22
1 “Saga mattoꞌa-danakan,” yuk si Paul, “kalehunbi daꞌawaku.”
2 Pagkale sigām bahasa Hibrani ya pamissalana, pahantap sigām boꞌ akale pahāp. Jari buwattitu ya pamissalana ma sigām, yukna, 3 “Aku itu aꞌa Yahudi. Bay aku nianakan mahēꞌ ma daꞌira Tarsus, ma lahat Silisi, sagōꞌ sulig aku maitu ma Awrusalam. Bay aku magguru ma si Gamaliyal, maka bay aku kapanduꞌan pahāp ma saraꞌ bay pameyaꞌan kaꞌmboꞌ-mboꞌantam. Bay aku amanuyuꞌ maghinang ni Tuhan, buwat kapanuyuꞌbi kamemon ilu ma buwattinaꞌan. 4 Bay pinjalaꞌku saga aꞌa ameyaꞌ ma kalꞌngnganan si Isa boꞌ supaya sigām pinapatay. Bay sigām saggawku lꞌlla maka dꞌnda boꞌ niꞌisi ni deyom kalabusu. 5 Makasaksiꞌ Imam Muwallam maka saga palhimpunan mattoꞌa kamemon in bissalaku itu bꞌnnal sadja. Bay aku pinaniyaꞌan eꞌ sigām sulat pamapatut, sulat ni saga danakanta Yahudi mahēꞌ ma Damaskus. Angkan aku bay pehēꞌ ni Damaskus boꞌ tasaggawku saga bebeyaꞌan si Isa mahēꞌ. Pinilisu sigām, binowa ni Awrusalam itu boꞌ bininasa.”
6 “Jari itu,” yuk si Paul, “saga ugtu llaw, asekot paꞌin aku ni Damaskus, pataghaꞌ sadja aniyaꞌ sawa min deyom sulgaꞌ anahaya ma sakalibutku. 7 Pahantak aku ni tanaꞌ ati aniyaꞌ takaleku suwala ahꞌlling ni aku, yukna, ‘Saul, O Saul! Angay aku pinjalaꞌnu?’
8 “Agsai tilawku. ‘Sai sa kaꞌa ilu, nakuraꞌ?’ yukku.
“Yuk sambungna, ‘Aku aꞌa Nasaret, ya pinjalaꞌnu na paꞌin.’
9 “Na, saga seheꞌku heꞌ,” yuk si Paul, “bay makaꞌndaꞌ sawa itu sagōꞌ halam tahati eꞌ sigām bang ai pamahꞌlling ma aku eꞌ suwala inān. 10 Tilawku isab, ‘Ai subay hinangku, Nakuraꞌ?’
“Yuk Panghūꞌ inān ni aku, ‘Anꞌngge ka, boꞌ ka palanjal pehēꞌ ni Damaskus. Nihakaꞌan du ka mahēꞌ kamemon ya pamahinang Tuhan ma kaꞌa.’ 11 Manjari abuta aku eꞌ silaw sawa heꞌ, angkan aku bay niambit eꞌ saga seheꞌku pehēꞌ ni Damaskus.
12 “Mahēꞌ paꞌin ma Damaskus aniyaꞌ dakayuꞌ aꞌa niōnan si Ananiyas. Aꞌa iya magaꞌagama ameyaꞌ ma saraꞌtam, maka pinagaddatan iya eꞌ saga Yahudi kamemon ma daꞌira inān. 13 Bay pehēꞌ si Ananiyas anꞌngge ma atagku. Yukna, ‘Saul, magdanakan kita. Makaꞌndaꞌ na ka pabīng.’ Saruꞌun-duꞌun du aku makaꞌndaꞌ,” yuk si Paul, “ati taꞌndaꞌku si Ananiyas eꞌ. 14 Yukna, ‘Saul, tapeneꞌ ka eꞌ Tuhan ya asal pagtuhanan kaꞌmboꞌ-mboꞌantam, boꞌ tataꞌunu bang ai kabayaꞌanna. Tapeneꞌ ka eꞌna boꞌ supaya taꞌndaꞌnu Sosohoꞌanna Adil, maka boꞌ takalenu isab suwalana amissala. 15 Anaksiꞌ du ka pasal si Isa. Angahaka isab ka ma aꞌa kamemon pasal ai-ai bay taꞌndaꞌnu maka takalenu. 16 Na, daꞌa na ka ananggu,’ yuk si Ananiyas ni aku. ‘Anꞌngge ka boꞌ ka pinandi, tandaꞌ in kaꞌa ma si Isa na. Sabbutun ōn Panghūꞌ Isa boꞌ ka asussi min paldusahannu.’ ”
17 “Manjari itu,” yuk si Paul, “bay aku pabīng ni Awrusalam itu. Sabuku anambahayang ma deyom langgal pagkulbanan aniyaꞌ panyataꞌ ni aku. 18 Taꞌndaꞌku Panghūꞌ Isa amissala ni aku. Yukna, ‘Paraiꞌ-daiꞌ ka alaꞌan min Awrusalam itu sabab mbal du kinahagad eꞌ saga aꞌa maitu ya panaksiꞌnu ma pasal aku.’
