19
Si Paul ma Daꞌira Epesos
1 Mainaꞌan paꞌin si Apollos ma daꞌira Kurintu, palabay si Paul min kareya-reyahan sampay atꞌkka ni daꞌira Epesos. Jari aniyaꞌ tabākna mainaꞌan saga mulid si Isa. 2 Atilaw iya ma sigām, yukna, “Bay bahāꞌ kam pinaniyaꞌan Rū Sussi, waktu kapangandolbi ma si Isa?”
“Halam,” yuk sambung sigām. “Halam kami makakale saga aniyaꞌ Rū Sussi.”
3 Yuk si Paul, “Na, pandi ai bahāꞌ bay pamandi kaꞌam?”
“Pandi si Yahiya,” yuk sigām.
4 Yuk si Paul, “Pandi taubat ya pamandi si Yahiya ma aꞌa bang angꞌbba min dusa sigām. Bay isab sohoꞌna saga bangsa Yahudi amꞌnnal ma aꞌa dakayuꞌ ya pasunuꞌ ma iya. Si Isa ya pagsambatna.” 5 Takale paꞌin bissala si Paul itu eꞌ saga aꞌa Epesos, pinandi na sigām tandaꞌ in sigām ma si Isa na. 6 Pinatꞌnnaꞌ eꞌ si Paul tanganna ni sigām ati magtūy sigām pahōpan Rū Sussi. Magbissala isab sigām saga bahasa saddī. Amaluwas isab sigām lapal, deyoꞌ bay min Tuhan. 7 Ya heka sigām aniyaꞌ saga sangpūꞌ maka duwa lꞌlla.
8 Manjari pasōd si Paul ni deyom langgal Yahudi, ati tꞌllumbulan ya tꞌggolna magpanduꞌ mainaꞌan. Aesog iya amissala ma saga aꞌa inān pasal pagparinta Tuhan. Binowa sigām magsuli-suli, kalu aniyaꞌ tabowa ameyaꞌ amꞌnnal ma lapalna. 9 Sagōꞌ saga aꞌa kaseheꞌ inān hal magmatuwas, mbal bilahi amꞌnnal. Alaꞌat bissala sigām ma alopan kahekaꞌan aꞌa inān pasal kalꞌngnganan Panghūꞌ Isa. Angkan si Paul alaꞌan min langgal inān, maka binowa isab saga bebeyaꞌan si Isa. Jari sakahabaꞌ llaw magsambung himumūngan maka sigām ma deyom iskul si Tirannus. 10 Ya na paꞌin heꞌ-i hinangna ma deyom duwantahun, angkan saga aꞌa kamemon ma sakalingkal lahat Asiya heꞌ, bangsa Yahudi maka bangsa saddī, bay makakale lapal Panghūꞌ.
11 Aniyaꞌ kahinangan sidda makainu-inu tahinang eꞌ si Paul, deyoꞌ min kawasa Tuhan. 12 Minsan saga panyuꞌ maka lampik bay pagguna eꞌ si Paul, bang binowa ni aꞌa sakihan kauliꞌan saki sigām, maka paluwas isab saga saitan min baran sigām.
