28
Ma Pūꞌ Malta
1 Makatandan paꞌin kami ma halam aniyaꞌ baya-baya, aniyaꞌ angahakaꞌan kami in pūꞌ inān niōnan Malta. 2 Asidda kami kinahāpan eꞌ saga aꞌa Malta inān. Nirokotan eꞌ sigām api sabab anagnaꞌ na angulan maka ahaggut na, ati pinaꞌidda kami kamemon eꞌ sigām. 3 Si Paul inān bay animuk engas-engas pangayu, dapꞌkkosan. Ma sabuna paꞌin amatꞌnnaꞌ kayu inān ma api, aniyaꞌ sowa abisa paluwas sabab min pasuꞌna. Jari sowa inaꞌan pakeket ma tangan si Paul. 4 Pagꞌndaꞌ saga aꞌa Malta ma sowa inaꞌan pagantung ma tangan si Paul, magtūy sigām magupama dangan maka dangan, yuk-i, “Tantu aꞌa itu bay amapatay, sabab minsan iya bay makapuwas min deyom tahik, tuꞌud mbal katangguhan kadalna.” 5 Sagōꞌ sowa inān hal pinessekan eꞌ si Paul tudju ni deyom api ma halam ainay. 6 Angagad-ngagad na paꞌin saga aꞌa Malta inān kalu angꞌtting tangan si Paul, atawa amatay saruꞌun-duꞌun. Sagōꞌ atꞌggol-tꞌggol paꞌin eꞌ sigām angagad, boꞌ halam aniyaꞌ laꞌat tumꞌkka ni baran si Paul, apinda pikilan sigām. Yuk sigām, “Dakayuꞌ tuhan koꞌ aꞌa itu!”
7 Na, aniyaꞌ ma kasekotan inaꞌan saga huma si Publiyus, ya datuꞌ ma pūꞌ inān. Binowa kami ni humana ati sinagina kami eꞌna pahāp-hāp. Pinaꞌidda kami eꞌna ma deyom tꞌllumbahangi. 8 Inaꞌan asal mmaꞌ si Publiyus palege sabab apasuꞌ iya, maka magsungiꞌ-sungiꞌ. Pasōd si Paul ni deyom bilikna boꞌ angamuꞌ-ngamuꞌ ni Tuhan ma pasalna. Pinatꞌnnaꞌ isab tangan si Paul ni baran mattoꞌa heꞌ, magtūy iya kauliꞌan. 9 Pagka buwattēꞌ, pinaꞌan na isab ni si Paul sasuku taga-saki ma pūꞌ inān, ati kauliꞌan du isab sigām. 10 Aheka bay pamuwan eꞌ saga aꞌa inān pangahulmat kami, ati song paꞌin kami atulak, niruwaꞌ eꞌ sigām ni kappal ai-ai kagunahan kami palutuꞌ.
Pagtulak ni Rōm
11 Aniyaꞌ kami tꞌllumbulan ma pūꞌ Malta inān boꞌ yampa kami akꞌtta minnēꞌ. Ya pameyaꞌan kami kappal min Iskandari bay palihan ma pūꞌ inān tꞌggol bay timpu pamaliyu. 12 Atꞌkka kami ni daꞌira Sirakus, ati tꞌllumbahangi ya kahantiꞌ kami mainaꞌan 13 boꞌ yampa kami palaus minnēꞌ tudju ni lahat Rigiyum. Pagꞌllaw dakayuꞌ, baliyu satan na ati duwambahangi boꞌ kami atꞌkka ni kauman Putiuli. 14 Aniyaꞌ tabāk kami saga bebeyaꞌan si Isa mainaꞌan. Sinōꞌ kami paokom ma sigām saga dapituꞌ. Puwas eꞌ palaus kami amaklay ni daꞌira Rōm. 15 Takale paꞌin eꞌ saga bebeyaꞌan si Isa ma Rōm in kami atꞌkka na, magtūy sigām bay paꞌabut ni tiyanggi Appiyus maka ni kauman Tꞌllu-Kadday anampang kami. Pagꞌndaꞌ si Paul ma sigām, magsukul iya ni Tuhan ati pahogot atayna pabīng. 16 Makatꞌkka paꞌin kami ni daꞌira Rōm, pinabaꞌid si Paul maglumaꞌan di-na. Aniyaꞌ dakayuꞌ sundalu anganjagahan iya.
