16
Si Timuti Pabunyug ma disi Paul
1 Manjari palanjal si Paul tudju ni Derbe maka ni Listara. Aniyaꞌ ma Listara dakayuꞌ bebeyaꞌan si Isa niōnan si Timuti. Inaꞌna bangsa Yahudi angandol ma si Isa, ati mmaꞌna bangsa Girīk. 2 Si Timuti itu binissalahan ahāp eꞌ saga bebeyaꞌan si Isa, ya ma Listara maka ma Ikuni inān. 3 Bilahi na si Paul amowa si Timuti seheꞌna ma palꞌngnganan, angkan iya niꞌislam dahū eꞌ si Paul boꞌ mbal tasoway eꞌ saga Yahudi ma jadjahan inaꞌan. Sababna kinataꞌuwan eꞌ saga Yahudi kamemon in mmaꞌ si Timuti bangsa Girīk. 4 Na, pauntas na disi Paul ni saga kalahat-lahatan boꞌ nihakaꞌan eꞌ sigām saga bebeyaꞌan si Isa mainaꞌan pasal kagaraꞌan bay min saga aꞌa kawakilan maka saga pagmattoꞌahan ma Awrusalam. Sinōꞌ saga bebeyaꞌan inān ameyaꞌ ma kagaraꞌan eꞌ. 5 Jari itu pahogot na paꞌin pangandol jamaꞌa si Isa ma saga palhimpunan ma kalahatan inān, maka pasōng isab heka sigām sakahabaꞌ llaw.
Aniyaꞌ Papanyataꞌ ni si Paul
6 Na, niuntas eꞌ disi Paul lahat Prigiya maka lahat Galatiya, sabab pinaggat sigām eꞌ Rū Sussi sinōꞌ daꞌa magnasihat lapal Tuhan mainaꞌan ma kalingkal lahat Asiya. 7 Taꞌabut paꞌin tobtoban lahat Misiya, pasulay sigām palanjal ni lahat Bitiniya sagōꞌ pinaggat sigām eꞌ Rū si Isa. 8 Angkan sigām pauntas labay min tꞌngngaꞌ lahat Misiya sampay palūd na ni Trowas. 9 Ma Trowas paꞌin boꞌ sangom na, aniyaꞌ paꞌndaꞌ ni si Paul. Taꞌndaꞌna aꞌa min Makidunya mikitabang ma iya. Yuk aꞌa itu, “Piꞌitu ka parambilaꞌ ni Makidunya boꞌ kami tabangun!” 10 Aubus paꞌin si Paul makaꞌndaꞌ inaꞌan-i, magtūy kami magsakap atulak ni Makidunya, sabab kataꞌuwan kami in kami sinohoꞌ eꞌ Tuhan anganasihat lapal ahāp ni saga aꞌa mahēꞌ.
Si Lidiya Papinda Ameyaꞌ ma si Isa
11 Makauntas paꞌin kami min Trowas, patūy kami tudju ni pūꞌ Samoterak. Pagkꞌllat llaw paꞌin, pauntas na isab kami min pūꞌ inaꞌan tudju ni Neyapoles. 12 Pagtꞌkka kami ni Neyapoles patukad kami tudju ni Pilipi, daꞌira aheya ma kalingkal Makidunya, paglahatan bangsa Rōm isab. Pahantiꞌ kami mainaꞌan daka pilangꞌllaw. 13 Pagsabtuꞌ, paluwas kami min daꞌira inān tudju ni bihing sapaꞌ, sabab ma tokoran kami aniyaꞌ pagsambahayangan saga Yahudi mainaꞌan. Jari aningkōꞌ kami amissala ma saga karꞌndahan ya patipun mainaꞌan. 14 Aniyaꞌ inān dꞌnda niōnan si Lidiya akale ma kami, dꞌnda min daꞌira Tiyatira. Ya usahana maglitu kakanaꞌ taluk, kakanaꞌ ahalgaꞌ. Dꞌnda itu magtaꞌat asal ni Tuhan. Hinabuna akale ma kami, kabuwanan iya pikilan eꞌ Panghūꞌ Isa ati kinahagad eꞌna bissala si Paul. 15 Jari pinandi disi Lidiya maka saga seheꞌna karalumaꞌ, palsaksiꞌan in sigām ma si Isa na. Puwas eꞌ sinōꞌ kami eꞌ si Lidiya paokom ma deyomanna. Yuk si Lidiya, “Bang aku tabistabi angandol na sabꞌnnal-bꞌnnal ma Panghūꞌ, piꞌitu kam paokom ma lumaꞌku.” Jari talogos kami eꞌna.
