23
1 Manjari amandang si Paul ma Tumpukan Maghuhukum inān. Yukna ma sigām, “Saga dauranakanku, abontol itikadku tudju ni Tuhan pasal bay kahinanganku, min tagnaꞌ sampay ni llaw ītu.” 2 Pagkale si Ananiyas, ya Imam Muwallam, ma bay pinaꞌin eꞌ si Paul eꞌ, sohoꞌna saga aꞌa ma atag si Paul anampak bowaꞌna. 3 Yuk si Paul ni si Ananiyas, “Bininasa du ka eꞌ Tuhan. Ahāp luwasannu sagōꞌ alaꞌat deyom ataynu! Ilu ka aningkōꞌ angahukum aku ma buwat usulan saraꞌ, sagōꞌ kaꞌa ya labi-labina angalanggal saraꞌ sabab sohoꞌnu aku sinampak!”
4 Ahꞌlling ni si Paul saga aꞌa ma atagna inān, yuk sigām, “Imam Muwallam ya pahinaꞌnu ilu, ya tapeneꞌ eꞌ Tuhan!”
5 Anambung si Paul, yukna, “Saga danakanku, halam kataꞌuwanku in iya Imam Muwallam. Sabab tasulat asal ma deyom Kitab, subay daꞌa pahꞌllingantam alaꞌat pagnakuraꞌan bangsatam.”
6 Manjari itu, pagga kinataꞌuwan eꞌ si Paul saga aꞌa ma Tumpukan inān abahagiꞌ duwa, kaseheꞌ sigām Saddusi, kaseheꞌ Parisi, angalingan iya patanog, yukna, “Saga danakan! Aku itu dakayuꞌ Parisi, maka Parisi isab saga mattoꞌaku. Itiyaꞌ aku nihukum maitu sabab angaholat aku in aꞌa magpatayan pinakallum pabalik min kamatay.” 7 Pagubus, anagnaꞌ na magsuꞌal saga Parisi maka saga Saddusi inān, angkan sigām abahagiꞌ duwa. 8 Angkan buwattēꞌ, in saga Saddusi magpaꞌin halam aniyaꞌ pinakallum pabīng min kamatay, maka halam aniyaꞌ malaꞌikat atawa umagad. Sagōꞌ saga Parisi magkahagad pasal eꞌ-i kamemon.
9 Jari pasōng kasensongan mainaꞌan, maka aniyaꞌ saga guru saraꞌ anꞌngge, aꞌa ameyaꞌ ma kalꞌngnganan saga Parisi. Tinoꞌongan jawab sigām, yuk-i, “Halam aniyaꞌ laꞌat tabāk kami ma aꞌa itu! Kalu bꞌnnal, aniyaꞌ umagad atawa malaꞌikat bay ahꞌlling ni iya.” 10 Manjari karuhunan gom paꞌin kasensongan inān, angkan tināw nakuraꞌ sundalu kalu pinagsꞌkkat pagdayaw baran si Paul eꞌ saga aꞌa mainaꞌan. Manjari sohoꞌna saga sundaluna pareyoꞌ pehēꞌ angagaw si Paul boꞌ binowa ni deyom kutaꞌ pabīng.
11 Sangom inān panyataꞌ Panghūꞌ Isa ni si Paul anꞌngge ma bihingna. Yukna, “Paiman ka! Bay aku kasaksiꞌannu maitu ma Awrusalam. Subay aku kasaksiꞌannu du isab ma daꞌira Rōm.”
Magisun saga Yahudi Amapatay si Paul
12 Pagkꞌllat llaw paꞌin, aniyaꞌ saga Yahudi magisun. Magsapahan sigām di-sigām subay mbal amangan atawa anginum satꞌggol mbal tapapatay si Paul. 13 Labi sigām mpatpūꞌ puhuꞌ bay magisun eꞌ. 14 Manjari pehēꞌ sigām ni saga imam alanga maka pagmattoꞌahan, amataꞌu. Yuk sigām, “Bay na kami magsapa in kami mbal manjari animtim kinakan ai-ai, satꞌggol mbal tapapatay kami si Paul eꞌ. 15 Angkanna, kaꞌam maka saga Maghuhukum subay amabeyaꞌ lapal ni nakuraꞌ sundalu anambukuhan iya amowa si Paul piꞌilu ni kaꞌam. Subay kam magbauꞌ-bauꞌ in kaꞌam bilahi amariksaꞌ pahāp-hāp pasal palkalaꞌna heꞌ. Jari kami itu asakap du amapatay iya ma labayan, ma halam giꞌ makasampay piꞌilu.”
