20
Katulak si Paul min Epesos
1 Na, pahali paꞌin hiluhalaꞌ inān, anambuku si Paul ma saga bebeyaꞌan si Isa, sinōꞌ patimuk. Amissala iya ma sigām pamatꞌttogna pangatayan sigām, boꞌ yampa iya amaꞌid palanjal ni lahat Makidunya. 2 Nilꞌngngan eꞌna kalahat-lahatan mainaꞌan, maka araran iya amissala ma saga aꞌa supaya patꞌttogna atay sigām. Puwas eꞌ atꞌkka na iya ni lahat Akaya, 3 ati tꞌllumbulan ya katꞌnnaꞌna mainaꞌan. Sōng paꞌin iya pauntas ni jadjahan Siriya, tabistu pasal saga Yahudi magisun amonoꞌ iya. Angkan iya agaraꞌ amaklay min deya, boꞌ pabalik min bay palꞌngngananna labay min kaluhaꞌan lahat Makidunya. 4 Ya seheꞌna inān si Sopater anak si Pirus, aꞌa min lahat Bereya, maka disi Aristarkus maka si Sigundu, saga aꞌa min Tessaloneka. Ameyaꞌ isab si Gayus min Derbe, maka disi Tikikus maka si Trupimus, aꞌa min lahat Asiya. Ameyaꞌ isab si Timuti. 5 Bay sigām parahū min kami angalagaran kami mainaꞌan ma Trowas. 6 Aubus paꞌin Hinang Tinapay Halam Pasuligna, atulak kami min Pilipi. Makalabay paꞌin limambahangi taꞌabut kami saga seheꞌ kami mainaꞌan ma Trowas. Dapituꞌ ya kahantiꞌ kami mainaꞌan.
Daꞌira Trowas
7 Taꞌabut paꞌin sangom Sabtuꞌ,a magtimuk kami boꞌ magbahagiꞌan tinapay. Si Paul inān sakap na atulak daiꞌ-llaw, angkan iya anganasihatan saga aꞌa magtimuk inān sampay ni katongaꞌan bahangi. 8 Ya bilik pagtimukan kami inān ma angkap diyataꞌ, maka aheka palitaꞌan bay mainaꞌan. 9 Aniyaꞌ mainaꞌan dakayuꞌ lꞌlla abataꞌ lagiꞌ, ōnna si Utikus, aningkōꞌ ma babag tandawan. Manjari itu, pagka pinatahaꞌ eꞌ si Paul bissalana, kinaruꞌ sidda si Utikus itu sampay tatuli. Pagtuli itu, ahūg iya pareyoꞌ ni tanaꞌ min diyataꞌ tꞌllu angkap lumaꞌ inān. Pagbuhat iya eꞌ saga aꞌa, asal amatay na. 10 Sagōꞌ pareyoꞌ si Paul pinaꞌan boꞌ pakꞌppang ni si Utikus maka eꞌna anganggapus. Yuk si Paul, “Daꞌa kam asusa. Masi giꞌ iya allum.” 11 Puwas eꞌ pabīng si Paul pariyataꞌ amahagiꞌ tinapay boꞌ yampa sigām magkakan. Amissala giꞌ iya ma sigām sampay ni karaiꞌ-llawan, puwas eꞌ atulak na iya. 12 Ya subul bay ahūg inān binowa na eꞌ saga seheꞌna amoleꞌ, allum du isab. Jari pahantap atay sigām.
13 Na, bay na kami parahū min si Paul ni jambatan boꞌ ameyaꞌ min kappal tudju ni Assos. Ya kapaggaraꞌan kami, mahēꞌ na ma Assos paruwaꞌ si Paul. Min panohoꞌanna du isab, sabab hal konoꞌ iya amaklay min deya. 14 Makapagbāk paꞌin kami ma Assos, magtūy iya paruwaꞌ kami ni kappal boꞌ palintas tudju ni lahat Mitilini. 15 Akꞌtta isab kami minnēꞌ, ati pakꞌllat llaw dakayuꞌ, tumandan kami ni tongod Kiyus. Pagꞌllaw dakayuꞌ pahapit kami ni Samos, ati pagꞌllaw karuwana atꞌkka kami ni Militus. 16 Ya garaꞌ si Paul subay daꞌa pahapit ni Epesos boꞌ mbal makalihan mainaꞌan ma lahat Asiya. Sabab magdaiꞌ-daiꞌ iya palanjal tudju ni Awrusalam boꞌ tasaꞌutna paghinang saga Yahudi ya niōnan Pentekosta.