19 “ ‘Tuwan Panghūꞌ’, yukku, ‘kinataꞌuwan asal eꞌ saga aꞌa itu in aku bay angalatag saga kalanggalan Yahudi boꞌ tasaggawku maka tabinasaku sasuku angandol ma kaꞌa. 20 Ma waktu kapamapatay saga aꞌa ma si Esteban, ya saksiꞌnu heꞌ, bay aku mahēꞌ angahoꞌan hinang sigām. Bay aku pamatauꞌan sꞌmmek saga aꞌa bay amapatay iya.’
21 “Sagōꞌ anohoꞌ giꞌ Panghūꞌ Isa ma aku, yukna, ‘Alaꞌan na ka minnitu, sabab papehēꞌta ka ni katāhan, ni kabangsa-bangsahan nggaꞌi ka Yahudi.’ ”
Si Paul dī Aꞌa Rōm
22 Akale toꞌongan saga aꞌa inān ma si Paul sampay tabissalana inaꞌan-i, sagōꞌ taꞌabut paꞌin sinibahat eꞌna kabangsahan nggaꞌi ka Yahudi, magtūy sigām anagnaꞌ angamahit pakosog. Yuk sigām, “Papatayunbi aꞌa ilu! Mbal iya manjari pinakallum.”
23 Inaꞌan sigām maggasud na paꞌin, anganjabjaban na paꞌin badjuꞌ sigām, maka eꞌ sigām anabulakan bagunbun tudju pariyataꞌ. 24 Manjari magpanohoꞌan nakuraꞌ ma saga sundaluna amowa si Paul ni deyom kutaꞌ. Sinōꞌ iya niraplosan maka sinumariya boꞌ tataꞌu bang angay angkan maggasud saga Yahudi heꞌ. 25 Kaengkotan paꞌin si Paul, song paꞌin niraplosan, atilaw iya ni tininti ya anꞌngge mainaꞌan, yukna, “Patut bahāꞌ daplosanbi aꞌa Rōm ma halam giꞌ bay pinalabay min saraꞌ?”
26 Pagkale paꞌin itu-i eꞌ tininti, pehēꞌ iya ni nakuraꞌ atilaw. Yukna, “Ai maksudnu ma aꞌa itu? Aꞌa Rōm koꞌ iya!”
27 Angkan pehēꞌ nakuraꞌ ni si Paul. Yukna, “Hakaꞌin aku, aꞌa Rōm ka bahāꞌ?”
“Ahoꞌ,” yuk si Paul.
28 Yuk nakuraꞌ, “Aku itu, aheka sīn bay pamayadku boꞌ aku manjari aꞌa Rōm.”
“Sagōꞌ aku,” yuk si Paul, “aꞌa Rōm asal min kapaganak ma aku.”
29 Takale paꞌin eꞌ-i, magtūy pasebog saga aꞌa bay arak amariksaꞌ si Paul. Sampay nakuraꞌ, tināw isab pagtaꞌuna in si Paul aꞌa Rōm. Sabab iya ya bay magbaran anohoꞌ niengkotan si Paul maka kili-kili.
Si Paul Pinatandan ni Tumpukan Maghuhukum
30 Jari bilahi mikihaka nakuraꞌ sundalu heꞌ bang ai toꞌongan panuntut si Paul eꞌ saga Yahudi. Angkanna, pagkꞌllat llaw dakayuꞌ, bay sohoꞌna nilaꞌanan engkot si Paul. Bay sohoꞌna isab magsakaum saga kaimaman alanga maka kamemon saga aꞌa min Tumpukan Maghuhukum. Ati pinatampal si Paul ni sigām.