Si Paul maka si Silas Kinalabusu ma Pilipi
16 Manjari itu, ma labayan paꞌin kami tudju ni pagsambahayangan eꞌ, aniyaꞌ talanggal kami dakayuꞌ dꞌnda banyagaꞌ. Pagkasōran iya saitan angkan iya makapangalimal, ati aheya isab paluntungan saga aꞌa ya tag-dapuna luwas min pangalimalna. 17 Paturul na paꞌin iya ma kami maka si Paul, maka eꞌna angolang patanog, yuk-i, “Saga aꞌa itu sosohoꞌan Tuhan Mahatinggi! Sigām ya angahakaꞌan kaꞌam bang buwattingga kam lappasan!”
18 Mbal pahali paglinganna buwattēꞌ daka pilangꞌllaw. Ya katꞌkkahanna apꞌddiꞌ pikilan si Paul, angkan iya palingiꞌ ni dꞌnda inān boꞌ pahꞌllinganna saitan ya ma iya, “Min kawasa ōn si Isa Al-Masi,” yuk si Paul, “sohoꞌta ka paluwas min dꞌnda ilu!” Saruꞌun-duꞌun du magtūy paluwas saitan eꞌ, ati dꞌnda inān mbal na makapangalimal.
19 Makataꞌu paꞌin saga tag-dapu dꞌnda inān in iya mbal na kapangusahaꞌan, magtūy sinaggaw eꞌ sigām si Paul maka si Silas. Ginuyud sigā karuwangan ni pagtabuꞌan boꞌ pinaharap ni saga pagnakuraꞌan daꞌira. 20 Tinꞌkkahan isab sigā ni saga bagꞌllal bangsa Rōm ya maghuhukum mainaꞌan. Yuk panuntut saga tag-dapu dꞌnda inān, “Saga aꞌa itu hal angahinang kasasawan ma lahattam. Bangsa Yahudi koꞌ sigā itu. 21 Pamanduꞌ eꞌ sigā saga addat mbal taluwaꞌ bang ma saraꞌtam bangsa Rōm. Mbal kami wajib anaimaꞌ atawa angahinang saga addat buwattēꞌ.”
22 Manjari palamud baꞌanan aꞌa ya bay mainaꞌan ati ameyaꞌ-meyaꞌ anganjuri disi Paul. Magpanohoꞌan saga bagꞌllal inān subay nihurusan sꞌmmek disi Paul boꞌ niraplosan. 23 Makalanduꞌ abisa ya pangandaplos ma sigā boꞌ yampa sigā niꞌisi ni deyom kalabusu. Sinōꞌ isab tungguꞌ kalabusu pinahogot pangalabusuna ma sigā. 24 Pagkale uldin itu eꞌ tungguꞌ, magtūy niꞌisi eꞌna disi Paul ni tꞌngngaꞌ-tꞌngngaꞌ kalabusu boꞌ pinasungan eꞌna tapeꞌ sigā maka papan aheya.