Saga Anak si Eskeba
13 Aniyaꞌ isab saga Yahudi magtatawal angalatag kalahatan inān amaluwas saga saitan min deyom baran aꞌa. Jari itu anabbut sigām ōn Panghūꞌ Isa bahasa amaluwas saitan. Yuk sigām ma saga saitan, “Ma ōn si Isa ya pagnasihatan si Paul, sohoꞌta kam paluwas min aꞌa ilu.” 14 Jari itu aniyaꞌ pituꞌ lꞌlla magdanakan anawal ma waktu inān. Mmaꞌ sigām si Eskeba, dakayuꞌ imam alanga ma saga Yahudi. 15 Sagōꞌ dakayuꞌ llaw, hinabu sigām magtawal, sinambungan sigām eꞌ saitan, yuk-i, “Si Isa kataꞌuwanku, maka si Paul kataꞌuwanku isab. Saguwāꞌ kaꞌam ilu mbal kataꞌuwanku bang sai.” 16 Magtūy nirumpās kapituꞌ lꞌlla magdanakan inān eꞌ aꞌa taga-saitan eꞌ. Aesog iya makalanduꞌ angkan sigām mbal makaꞌatu ma iya. Alahi sigām kamemon min lumaꞌ heꞌ, apꞌnnoꞌ eꞌ paliꞌ, maka tinantangan. 17 Manjari patanyag habal inān ni kamemon saga aꞌa ma Epesos, ni saga Yahudi maka ni saga bangsa saddī. Sinōd sigām tāw kamemon, ati minnēꞌ pinaheya gom paꞌin ōn Panghūꞌ Isa. 18 Aheka saga aꞌa angandol ma si Isa patampal na magpasabꞌnnal pasal bay kahinangan sigām alaꞌat. 19 Aheka sigām biyaksa bay maghikmat amowa saga lūnan kitab sigām panulatan hikmat maka tawal. Jari tinunuꞌ eꞌ sigām pinamintꞌdda ma kahekaꞌan aꞌa. Pagitung sigām ma halgaꞌ saga kitab inān, aniyaꞌ limampūꞌ ngibu pilak bang sīn sigām. 20 Pagka buwattēꞌ pasaplag na paꞌin lapal Tuhan mainaꞌan, pasōng isab kawasana angkan aheka amꞌnnal.
21 Apuwas paꞌin saga pakaradjaꞌan eꞌ-i, agaraꞌ si Paul palabay min lahat Makidunya maka Akaya boꞌ yampa palanjal ni Awrusalam. Yukna, “Pagka aku aubus na bay ni Awrusalam, subay aku pehēꞌ isab patibaw ni daꞌira Rōm.” 22 Angkanna si Timuti maka si Erastus, ya duwangan seheꞌ si Paul anabangan iya, bay sohōꞌna parahū ni Makidunya, boꞌ in iya inān patꞌggol giꞌ mahēꞌ ma kalingkal lahat Asiya.
Hiluhalaꞌ ma Epesos
23 Ma waktu inaꞌan-i aniyaꞌ lengog aheya ma deyom daꞌira Epesos ma sabab kalꞌngnganan Panghūꞌ Isa. Buwattitu ya kahālanna: 24 aniyaꞌ dakayuꞌ aꞌa magsasasal pilak, ōnna si Dimitri. Ya hinangna magsasal lumaꞌ-lumaꞌ pilak pagsusumbahan ni tuhan sigām dꞌnda, ōnna Artemes. Auntung usaha saga aꞌa magsasasal ma kompolan si Dimitri. 25 Jari pinatimuk eꞌna saga aꞌa inān maka kaseheꞌan sasuku magsasal, boꞌ yukna ni sigām, “Saga bagay, kataꞌuwanbi du, ya angkan kitam taga-kaniyaꞌ sabab min usahatam itu. 26 Taꞌndaꞌbi na maka takalebi ya tahinang eꞌ aꞌa niōnan si Paul inān. Yuk pamanduꞌna, in tuhan nihinang eꞌ manusiyaꞌ nggaꞌi ka tuhan bꞌnnal. Jari aheka na tabowa amꞌnnal ma pamanduꞌna. Nggaꞌi ka hal maitu ma Epesos, sampay isab ma kaluhaꞌan lahat Asiya. 27 Ya kahanggawanku,” yuk si Dimitri “pinalehom maraiꞌ usahatam. Lāgi ya langgal isab panumbahan ni si Artemes tuhantam babantugun, maraiꞌ mbal na pinaheya ma atay. Buwattinaꞌan si Artemes itu sinumba asal eꞌ saga aꞌa kamemon ma kaluhaꞌan Asiya sampay isab ma kaluhaꞌan dunya. Ya aniyaꞌ pinahalam kabantugna.”
