18
Ma Daꞌira Kurintu
1 Puwas eꞌ atulak si Paul min Aten pauntas ni daꞌira Kurintu. 2 Mainaꞌan paꞌin, magbāk iya maka si Akila, dakayuꞌ Yahudi bay nianakan ma lahat Puntus. Si Akila itu bahaꞌu bay atꞌkka pinaꞌan ni Kurintu bay min lahat Itali, magbeyaꞌ maka hꞌndana si Prisila. Sigā maglakibini bay alaꞌan min lahat Itali pagka aniyaꞌ panohoꞌan min sultan Klaudi, in kamemon konoꞌ saga bangsa Yahudi sinōꞌ alaꞌan min daꞌira Rōm.a Na, pinaꞌan si Paul anibaw disi Akila. 3 Jari itu, pagka saliꞌ du usaha sigā maghinang lumaꞌ tolda, patꞌnnaꞌ iya ma sigā ameyaꞌ magusaha. 4 Ati sakahabaꞌ llaw Sabtuꞌ pinaꞌan iya ni langgal Yahudi magsuli-suli maka saga aꞌa mainaꞌan kalu tabowana saga Yahudi maka saga Girīk magkahagad ma pamanduꞌna.
5 Pagtꞌkka si Silas maka si Timuti min Makidunya, magnasihat sadja si Paul. Halam aniyaꞌ hinangna saddī. Anaksiꞌ iya ni saga Yahudi ma pasalan si Isa, in iya Al-Masi ya asal tapeneꞌ eꞌ Tuhan. 6 Sagōꞌ tasaggaꞌ paꞌin si Paul eꞌ saga Yahudi maka pinamūng-mūngan alaꞌat, magtūy iya angangjabjaban badjuꞌna, tandaꞌ saksiꞌ in iya papuwas na min sigām. Yukna ni sigām, “Kasuppakan du kam bang kam amutawan ni deyom nalkaꞌ. Papuwas na aku. Papinda na aku magnasihat pehēꞌ ni saga bangsa nggaꞌi ka Yahudi.”
7 Sakali alaꞌan si Paul min saga aꞌa ma langgal inān boꞌ yampa pehēꞌ ni lumaꞌ si Titus Justus, aꞌa bangsa saddī ya magtaꞌat asal ni Tuhan. Inaꞌan lumaꞌna ma bihing langgal. 8 Na, si Krispus, ya magmakōk ma langgal inān, angandol na ma Panghūꞌ Isa, beyaꞌ isab kamemon saga aꞌa ma okomanna. Aheka isab saga aꞌa min daꞌira Kurintu inān bay akale ma pamanduꞌ si Paul ati angandol ma si Isa maka pinandi tandaꞌ in sigām ma iya na.
9 Na, ma llaw dakayuꞌ, boꞌ waktu sangom na, aniyaꞌ magpanyataꞌ ni si Paul. Takalena Panghūꞌ Isa amissala ni iya, yukna, “Daꞌa ka agawa amissala, sagōꞌ anganasihat na paꞌin ka, 10 sabab pagapiꞌ du aku ma kaꞌa. Halam aniyaꞌ makamula kaꞌa sabab aheka saga aꞌaku ma deyom daꞌira itu.” 11 Angkan si Paul patꞌnnaꞌ mainaꞌan dantahun maka nnom bulan. Magpanduꞌ na paꞌin iya lapal Tuhan.
12 Manjari itu, pasaltaꞌ paꞌin si Galliyu maggubnul ma kalingkal lahat Akaya heꞌ, magdakayuꞌ saga Yahudi anaggaw si Paul. Tinꞌkkahan iya eꞌ sigām ni saraꞌ gubnul. 13 Ya panuntut sigām, “Aꞌa itu amanduꞌan saga aꞌa hatulan pagtaꞌat ni Tuhan ya pangalāngan saraꞌ kami.”
