24
Si Paul Tinuntutan eꞌ saga Yahudi
1 Makalabay paꞌin limambahangi, palūd na si Ananiyas Imam Muwallam ni Kesareya. Aniyaꞌ isab saga pagmattoꞌahan Yahudi magbeyaꞌ maka iya, maka dakayuꞌ abugaw niōnan si Tertullus. Paharap sigām itu ni gubnul supaya anuntutan si Paul. 2 Kalinganan paꞌin si Paul, tinagnaꞌan eꞌ si Tertullus panuntutna. Yukna, “Tuwan balbangsa! Asannang toꞌongan lahat kami ma sabab kahāp kapaggubnulnu. Ya bay kahālan kami alaꞌat tapahāpnu na, sabab ahāp asal pamatꞌnnaꞌnu. 3 Kaꞌamuhan kami ma tabangnu sakahabaꞌ waktu, maingga-maingga lahat, maka aheya pagsukul kami ni kaꞌa. 4 Sagōꞌ papuꞌutku giꞌ lapal itu boꞌ ka mbal sinumu,” yukna. “Ya amuꞌku junjung ni kaꞌa, kalehun aku daiꞌ-daiꞌ.
5 “Tapandoga kami in aꞌa itu asal panganjabu. Pinahiluhalaꞌ eꞌna bangsa kami Yahudi ma kaluhaꞌan dunya. In iya pagmakōkan ma umpigan Nasaret.a 6 Bay iya arak angalumuꞌan langgal pagkulbanan ma Awrusalam, angkan iya tasaggaw kami. Ya maksud kami in iya subay pinahukum ma buwat usulan saraꞌ kami, 7 sagōꞌ bay parumpās si Lisiyas nakuraꞌ sundalu inān angagaw iya min pangꞌntanan kami. 8 Puwas eꞌ bay sohoꞌna saga aꞌa anuntut piꞌitu patampal ni kaꞌa. Na, bang kaꞌa anumariya aꞌa itu, tataꞌunu du min iya bang ai sababan angkan kami anuntutan iya.” 9 Pauyun isab saga Yahudi heꞌ anuntutan si Paul. Yuk sigām in bay binissala eꞌ si Tertullus inān bꞌnnal sadja.
Pangandaꞌawa si Paul ma Alopan si Pilik
10 Manjari sininyalan si Paul eꞌ gubnul, sinōꞌ amissala. Yuk si Paul ni gubnul, “Kinōgan aku angandaꞌawahan di-ku ma alopannu, tuwan, sabab kataꞌuwanku atꞌggol na pamalꞌngngannu saraꞌnu ma bangsa kami itu. 11 Aluhay koꞌ itu pinariksaꞌ. Aniyaꞌ na sangpūꞌ maka duwangꞌllaw buwattinaꞌan, tuwan, bay aku patukad ni Awrusalam anambahayang. 12 Halam aku bay taꞌabut eꞌ saga Yahudi itu maglugat maka sai-na ma deyom langgal pagkulbanan. Halam aku bay taꞌabut amahiluhalaꞌ saga aꞌa, ai na ka ma deyom kalanggalan sigām, ai na ka ma kamainaꞌanan saddī ma jadjahan daꞌira Awrusalam. 13 Halam isab aniyaꞌ mattanna pamaluwas saga aꞌa itu palsaksiꞌan panuntut sigām ma aku. 14 Sagōꞌ, magsabꞌnnal aku, tuwan, Tuhan kapangkatan kami ya pagtaꞌatanku samantalaꞌ aku ameyaꞌ ma kalꞌngnganan si Isa, ya pinagōnan eꞌ sigām ‘umpigan pagokatan.’ Sagōꞌ kahagadku asal kamemon ya tasulat ma deyom saraꞌ si Musa maka ma deyom Kitab Kanabi-nabihan. 15 Saliꞌ du aku maka sigām aholat ma Tuhan in manusiyaꞌ kamemon, ahāp maka alaꞌat, pinakallum pabīng. 16 Angkan aku amanuyuꞌ toꞌongan bang paꞌin apoteꞌ atayku tudju ni Tuhan, sampay ni pagkahiku manusiyaꞌ.
17 “Manjari itu, pila-pilantahun kalikutanku min Awrusalam, bay aku pabīng pehēꞌ amowa sīn panarakkaku saga aꞌa bangsaku, sampay maghinang kulban ni Tuhan. 18 Na, ma sabu paꞌin aku maghinang eꞌ-i, bay aku taꞌabut eꞌ saga aꞌa itu ma deyom langgal pagkulbanan. Bahaꞌu bay talusku hinang pagsussi. Kulang isab aꞌa bay ma atagku inān maka halam aniyaꞌ bay lengog. 19 Sagōꞌ aniyaꞌ saga Yahudi min lahat Asiya bay mainaꞌan. Bang aniyaꞌ gantaꞌ panāꞌ saga aꞌa inān ma aku, arapun sigām maitu anuntutan aku. 20 Saguwāꞌ, pagka sigām halam maitu, pabissalahun na saga Awrusalam itu. Sōꞌun sigām angahaka bang dusa ai bay panuntutan aku, waktu kapanumariya aku eꞌ Tumpukan Maghuhukum heꞌ. 21 Sabab halam aku bay katōngan dusa, luwal bahāꞌ ya bay pangalinganku sabuku anꞌngge ma dahuan sigām, ya yukku, ‘Ya angkan aku hukumbi ma buwattinaꞌan, ma sabab kahagadku in aꞌa magpatayan pinakallum du pabīng’.” Minnēꞌ akatis daꞌawa si Paul.
22 Manjari pinahondong pagbissala inān eꞌ si Pilik sabab kasakupanna asal pasal kalꞌngnganan si Isa Al-Masi. Yuk si Pilik, “Subay na atꞌkka piꞌitu nakuraꞌ Lisiyas boꞌ yampa paluwasku hukumanku.” 23 Puwas eꞌ bay sohoꞌna dakayuꞌ kapitan inān anganjagahan si Paul ma mbal sakit asigpit katꞌnnaꞌanna. Saga bagayna subay pinarūl amowahan iya napakana.
24 Apuwas paꞌin daka pilambahangi, pinaꞌan si Pilik maka hꞌndana si Drusilla, dꞌnda Yahudi. Pinalinganan eꞌna pinaꞌan si Paul ati pakale iya ma pamissala si Paul pasal pangandol tudju ni si Isa Al-Masi 25 Amissala na paꞌin si Paul ma pasal aꞌa subay angahinang kabontolan maka subay amaggat ma napsuna alaꞌat. Binissala eꞌna isab hukuman ya pinatꞌkka eꞌ Tuhan ma saga manusiyaꞌ ma llaw sinōng. Pagkale si Pilik ma bissala si Paul itu, magtūy iya tināw ati yukna ma si Paul, “Makajari na ka alaꞌan. Lingananta paꞌin ka pabīng bang aku bilahi.” 26 Lāgi aholat si Pilik kalu kabuwanan sīn pagmamhuꞌ eꞌ si Paul, angkan si Paul araran pinalinganan eꞌna boꞌ magsuli-suli maka iya.
27 Makalabay paꞌin duwantahun, pagantiꞌ si Purkiyus Pistus min si Pilik maggubnul. Malaingkan bilahi kinahāpan si Pilik eꞌ saga Yahudi, angkan tahanna lagiꞌ si Paul ma deyom kalabusu.