28 Makakale paꞌin saga aꞌa magtimukan inān ma bay bissala si Dimitri eꞌ, magtūy apꞌddiꞌ makalanduꞌ atay sigām. Anagnaꞌ sigām angolang pakosog, yuk-i, “Binabantug si Artemes, tuhan saga aꞌa Epesos!” 29 Sakali paheya kalengogan ma kaluhaꞌan daꞌira inān. Jari sinaggaw eꞌ saga aꞌa inān si Gayus maka si Aristarkus, aꞌa Makidunya karuwangan bay seheꞌ si Paul ma labayan. Pagsaggaw itu, magtūy magsama-sama kahekaꞌan saga aꞌa paragan ni lugal pagtitipunan eꞌ, maka eꞌ sigām amowa disi Gayus. 30 Bilahi si Paul paharap ni saga aꞌa sikatimukan inān, sagōꞌ nihawiran iya eꞌ saga bebeyaꞌan si Isa. 31 Minsan saga bagꞌllal ma lahat Asiya inān, ya bagay si Paul isab, bay amabeyaꞌan iya lapal. Niamay-amayan iya daꞌa sinōꞌ amaꞌndaꞌan di-na pasōd ni lumaꞌ pagtitipunan eꞌ.
32 Pasaltaꞌ, ahiluhalaꞌ na katimukan aꞌa inān. Saddī pangalingan kaseheꞌ, saddī isab pangalingan kaseheꞌ, sabab kahekaꞌanna halam minsan makataꞌu bang ai poꞌonna angkan sigām magsakaum inān. 33 Jari aniyaꞌ aꞌa niōnan si Iskandar bay pinapehēꞌ ni dahuan eꞌ saga Yahudi, sinōꞌ amissala. Kinabāꞌ eꞌ saga aꞌa kaseheꞌan iya ya pagsababan hiluhalaꞌ inān. Jari pinahantap baꞌanan aꞌa inān eꞌ si Iskandar, sinōꞌ mbal asagaw, ati paꞌahat iya angandaꞌawa. 34 Sagōꞌ takilā paꞌin iya eꞌ kahekaꞌan aꞌa inān in iya bangsa Yahudi, magpangolang sigām sama-sama ma deyom saga duwanjām. Ya na paꞌin pangolang sigām: “Binabantug si Artemes, tuhan saga aꞌa Epesos!”
35 Ya katobtobanna, saga aꞌa inān sinōꞌ pahali eꞌ bagꞌllal magsusulat. Yukna ni sigām, “Oy! Kaꞌam saga aꞌa Epesos! Kinataꞌuwan asal eꞌ aꞌa kamemon in kitam saga aꞌa Epesos tungguꞌ lumaꞌ si Artemes tuhantam babantugun, maka batu mahasussi ya bay pahūg min diyataꞌ langit. 36 Mbal kapaliluhan pasal ilu-i, angkan kam subay pahantap. Daꞌa kam magdaiꞌ-daiꞌ maghinang ai-ai ma halam tapikilbi pahāp. 37 Itiyaꞌ bowabi piꞌitu saga aꞌa itu, boꞌ halam sigām bay angalangpasan langgal atawa amūng-mūng alaꞌat pasal tuhantam dꞌnda itu. 38 Abila aniyaꞌ panuntutan si Dimitri maka saga tendogna ma sai-sai, aniyaꞌ du llaw pagsaraꞌ, maka aniyaꞌ isab bagꞌllal magsasaraꞌ. Patut sigām anuntut mahēꞌ. 39 Maka bang aniyaꞌ palkalaꞌbi saddī, subay pinasalassay ma palhimpunan paghukuman. 40 Sabab piligdu kitam,” yuk bagꞌllal inān, “maraiꞌ kitam tinuntutan pagka kitam ya poꞌonan kahiluhalaꞌan itu. Mbal kitam makaraꞌawa sabab halam toꞌongan aniyaꞌ sababanna.” 41 Aubus paꞌin bissala bagꞌllal heꞌ magtūy pinapoleꞌ eꞌna saga aꞌa bay magtimuk inān.