21
Patukad si Paul ni Awrusalam
1 Makapagꞌbba paꞌin kami maka saga aꞌa Epesos eꞌ, akꞌtta kami boꞌ patūy ni Kōs. Pagꞌllaw dakayuꞌ, patandan kami ni Rodos, boꞌ palanjal minnēꞌ tudju ni Patara. 2 Ma Patara paꞌin, tasabu kami kappal song atulak ni Piniki. Manjari paruwaꞌ kami ati atulak kami minnēꞌ. 3 Pagꞌndaꞌ kami pūꞌ Kiprus min katāhan, palabay kami min bihingna tampal kowan boꞌ makatudju ni kalahatan Siriya. Tumandan kami ni lahat Tira ati pareyoꞌ kami mainaꞌan, sabab aniyaꞌ duwaꞌan kappal nihawas. 4 Pagka aniyaꞌ tabāk kami mainaꞌan saga bebeyaꞌan si Isa, pahantiꞌ kami ma sigām dapituꞌ. Bay sigām kabuwanan pangitaꞌu eꞌ Rū Tuhan angkan sigām anohoꞌ si Paul daꞌa subay pehēꞌ ni Awrusalam. 5 Sagōꞌ taꞌabut paꞌin llaw katulak kami minnēꞌ, sineheꞌan kami eꞌ sigām kamemon magtautaiꞌanak paluwas min daꞌira heꞌ. Angōk-tuꞌut kami kamemon ma bihing tampe angamuꞌ-ngamuꞌ ni Tuhan. 6 Aubus paꞌin kami bay magꞌbba maka sigām, paruwaꞌ na kami ni kappal, ati in sigām amoleꞌ na ni lumaꞌ sigām.
7 Manjari palanjal kami min lahat Tira boꞌ paleha tudju ni Tolemas. Pagtꞌkka kami ni Tolemas, pinagaddatan kami eꞌ saga bebeyaꞌan si Isa mainaꞌan ati mainaꞌan kami ma sigām dambahangi. 8 Pagꞌllaw dakayuꞌ atulak na isab kami minnēꞌ ati makatandan kami ni Kesareya. Mainaꞌan paꞌin, magtūy kami pahantiꞌ ma lumaꞌ si Pilip, aꞌa magnanasihat lapal ahāp pasal si Isa. Si Pilip itu dakayuꞌ aꞌa ma deyom pituꞌ ya bay ginꞌllal ma Awrusalam ma waktu palabay. 9 Aniyaꞌ mpat anakna budjang amaluwas lapal Tuhan. 10 Mainaꞌan paꞌin kami daka pilambahangi, aniyaꞌ aꞌa atꞌkka pinaꞌan min lahat Yahudiya, ōnna si Agabus. Aꞌa iya amaluwas lapal Tuhan. 11 Jari pasekot iya ni kami angāꞌ sintoron si Paul, boꞌ yampa angengkotan di-na tapeꞌ-tangan. Amissala si Agabus eꞌ, yukna, “Ya itu palman min Rū Sussi: ya tag-dapu sintoron itu niengkotan du isab buwattitu eꞌ saga Yahudi ma Awrusalam, ati sinōngan ni pangꞌntanan bangsa saddī.”
12 Pagkale paꞌin kami bissala si Agabus eꞌ, magtūy kami maka saga aꞌa kaseheꞌan inān anganjunjung ni si Paul, daꞌa sinōꞌ palanjal ni Awrusalam. 13 Sagōꞌ anambung si Paul, yukna, “Angay kam magtangis ilu? Daꞌa pahansulunbi atayku. Lillaꞌ du aku, nggaꞌi ka hal niengkotan, sagōꞌ minsan isab aku pinapatay mahēꞌ ma Awrusalam, bang paꞌin ma sabab ōn Panghūꞌ Isa.” 14 Pagka mbal palogos si Paul, na pahali kami anganjunjung. Yuk kami, “Bang paꞌin bayaꞌ-bayaꞌ Tuhan.”
