌin tongaꞌ bahangi, tapandoga eꞌ saga aꞌa kappal inān in kami asekot na ni bihing lahat. 28 Angkan tinꞌkkad deyoꞌ inān boꞌ kinataꞌuwan bang pila lalomna. Jari tꞌkkaranna heꞌ aniyaꞌ saga duwampūꞌ dꞌppa. Mbal atꞌggol tinꞌkkad pabīng, ati sangpūꞌ laꞌa maka limandꞌppa. 29 Tināw sigām tabowa paragsaꞌ ni kabatuhan, angkan sigām angahūg mpat sau min buliꞌ kappal boꞌ yampa sigām aminta-minta bang paꞌin alꞌkkas pakꞌllat llaw. 30 Saga aꞌa maghinang ma kappal inān bay pasulay alahi. Magbauꞌ-bauꞌ sigām angahūg saga sau min mundaꞌ kappal, sagōꞌ inaꞌan sigām bay anontonan buti-buti tudju ni tahik. 31 Sagōꞌ ahꞌlling si Paul ni kapitan maka ni saga sundalu, yukna, “Bang saga aꞌa inān mbal patꞌttog ma kappal, magmula du kam!” 32 Angkan kinꞌttob eꞌ saga sundalu lubid bay panonton buti-buti. Hal pinalꞌbbos ni tahik.
33 Apoteꞌ paꞌin sobangan, nilogos sigām kamemon eꞌ si Paul, sinōꞌ amangan. Yukna, “Kasangpūꞌ na maka mpat bahangi llaw itu ya pagsusabi. Halam kam bay makatimtim ai-ai. 34 Angkan kam logosku subay amangan, boꞌ kam makatatas. Sabab minsan hal dalamba buꞌunbi mbal du magmula.” 35 Akatis paꞌin eꞌ si Paul ahꞌlling, angāꞌ iya tinapay ati boꞌ pinagsukulan eꞌna ni Tuhan ma alopan sigām kamemon. Puwas eꞌ pinagpōng eꞌna tinapay boꞌ iya amangan. 36 Jari itu pahogot atay sigām ati amangan sigām kamemon. 37 Aniyaꞌ kami duwa hatus maka pitumpūꞌ maka nnom aꞌa bay ma diyataꞌ kappal eꞌ. 38 Makaꞌssohan paꞌin sigām, tinimanan eꞌ sigām ni tahik saga buwas tirigu ya ma deyom mohang, boꞌ supaya palantung kappal inān.
Magkaꞌat Kappal
39 Pagꞌllaw paꞌin halam takilā eꞌ saga aꞌa kappal bang pūꞌ ai ya pataꞌndaꞌ inān, sagōꞌ aniyaꞌ taꞌndaꞌ eꞌ sigām loꞌok taga-gusung ma bihing. Ya paggaraꞌ sigām, bang makajari, pinasanglad kappal pinaꞌan ni gusung. 40 Angkan kinehet eꞌ sigām engkot saga sau, niꞌbbahan ma deyom tahik. Nihubaran isab lubid bay pamaggot saga bansān. Puwas eꞌ pinatꞌngge eꞌ sigām leha-leha ma mundaꞌ boꞌ tabowa eꞌ baliyu patandan ni bihing. 41 Sagōꞌ makaragsaꞌ sigām ni kahanggalan. Amalut mundaꞌ kappal, mbal pajudjal, maka buliꞌna heꞌ abagbag eꞌ goyak.
42 Maggaraꞌ saga sundalu inān amapatay saga pilisu kamemon boꞌ supaya halam aniyaꞌ makalangi ni bihing alahi. 43 Sagōꞌ nakuraꞌ sigām inān mbal bilahi niꞌinay si Paul, angkan lāngna saga sundalu, sinōꞌ daꞌa angalanjalan eꞌ-i. Gom paꞌin sohoꞌna saga aꞌa inān, sasuku ataꞌu palangi, palaksu dahū ni deyom tahik boꞌ palangi kaleya. 44 Saga aꞌa kaseheꞌan sinōꞌ paturul, ameyaꞌ pagūng ma papan atawa ma kayu bay magkaꞌat ma kappal inān. Manjari tabuwattēꞌ kami kamemon, makatandan ni bihing, halam ainay.