25
Angandaꞌawa si Paul ma Alopan Gubnul Pistus
1 Palabay paꞌin tꞌllungꞌllaw min katꞌkka si Pistus ni lahat paggubnulanna inān, patukad iya min Kesareya tudju ni Awrusalam. 2 Ma Awrusalam paꞌin, pinaꞌan ni iya saga kaimaman alanga maka saga nakuraꞌ bangsa Yahudi amowa saga tuntut sigām ma si Paul. Angamuꞌ sigām junjung ni si Pistus 3 bang paꞌin sohoꞌna si Paul pinapinda ni Awrusalam. Bay sigām asal magkaisunan angahapaꞌan iya ma labayan boꞌ pinapatay. 4 Sagōꞌ anambung si Pistus, yukna, “Inaꞌan si Paul tinahan ma Kesareya ma deyom kalabusu, maka song aku palūd pinaꞌan pabīng. 5 Paronganunbi ma aku ni Kesareya saga aꞌabi taga-kapatut. Tuntutinbi iya mainaꞌan bang aniyaꞌ bay tahinangna alaꞌat.”
6 Saga waluꞌ atawa sangpūꞌ bahangi ya katꞌnnaꞌ si Pistus ma sigām ma Awrusalam boꞌ yampa palūd ni Kesareya. Pagꞌllaw dakayuꞌ, aningkōꞌ iya ma bilik paghukuman boꞌ sohoꞌna si Paul pinasōd pinaꞌan. 7 Pagsōd paꞌin si Paul, pinagtimukan iya eꞌ saga Yahudi ya bay palūd min Awrusalam. Tinuntutan iya eꞌ sigām tuntut abuhat, sagōꞌ halam aniyaꞌ kamattanan sigām. 8 Manjari angandaꞌawahan di-na si Paul, yukna, “Halam aniyaꞌ bay tahinangku langgal saraꞌ ma bangsa kami Yahudi. Halam aniyaꞌ bay tahinangku kalaꞌatan tudju ni langgal pagkulbanan, atawa ni Sultan Mahatinggi bangsa Rōm.”
9 Sagōꞌ si Pistus, pagka kabayaꞌanna kinahāpan eꞌ saga Yahudi, atilaw ni si Paul, yukna, “Angahoꞌ ka bahāꞌ bang ka pinatukad pabīng ni Awrusalam, boꞌ ka hukumku mainaꞌan ma sabab saga tuntut ma kaꞌa itu?”
10 Yuk si Paul, “Itiyaꞌ aku anꞌngge ma paghukuman Sultan Mahatinggi. Wajib aku sinaraꞌ maitu. Kasakupannu asal, tuwan gubnul, halam aku bay makabuwan kalaꞌatan ma saga Yahudi. 11 Bang sabꞌnnal-bꞌnnal aku bay makalanggal saraꞌ, atawa bang aniyaꞌ bay tahinangku patut pamapatayan aku, maglillaꞌ du aku. Sagōꞌ bang nggaꞌi ka bꞌnnal ya panuntut eꞌ saga aꞌa itu ma aku, halam sai-na taga-kapatut angꞌndeꞌan aku ni pangꞌntanan sigām. Amuꞌku tinukbalan nihukum eꞌ Sultan Mahatinggi!”
12 Aubus paꞌin si Pistus bay makapagisun maka saga bagꞌllalna, sambunganna si Paul, yukna, “Pagka ka bilahi tinukbalan ni Sultan Mahatinggi, pinapehēꞌ na ka.”
Angaru si Pistus ma Sultan Agrippa
13 Atꞌggol-tꞌggol paꞌin minnēꞌ, atꞌkka pinaꞌan ni Kesareya sultan Agrippa maka danakanna dꞌnda si Bernike. Pinaꞌan sigām anibaw si Pistus, pagaddat sigām ma iya. 14 Mainaꞌan paꞌin sigām daka pilambahangi, pinahatian sultan eꞌ si Pistus pasal palkalaꞌ si Paul. Yuk si Pistus, “Aniyaꞌ maitu dakayuꞌ pilisu bay tinahan eꞌ si Pilik. 15 Pagpehēꞌku ni Awrusalam, bay aku kabowahan tuntut eꞌ saga kaimaman alanga maka saga pagmattoꞌahan Yahudi. Bay aku niamuꞌ eꞌ sigām amatꞌnnaꞌan iya hukuman.