15 Atꞌggol-tꞌggol paꞌin kamahēꞌ kami ma Kesareya, magmomos na kami boꞌ palanjal tudju ni Awrusalam. 16 Aniyaꞌ isab saga bebeyaꞌan si Isa min Kesareya bay parongan ma kami. Jari binowa kami eꞌ sigām ni lumaꞌ si Manason, paokoman kami. Si Manason itu aꞌa Kiprus, mulid si Isa asal bay min katagnaꞌ.
Tinibaw si Yakub eꞌ si Paul
17 Manjari itu, pagtꞌkka kami ni Awrusalam, sinagina kami pahāp eꞌ saga danakan mahēꞌ. 18 Pagkꞌllat llaw paꞌin, magbeyaꞌ kami maka si Paul anibaw si Yakub. Inaꞌan isab pahadil saga pagmattoꞌahan kamemon. 19 Aubus paꞌin si Paul bay magaddatan sigām, nihakaꞌan sigām eꞌna kamemon bay pinahinang ma iya eꞌ Tuhan ma deyom kabangsahan nggaꞌi ka Yahudi.
20 Pagkale itu, magtūy sigām ananglitan Tuhan. Yuk sigām ni si Paul, “Bagay Paul, kataꞌuwannu na. Ma ibu-ibuhan na saga bangsatam Yahudi angandol ma si Isa, aꞌa amogbog lullun ma saraꞌ si Musa. 21 Bay na sigām kahakaꞌan pasal kaꞌa-i amanduꞌan kamemon saga Yahudi ya patꞌnnaꞌ ma kalahatan bangsa saddī, in sigām makajari angꞌbbahan saraꞌ si Musa. Yuknu konoꞌ ni sigām mbal na subay magislam saga anak sigām, maka mbal na subay tinurul pangaddatan bangsa Yahudi. 22 Na buwattinggatam na boꞌ ka mbal sinaggaw? Sabab tantu, takale na eꞌ sigām in kaꞌa atꞌkka na. 23 Ahāp bang beyaꞌnu garaꞌ kami itu,” yuk saga mattoꞌa inān. “Aniyaꞌ maitu mpat aꞌa song anuhul bay najal sigām ni Tuhan. 24 Ameyaꞌ giꞌ ka ma sigām ni langgal pagkulbanan, ati palamud ka maghinang addat Yahudi pagsussi. Subay atasannu gastu pagkulban sigām boꞌ sigām makabagongan kōk sigām. Jari bang hinangnu buwattēꞌ, kinataꞌuwan du eꞌ aꞌa kamemon in bay panuhuma kaꞌa mbal bꞌnnal, maka barannu amogbog du ma saraꞌ si Musa. 25 Na, ya pasalan saga aꞌa min bangsa saddī magpangandol ma si Isa, bay na sigām pabeyaꞌan kami sulat sinōꞌ daꞌa amangan ai-ai bay paglamas ni saga taꞌu-taꞌu ya pagtuhanan aꞌa, daꞌa amangan lahaꞌ atawa hayop bay pinꞌkkol, maka daꞌa isab maghinang kalaꞌatan dꞌnda maka lꞌlla.”
26 Manjari binowa eꞌ si Paul mpat aꞌa inān, ati pagꞌllaw dakayuꞌ magbeyaꞌ sigām maghinang saga addat Yahudi pagsussi. Puwas eꞌ pasōd si Paul ni deyom langgal pagkulbanan angahakaꞌan saga imam eꞌ bang sumiyan atangbus timpu pagsussi sigām, maka bang sumiyan waktu panukbal pagkulban ni Tuhan eꞌ sigām pakaniya-pakaniya.