Kapangꞌbba si Paul min Pagmattoꞌahan ma Epesos
17 Angkanna, pagtꞌkka kami ni Militus, amabeyaꞌ lapal si Paul ni Epesos, pinasampay ni saga pagmattoꞌahan palhimpunan si Isa. 18 Pagtꞌkka paꞌin sigām ni Militus, amissala si Paul, yukna, “Kataꞌuwanbi kajarihanku tꞌggolku bay ma deyomanbi, sangay min tagnaꞌ katꞌkkaku ni lahat Asiya. 19 Bay aku maghinang ma Panghūꞌ Isa ma areyoꞌ pangatayanku. Araran bay amꞌttak boheꞌ mataku. Bay sandalanku katiksaꞌan ya pinatꞌkka ni aku sabab min pagisun saga Yahudi. 20 Kataꞌuwanbi du isab halam bay kaꞌlloganku ai-ai bang paꞌin makahāp kaꞌam. Gom paꞌin bay kam nasihatanku sampay panduꞌanku, sumaꞌan ma kahekaꞌan aꞌa, sumaꞌan isab ma lumaꞌbi. 21 Bangsa Yahudi maka bangsa nggaꞌi ka Yahudi, bay bandaꞌanku saliꞌ-saliꞌ subay angꞌbba toꞌongan min dusa sigām boꞌ papinda tudju ni Tuhan, maka subay angandol isab ma Panghūꞌtam si Isa.
22 “Na buwattinaꞌan,” yuk si Paul, “itiyaꞌ na aku ni Awrusalam ma sabab panohoꞌan min Rū Sussi. Mbal kataꞌuwanku bang ai makani-aku mahēꞌ. 23 Sagōꞌ pinataꞌu toꞌongan aku eꞌ Rū Sussi, ma kamemon saga daꞌira ya papehēꞌanku in aku kinalabusu du maka pininjalaꞌ. 24 Sagōꞌ mbal kaꞌlloganku kallumku bang paꞌin tatalusku ai-ai bay panganggantaꞌ aku. Bang paꞌin isab takatisku hinang bay pamahinang aku eꞌ Panghūꞌ Isa, hatina magpasaplag lapal ahāp pasal aseꞌ maka lasa Tuhan.
25 “Bay na kam talatagku kamemon. Bay kam nasihatanku pagparinta Tuhan. Maka kataꞌuwanku na, puwas itu mbal na kitam magꞌndaꞌ pabalik. 26 Angkan kam hakaꞌanku toꞌongan ma llaw itu: bang aniyaꞌ min kaꞌam gantaꞌ amutawan ni deyom nalkaꞌ, min kaꞌam du, angiyas aku. 27 Sabab halam aniyaꞌ bay limbunganku min kaꞌam. Bay kam pataꞌuku pasal niyat maka maksud Tuhan kamemon. 28 Kamayaꞌ-mayaꞌ kam. Upiksaꞌunbi isab saga aꞌa kamemon bay pangandol ma kaꞌam eꞌ Rū Sussi. Upiksaꞌunbi saga jamaꞌa ma palhimpunanbi ilu, ya bay pinasukuꞌ ma Tuhan sabab min lahaꞌ si Isa bay min kamatayna. 29 Sabab kataꞌuwanku, bang aku alikut na, aniyaꞌ du palamud ni kaꞌam saga guru putingan, saliꞌ hantang eroꞌ sidda aesog. Mbal sigām maꞌaseꞌ ma kaꞌam. 30 Minsan min deyomanbi ilu, ma sinosōng aniyaꞌ du magputing boꞌ supaya aniyaꞌ saga bebeyaꞌan si Isa tabowa ameyaꞌ ma sigām. 31 Kamayaꞌ-mayaꞌ kam! Entomunbi bay ka-eꞌku ma kaꞌam. Ma deyom tꞌlluntahun alandos bay pꞌttak boheꞌ mataku ma sababbi, pagka kam bandaꞌanku dangan maka dangan llaw-sangom.
32 “Na buwattinaꞌan, pajagahanta na kam ma Tuhan. Bang paꞌin kam mura-murahan pinahōpan lapalna pasal tabangna, sabab minnēꞌ pahogot gom paꞌin pangandolbi tudju ni Tuhan. Minnēꞌ kam pinaniyaꞌan kahāpan, ya asal pamusakaꞌ Tuhan ma sasuku ameyaꞌ ma iya. 33 Tꞌggolku ma kaꞌam halam aku bay anganapsuhan altaꞌ sai-na, ai na ka pilakna atawa bulawanna atawa saga sꞌmmekna. 34 Kataꞌuwanbi du, bay aku magbaran angusaha boꞌ aniyaꞌ kalluman kami maka saga seheꞌku. 35 Ai-ai bay hinangku heꞌ bay pamaꞌndaꞌku kaꞌam panunuranbi,” yuk si Paul. “Hatina in kitam subay angusaha toꞌongan supaya katabangantam saga aꞌa ya mbal makausaha. Entomunbi bay bissala Panghūꞌ Isa, ya yukna, ‘Bang kita amuwan, labi giꞌ kakoyaganta min aꞌa binuwanan.’ ”
36 Akatis paꞌin eꞌ si Paul amissala, magtūy iya angōk-tuꞌut magbeyaꞌ maka sigām kamemon angamuꞌ-ngamuꞌ ni Tuhan. 37 Magtangisan sigām kamemon saltaꞌ sigām maggapus maka magsiyum, pagka sigām magꞌbba na maka iya. 38 Ya makasusa sigām toꞌongan, ya bay yukna in iya mbal na taꞌndaꞌ eꞌ sigām pabīng. Manjari sineheꞌan iya eꞌ sigām tudju ni kappal.