16 “Sagōꞌ bay sigām hakaꞌanku, nggaꞌi ka addat kami bangsa Rōm anōngan sai-sai pinatꞌnnaꞌan hukuman bang halam giꞌ bay pinapagtampal dahū maka saga aꞌa bay anuntutan iya. Aniyaꞌ isab waktu kapangandaꞌawana dahū. 17 Angkan koꞌ, pagtꞌkka piꞌitu saga aꞌa anuntut eꞌ, halam aku bay amabiyal. Pagꞌllaw dakayuꞌ, bay aku aningkōꞌ magtūy ma bilik paghukuman, ati sohoꞌku si Paul itu binowa pareyom. 18 Jari anꞌngge saga aꞌa anuntutan iya. Pangannalku aniyaꞌ dusa aheya panuntutan sigām ma si Paul, sagōꞌ halam. 19 Ya palkalaꞌ sigām hal pagjawaban pasal agama sigām, maka pasal dakayuꞌ aꞌa amatay niōnan Isa. Pinagpaꞌin aꞌa inān eꞌ si Paul asal allum. 20 Na,” yuk si Pistus, “pagka mbal kataꞌuwanku bang buwattingga subay pamariksaꞌku ma saga palkalaꞌ buwattēꞌ, bay tilawku si Paul bang iya bilahi pinatukad ni Awrusalam boꞌ nihukum mahēꞌ. 21 Saguwāꞌ angamuꞌ iya pinatandan palkalaꞌna ni Sultan Mahatinggi ma Rōm boꞌ sinalassay mahēꞌ. Angkan iya sohoꞌku tinahan maitu pinajagahan sampay aniyaꞌ waktu pamasampay iya ni paghukuman Sultan Mahatinggi.”
22 Ahꞌlling si Agrippa ni si Pistus, “Bilahi aku akale ma aꞌa itu,” yukna.
“Takalebi du iya salung,” yuk si Pistus.
Si Paul Binowa Paharap ma Sultan Agrippa
23 Pagꞌllaw dakayuꞌ, atꞌkka pinaꞌan si Agrippa maka si Bernike. Angulinting sigā eꞌ pamulawan maka pamakay angillap, magmahaldikaꞌ toꞌongan hinabu sigā pasōd ni lumaꞌ mairan. Inaꞌan isab saga nakuraꞌ sundalu maka saga aꞌa bangsahan min lahat inaꞌan. Magpanohoꞌan si Pistus, ati binowa si Paul pareyom. 24 Ma deyom paꞌin, yuk si Pistus ni si Agrippa, “Tuwan Sultan, sampay kaꞌam kamemon makasabuhan kami! Itiyaꞌ taꞌndaꞌbi dakayuꞌ aꞌa ya bay tinuntutan ni aku eꞌ saga Yahudi kamemon, eꞌ saga Yahudi min lahat itu maka saga Yahudi min Awrusalam. Bay sigām angamahit sidda, in aꞌa itu konoꞌ subay pinapatay saruꞌun-duꞌun. 25 Sagōꞌ halam aniyaꞌ sababan tabākku pamapatayan iya. Jari, pagka iya bilahi tinukbalan ni Sultan Mahatinggi, aniyaꞌ niyatku amabeyaꞌ iya pehēꞌ. 26 Sagōꞌ halam aniyaꞌ tantu sababanna panulatanku ni Panghūꞌku Sultan,” yuk si Pistus. “Angkan iya bay bowaku paꞌalop ni kaꞌam, ya lagiꞌna bang ni kaꞌa, Sultan Agrippa. Ya angkan palkalaꞌ itu pinariksaꞌ pabalik, kalu aniyaꞌ tabākku sababan boꞌ sinulat pinabeyaꞌ ni Sultan Mahatinggi. 27 Sabab bang ma aku,” yukna, “mbal taluwaꞌ bang kita anukbalan pilisu ni saraꞌ alanga, boꞌ mbal tatugilaꞌ bang ai panuntut ma iya.”