Si Paul Magnasihat ma Daꞌira Rōm
17 Palabay paꞌin tꞌllumbahangi, nilinganan eꞌ si Paul saga kanakuraꞌan Yahudi ya maglahat mainaꞌan, sinōꞌ patimuk. Atimuk paꞌin, yuk si Paul ni sigām, “Saga dauranakanku, halam aniyaꞌ dusaku ma pagkahiku Yahudi, maka halam aniyaꞌ palsaggaꞌanku ma pangaddatan kaꞌmboꞌantam. Sagōꞌ minsan buwattēꞌ, bay aku sinaggaw sampay pinakalabusu eꞌ saga Yahudi ma Awrusalam, boꞌ sinōngan eꞌ sigām ni pangꞌntanan bangsa Rōm. 18 Bay aku sinumariya eꞌ saga bagꞌllal Rōm. Jari bilahi na sigām amalꞌppa aku sabab halam aniyaꞌ tapiha eꞌ sigām sababan pamapatayan aku. 19 Sagōꞌ mbal toꞌongan amarūl saga Yahudi heꞌ bang aku gantaꞌ pinalꞌppa, angkan halam aniyaꞌ tahimangkanku saddī min mikitukbal ni Sultan Mahatinggi ma Rōm itu. Saguwāꞌ, minsan buwattēꞌ, halam aniyaꞌ panuntutku ma saga pagkahiku Yahudi. 20 Angkan kam bay amuꞌku piꞌitu boꞌ kitam magꞌndaꞌ maka magbissala, supaya kataꞌuwanbi bang ai ya maksudku. Itiyaꞌ aku niengkotan maka kilikili ma sabab pameyaꞌku ma aꞌa dakayuꞌ-kayuꞌ ya holattam bangsa Israꞌil.”
21 Yuk saga aꞌa magtimukan inān ni si Paul, “Halam kami bay makasambut sulat min lahat Yahudiya ma pasalannu. Halam isab aniyaꞌ saga danakantam Yahudi bay piꞌitu minnēꞌ amowa haka atawa tuhuma alaꞌat bang ma sababannu. 22 Sagōꞌ bilahi kami akale bang ai kapamꞌnnalannu. Sabab kataꞌuwan kami, ya panduꞌ pameyaꞌannu ilu binissalahan na paꞌin alaꞌat eꞌ saga aꞌa ma sabarang lahat.”
23 Manjari itu, maggaraꞌ sigām maka si Paul bang sumiyan pamissalana ma sigām. Taꞌabut paꞌin llawna, aheka sigām bay pinaꞌan ni lumaꞌ pahantiꞌan si Paul eꞌ. Min subu-subu sampay ni kasangoman pinahatian sigām eꞌ si Paul maka ninasihatan pasal kapagparinta Tuhan. Tinōꞌan sigām bang ai bay tasulat ma deyom Saraꞌ si Musa maka ma Kitab Kanabi-nabihan, boꞌ sigām kamattanan sampay tabowa magkahagad ma si Isa. 24 Aniyaꞌ min sigām tabowa magkahagad ma bissalana, maka aniyaꞌ halam. 25 Minnēꞌ aniyaꞌ pagsuꞌal sigām. Ma song paꞌin sigām amoleꞌ, aniyaꞌ giꞌ bissala si Paul ma sigām, yukna, “Atumlang na bay pangallam Rū Sussi, ya bay pinalatun eꞌ nabi Isaya ni saga kaꞌmboꞌ-mboꞌanbi. 26 Sabab ya itu bay yukna,
‘Pehēꞌ na ka ni bangsa itu boꞌ sigām hakaꞌin:
Asal kam pakale, sagōꞌ mbal tahatibi.
Asal kam papatong, sagōꞌ mbal tapanhidbi.
27 Sabab saga aꞌa itu hal magmatuwas.
Tainga sigām bay tinaplokan, mata sigām bay tinambunan.
Bang bay nggaꞌi ka buwattēꞌ, bay du taꞌndaꞌ eꞌ mata sigām,
bay takale eꞌ tainga sigām.
Bay du isab tahati eꞌ tawhid sigām,
ati pabalik sigām magtaꞌat ma aku,’ yuk Tuhan,
‘boꞌ yampa sigām bawiꞌku.’ ”
28 Tinambol eꞌ si Paul bissalana, yukna, “Angkan subay kataꞌuwanbi, in lapal Tuhan pasal kalappasna ma manusiyaꞌ pinasampay na ni saga kabangsahan ya nggaꞌi ka Yahudi. Sigām inān angikut du.” [ 29 Akatis paꞌin eꞌ si Paul amissala, magtūy alaꞌan saga Yahudi maka eꞌ sigām magjawab sidda.]