25 Jari itu, saga tongaꞌ bahangi paꞌin, angamuꞌ-ngamuꞌ si Paul maka si Silas ni Tuhan, magkalangan isab pamudji sigā ma iya. Akale ma sigā saga pilisu kaseheꞌan inān. 26 Taggahaꞌ sadja aniyaꞌ linug akosog, ajogjog papagan kalabusu inān. Saruꞌun-duꞌun du paukab tambolna kamemon, apakpak isab saga kilikili min tapeꞌ-tangan saga pilisu inān. 27 Tabatiꞌ tungguꞌ kalabusu, ati pagꞌndaꞌna aukab saga tambol, pangannalna waꞌi makalꞌppa saga pilisu. Magtūy nihublut kalisna, arak amapatay di-na. 28 Sagōꞌ angalingan si Paul pakosog, yukna, “Daꞌa ka angamula di-nu! Itiyaꞌ du kami kamemon.”
29 Angalingan tungguꞌ inān angamuꞌ palitaꞌan boꞌ pasaꞌut pareyom. Pasujud iya amidpid ma atag tapeꞌ si Paul maka si Silas. 30 Sakali niambit sigā eꞌna paluwas boꞌ yampa sigā tilawna. “Saga tuwan,” yukna, “ai subay hinangku boꞌ aku lappasan?”
31 Yuk disi Paul, “Angandol ka ma Panghūꞌ Isa, ati lappasan du ka sampay saga seheꞌnu karalumaꞌ.” 32 Puwas eꞌ ninasihat lapal Tuhan ni tungguꞌ kalabusu inān sampay ni aꞌa kamemon ma deyom lumaꞌna. 33 Jari alalom paꞌin bahangi, binowa sigā paluwas eꞌ tungguꞌ kalabusu ati koseꞌanna paliꞌ sigā. Pinandi isab tungguꞌ inān karamataꞌan, tandaꞌ in sigām ma si Isa na. 34 Pagubus, binowa disi Paul eꞌ tungguꞌ inān ni lumaꞌna ati pinakan. Landuꞌ aheya kakōg-koyagan sigām karalumaꞌ sabab Tuhan na ya pagkahagaran sigām.
35 Pagkꞌllat llaw paꞌin, magpanohoꞌan saga bagꞌllal ma saga tendog sigām, sinōꞌ amowa uldin pehēꞌ ni kalabusu. Yuk uldin eꞌ, “Palꞌppahun na saga aꞌa ilu.” 36 Yuk jaga kalabusu ma si Paul, “Magpanohoꞌan saga bagꞌllal in kaꞌa maka si Silas makajari na pinaluwas. Wajib na kam alaꞌan, bang paꞌin kam asalamat isab,” yukna.
37 Sagōꞌ ahꞌlling si Paul ni saga tendog eꞌ, yukna, “Bay kami niraplosan eꞌ sigām diꞌilaw ma mata mairan, minsan kami halam bay sinumariya. Boꞌ paꞌin aꞌa Rōm du kami. Niꞌisi isab kami ni deyom kalabusu. Ati bilahi na sigām amaluwas kami ma halam aniyaꞌ makataꞌu. Ā, mbal makajari!” yuk si Paul. “Subay magbaran piꞌitu saga bagꞌllal ilu amaluwas kami.”
38 Manjari pehēꞌ na saga tendog inān angahakaꞌan saga bagꞌllal pasal hꞌlling si Paul. Pagkale saga bagꞌllal aniyaꞌ kataddangan disi Paul in sigā bangsa Rōm, tināw sigām 39 angkan pinaꞌan ni disi Paul pamaꞌap. Puwas eꞌ binowa disi Paul eꞌ saga bagꞌllal eꞌ paluwas min kalabusu. Ya pangamuꞌ sigām ma si Paul bang paꞌin alaꞌan min daꞌira sigām. 40 Manjari pinaꞌan si Paul maka si Silas ni lumaꞌ si Lidiya. Magꞌndaꞌ sigām maka bebeyaꞌan si Isa mainaꞌan, ati amissala disi Paul pamahogot atay sigām. Puwas eꞌ atulak na disi Paul.