16 Daipara aniyaꞌ kamanakan si Paul lꞌlla, anak danakanna dꞌnda, bay makakale pasal pagisun eꞌ. Angkan iya pehēꞌ ni deyom kutaꞌ angahakaꞌan si Paul. 17 Jari nilinganan eꞌ si Paul dakayuꞌ tininti, boꞌ ahꞌlling ni iya, yukna, “Bowahun subul itu ni nakuraꞌnu, sabab aniyaꞌ pangahakana.” 18 Binowa na iya eꞌ tininti tudju ni nakuraꞌna.
Yuk tininti, “Bay aku nilinganan eꞌ si Paul, ya pilisu inān, mikipabowa subul itu ni kaꞌa sabab aniyaꞌ konoꞌ pangahakana.”
19 Manjari niambit subul inān eꞌ nakuraꞌ, binowa pasaddī min kaseheꞌan boꞌ yampa tilawna. “Ai hakanu ma aku?” yukna.
20 Anambung subul heꞌ, yukna, “Bay magisun saga nakuraꞌ Yahudi. Pagsalung konoꞌ, niamuꞌ ka eꞌ sigām amowa si Paul patampal ni Tumpukan Maghuhukum, bahasa iya pinariksaꞌ pabīng. 21 Sagōꞌ daꞌa asipun saga nakuraꞌ inān, sabab aniyaꞌ labi mpatpūꞌ aꞌa anapukan di-sigām ma bihing lān boꞌ tinipu si Paul. Bay na sigām magsapahan di-sigām mbal amangan atawa anginum satꞌggol mbal tapapatay sigām si Paul. Asakap na sigām, luwal laꞌa pangiddanu ya nilagaran.”
22 Yuk nakuraꞌ ni iya, “Daꞌa ka ahꞌlling ni sai-sai in aku bay hakaꞌannu pasal itu-i.” Puwas eꞌ pinabaꞌid na subul heꞌ.
Tinandanan si Paul ni Gubnul Pilik
23 Jari itu nilinganan eꞌ nakuraꞌ duwa tinintina. Yukna ni sigām, “Tipununbi duwa hatus sundalu, sōꞌunbi magsakap pehēꞌ ni Kesareya. Paronganunbi isab pitumpūꞌ sundalu magpanguraꞌ maka duwa hatus sundalu magpamowa budjak. Subay sigām atulak lisag siyam sangom ilu. 24 Sakapunbi isab saga kuraꞌ panguraꞌan si Paul, ati tandaninbi iya pinaꞌan ni gubnul Pilik ma halam aniyaꞌ baya-bayana.”
25 Jari aniyaꞌ sulat pinabeyaꞌ eꞌ nakuraꞌ ni gubnul. Yuk lapal sulat eꞌ,
26 “Sulat itu min aku, si Klaudi Lisiyas, pinasampay ni kaꞌa Pilik, ya gubnul balbangsa. 27 Tuwan gubnul, aꞌa itu bay sinaggaw eꞌ saga Yahudi, arak pinapatay. Sagōꞌ pagtaꞌuku paꞌin in iya aꞌa Rōm, magtūy aku pehēꞌ maka saga sundaluku anabang iya. 28 Ya kabayaꞌanku subay anaꞌu bang ai panuntut sigām ma iya, angkan iya bay bowaku patampal ni paghukuman sigām bangsa Yahudi. 29 Mahēꞌ paꞌin aku, tasayu na in palkalaꞌ panuntutan sigām ma iya, palkalaꞌ pasal usulan saraꞌ sigām. Halam aniyaꞌ bay tahinangna pamapatayan iya atawa pamakalabusuhan iya. 30 Manjari tapataꞌu aku aniyaꞌ kaisunan saga Yahudi amapatay iya. Angkan iya sohoꞌku tinandanan magtūy ni kaꞌa. Maka saga aꞌa anuntutan iya, bay sohoꞌku piꞌilu ni kaꞌa boꞌ takalenu bang ai panuntut sigām. Ya du ilu. Wassalam.”
31 Manjari ningāꞌ na si Paul eꞌ saga sundalu buwat bay panohoꞌan ma sigām. Taꞌabut kauman Antipatri eꞌ sigām sangom inān. 32 Pagkꞌllat llaw dakayuꞌ, pabīng ni kutaꞌ saga sundalu bay magpamaklay heꞌ, ati pinabowa si Paul ma saga sundalu magpanguraꞌ. 33 Makasampay sigām ni daꞌira Kesareya, ati nindeꞌan eꞌ sigām ni gubnul, sulat bay min nakuraꞌ sigām. Tinukbalan isab si Paul ni iya. 34 Binassa sulat eꞌ gubnul boꞌ yampa tilawna si Paul bang min lahat ingga iya. Tataꞌu paꞌin in si Paul min lahat Silisi, 35 yuk gubnul ni iya, “Subay na atꞌkka saga aꞌa manuntutan kaꞌa boꞌ yampa takale palkalaꞌnu.” Manjari magpanohoꞌan iya in si Paul sinōꞌ nijagahan ma deyom astanaꞌ gubnul eꞌ.