Si Paul Sinaggaw ma Langgal Pagkulbanan
27 Sōng paꞌin atangbus pitumbahangi pagsussi sigām, aniyaꞌ saga Yahudi bay min Asiya makaꞌndaꞌ si Paul ma deyom langgal pagkulbanan. Magtūy pinapaglengog eꞌ sigām kahekaꞌan aꞌa inān ati binalutan si Paul. 28 Angalingan sigām pakosog, yuk-i, “Oy! Kaꞌam saga aꞌa Israꞌil! Anabang kam ba! Ya na koꞌ itu aꞌa angalatag kalahat-lahatan amanduꞌan aꞌa kamemon. Sinaggaꞌ eꞌna bangsatam maka saraꞌ si Musa, maka langgal pagkulbanan itu. Lāgi, itiyaꞌ na isab bay bowana saga aꞌa nggaꞌi ka Yahudi ni deyom langgal. Alumuꞌ eꞌna pamudjihantam sussi itu!” 29 Angkan buwattēꞌ pagpaꞌin sigām sabab aniyaꞌ bay seheꞌ si Paul taꞌndaꞌ eꞌ saga Yahudi inān magbeyaꞌ maka iya ma deyom daꞌira. Ōnna si Trupimus, aꞌa Epesos nggaꞌi ka Yahudi. Jari pangannal sigām in si Trupimus itu binowa eꞌ si Paul ni deyom langgal pagkulbanan, boꞌ paꞌin halam.
30 Na, pasaplag kalengogan inān ni kaluhaꞌan Awrusalam. Maglundug saga kabanosan aꞌa pinaꞌan boꞌ niagaw eꞌ sigām si Paul, ginuyud paluwas min deyom langgal, ati tinambol magtūy saga lawangna. 31 Saltaꞌ paꞌin sigām anoꞌongan amapatay si Paul, aniyaꞌ habal atꞌkka pehēꞌ ni nakuraꞌ sundalu Rōm. Ahiluhalaꞌ konoꞌ deyom Awrusalam inān kamemon. 32 Magtūy binowa eꞌ nakuraꞌ saga tininti maka saga sundalu pasaꞌut pehēꞌ ni tongod kahiluhalaꞌan. Pagꞌndaꞌ saga aꞌa ma nakuraꞌ maka ma kasundaluhan inān, magtūy sigām pahali angandaplosan si Paul.
33 Pinaꞌan nakuraꞌ sundalu ni si Paul anaggaw iya ati sinōꞌ iya niengkotan maka duwa kilikili. Puwas eꞌ atilaw nakuraꞌ ma saga aꞌa inān, yukna, “Sai aꞌa itu, maka ai dusana?” 34 Magbiddaꞌ ya pangolang saga aꞌa inān. Aniyaꞌ anambung buwattēꞌ, aniyaꞌ anambung buwattitu. Aheya kasensongan angkan mbal kahangpatan eꞌ nakuraꞌ heꞌ bang ai toꞌongan sababanna. Manjari bay sohoꞌna saga sundaluna amowa si Paul ni deyom kutaꞌ. 35 Ma haron kutaꞌ paꞌin, binengket iya eꞌ saga sundalu sabab pasōng toꞌongan kalengogan aꞌa inān, mbal tasapad. 36 Abut-abut pangamahit saga aꞌa paturul ni si Paul inān, yuk sigām, “Gom iya pinapatay!”
Angandaꞌawahan di-na si Paul
37 Sōng paꞌin binowa eꞌ sigām si Paul ni deyom kutaꞌ, ahꞌlling iya ni nakuraꞌ sundalu, yukna, “Makajari bahāꞌ bang aku ahꞌlling ni kaꞌa?”
Anambung nakuraꞌ, yukna, “Oy, ataꞌu ka magꞌlling Girīk? 38 Yukku kaꞌa ilu aꞌa Misil ya bay amowa saga aꞌa anaggaꞌ ma parinta Rōm ma waktu palabay heꞌ. Aniyaꞌ saga mpat ngibu mundu ma deyoꞌanna, aꞌa magtakos kamemon bay mundaꞌanna pehēꞌ ni lahat paslangan. Kaꞌa bahāꞌ?”
39 Yuk si Paul, “Nggaꞌi ka. Aku itu Yahudi. Bay aku nianakan ma daꞌira Tarsus, ma lahat Silisi heꞌ. Aꞌa aku min daꞌira bangsahan. Na, tuwan, pabaꞌirun aku konoꞌ amissala ni saga aꞌa itu.” 40 Jari pinabaꞌid si Paul eꞌ nakuraꞌ sundalu inān ati anꞌngge iya ma haronan kutaꞌ. Aninyal iya ma saga aꞌa, supaya sigām akale ma iya. Pahondong paꞌin paghidjul sigām inān, amissala si Paul ma bahasa Hibrani.