14 Sōng paꞌin si Paul angandaꞌawa, amissala gubnul Galliyu ni saga Yahudi inān, yukna, “Bang hinang alaꞌat atawa langgal saraꞌ Rōm ya sababan palkalaꞌbi itu, patut kam subay kinale. 15 Sagōꞌ, pagka pagjawabanbi saga kabtangan maka ōn aꞌa maka saraꞌ agamabi, kaꞌam ya magsalassayan di-bi. Mbal aku anaraꞌ ma palkalaꞌ buwattilu!” 16 Angkan pinalaꞌan sigām eꞌ si Galliyu min pagsaraꞌan inān. 17 Manjari saga aꞌa inān kamemon amalutan si Sostenes, ya pagmakōkan ma langgal Yahudi inān. Pinagdaplosan iya ma alopan pagsaraꞌan, sagōꞌ halam pamagay hinang sigām inān eꞌ si Galliyu.
Pabīng disi Paul ni Daꞌira Antiyuk
18 Atꞌggol-tꞌggol giꞌ ya katꞌnnaꞌ si Paul mahēꞌ ma Kurintu boꞌ yampa iya amaꞌid min saga bebeyaꞌan si Isa heꞌ. Aleha iya minnēꞌ tudju ni lahat Siriya, sineheꞌan eꞌ si Prisila maka si Akila. Ma halam giꞌ sigām makatulak, boꞌ ma Kengkereya lagiꞌ, bay magpabagongan kōkna si Paul, panuhul najalna ni Tuhan. 19 Pagtꞌkka sigām ni Epesos niꞌbbahan eꞌ si Paul disi Akila mainaꞌan. Pasōd iya ni deyom langgal magsuli-suli maka saga Yahudi. 20 Sinōꞌ giꞌ iya patꞌggol-tꞌggol ma sigām, sagōꞌ mbal iya. 21 Gom paꞌin iya amaꞌid, yukna, “Bang min kabayaꞌan Tuhan, pabīng du aku ni kaꞌam.” Puwas eꞌ aleha iya min Epesos.
22 Pagtꞌkkana ni Kesareya magtūy iya patukad ni Awrusalam magaddatan tipunan jamaꞌa si Isa mainaꞌan. Puwas eꞌ palūd iya pabīng tudju ni Antiyuk. 23 Atꞌggol-tꞌggol paꞌin kamaheꞌna ma Antiyuk, atulak iya minnēꞌ. Talatagna kalahatan Galatiya maka Prigiya, ati pinahogot pal-imanan saga bebeyaꞌan si Isa kamemon ma saga lahat inān.
Si Apollos Atꞌkka na Daꞌira Epesos
24 Manjari itu aniyaꞌ dakayuꞌ Yahudi niōnan si Apollos atꞌkka ni daꞌira Epesos. Aꞌa iya bay nianakan ma daꞌira Iskandari. Apanday iya amissala, maka alalom pangadjiꞌna bang ma Kitab. 25 Bay iya pinanduꞌan pasal kalꞌngnganan Panghūꞌ Isa. Aheya katuyuꞌna amissala, taluwaꞌ isab pamanduꞌna. Sagōꞌ ya sadja kataꞌuwanna ya pagpandi bay pamanduꞌ eꞌ si Yahiya. 26 Anagnaꞌ iya magnasihat ma deyom langgal Yahudi, maka halam aniyaꞌ hawal-hawalna. Takale paꞌin iya eꞌ si Prisila maka si Akila, binowa iya eꞌ sigā ni lumaꞌ ati pinahatian pasal kalꞌngnganan Tuhan boꞌ pasōng taꞌuna.
27 Manjari agaraꞌ si Apollos parambilaꞌ ni lahat Akaya. Bilahi isab saga bebeyaꞌan si Isa ma Epesos inān anabangan iya, angkan sigām bay amabeyaꞌ sulat ni lahat Akaya heꞌ. Sinōꞌ saga bebeyaꞌan si Isa amatuntul si Apollos pagtꞌkkana pehēꞌ. Manjari makatꞌkka paꞌin iya, aheya tabangna ma saga aꞌa Akaya, ya magpangandol ma si Isa ma sabab kahāp Tuhan ma sigām. 28 Sabab apaslod si Apollos itu angatu ma saga Yahudi waktu kapagjawab sigām ma mairan angkan iya angandaꞌug. Ginuna eꞌna saga ayat Kitab pamamattanna ma sigām pasal si Isa in iya Al-Masi ya asal tapeneꞌ eꞌ Tuhan.