15
Pagisunan ma Awrusalam
1 Manjari itu aniyaꞌ saga aꞌa atꞌkka ni Antiyuk bay min lahat Yahudiya, ati pinanduꞌan eꞌ sigām saga bebeyaꞌan si Isa mainaꞌan. Yuk pamanduꞌ sigām, “Mbal kam makajari alappas bang kam mbal taislam buwat panohoꞌan saraꞌ si Musa!” 2 Nijawab toꞌongan saga aꞌa inān eꞌ si Paul maka si Barnabas, binowa maglugat ma sabab pamanduꞌ sigām buwattēꞌ. Angkan na si Paul maka si Barnabas maka saga bebeyaꞌan kaseheꞌ min Antiyuk inān ginaraꞌan pehēꞌ ni Awrusalam. Sinōꞌ sigām amowa saga aꞌa kawakilan maka saga pagmattoꞌahan mainaꞌan magbissala pasal palkalaꞌ inān.
3 Na, pinalanjal disi Paul eꞌ saga jamaꞌa ma Antiyuk. Paglintas sigām paꞌin labay min lahat Piniki maka min Samariya, nihaka eꞌ sigām mainaꞌan pasal saga bangsa nggaꞌi ka Yahudi ya papinda na ni Tuhan. Landuꞌ kinōgan saga bebeyaꞌan si Isa, pagkale sigām ma lapal disi Paul itu. 4 Pagtꞌkka sigām pehēꞌ ni Awrusalam, sinagina sigām eꞌ saga jamaꞌa si Isa mahēꞌ, sampay saga aꞌa kawakilan maka saga pagmattoꞌahan. Nihakaꞌan sigām eꞌ disi Paul pasal kamemon bay tahinang eꞌ sigā deyoꞌ bay min Tuhan. 5 Sagōꞌ aniyaꞌ saga Parisi angandol ma si Isa bay anꞌngge amissala. Yuk sigām, “Saga aꞌa angandol ma si Isa min bangsa saddī inān subay niꞌislam dahū, maka subay sigām amogbog ma saraꞌ si Musa.”
6 Jari magsakaum saga aꞌa kawakilan maka saga pagmattoꞌahan amikil-mikil pasal palkalaꞌ inān. 7 Atꞌggol-tꞌggol paꞌin eꞌ sigām magbissala, anꞌngge si Petros amissala. Yukna, “Kaꞌam saga dauranakanku, kataꞌuwanbi du: ma waktu palabay inān bay aku tapeneꞌ eꞌ Tuhan min deyomanbi, sinōꞌ magnasihat lapal ahāp ni saga kabangsahan saddī, ya nggaꞌi ka Yahudi, boꞌ supaya sigām makakale sampay magkahagad. 8 Jari in Tuhan, ya makataꞌu bang ai ma deyom atay manusiyaꞌ, bay amuwan Rū Sussi ma kabangsahan saddī buwat bay pamuwanna ma kitam, tandaꞌ palsaksiꞌan in iya kasulutan na ma sigām. 9 Sigām maka kitam itu mbal pinapagbiddaꞌ eꞌ Tuhan. Sinussi eꞌna pangatayan sigām labay min pangandol sigām ma si Isa. 10 Na,” yuk si Petros, “angay subay pakagitbi atay Tuhan? Angay pahunitanbi saga aꞌa ya sohoꞌbi amogbogan saraꞌ si Musa? Parahāl minsan kitam maka kaꞌmboꞌ-mboꞌantam mbal makaꞌaku amogbog. 11 Daꞌa na. Magkahagad kitam ma Panghūꞌ Isa ati lappasan kitam sabab min aseꞌna maka lasana. Damikiyanna isab saga aꞌa min kabangsahan saddī inān.”
12 Minnēꞌ pahondong magsuli-suli saga aꞌa magsakaum inān kamemon hinabu sigām akale ma pangahaka si Barnabas maka si Paul. Pinataꞌu sigām pasal saga paltandaꞌan maka saga hinang makainu-inu kamemon deyoꞌ bay min Tuhan ya bay tahinang eꞌ sigā ma deyoman saga aꞌa ya nggaꞌi ka Yahudi. 13 Aubus paꞌin sigām angahaka, pagantiꞌ si Yakub amissala. “Kaꞌam saga dauranakanku,” yukna, “kalehunbi na aku. 14 Bay kami pinahati eꞌ si Simun itu insiniꞌ pasal katagnaꞌ Tuhan bay amaꞌndaꞌan pagkaꞌinagonna ma saga aꞌa ya nggaꞌi ka Yahudi. Sabab aniyaꞌ saga aꞌa peneꞌna min sigām nihinang aꞌa sukuꞌna. 15 Atayudtud isab sulat saga kanabi-nabihan, iya yuk-i,
16 ‘Puwas itu, yuk Tuhan, pabīng du aku,
ati bawiꞌku pagsultan si Daꞌud, ya sapantun lumaꞌ alarak.
Bangunku pabalik, batukku pagdayawna bay alarak eꞌ,
17 supaya aku piniha eꞌ saga manusiyaꞌ takapin,
beyaꞌ isab saga bangsa nggaꞌi ka Yahudi
ya kaōnan maka ōnku.
Pangallam Panghūꞌ koꞌ itu,
18 ya makahinang kamemon saga pakaradjaꞌan itu.
Kasakupan koꞌ itu sangay min awal.
19 “Na,” yuk si Yakub, “buwattitu panganggaraꞌku: subay mbal sasawtam saga aꞌa min kabangsahan saddī ya papinda na ameyaꞌ ma Tuhan. 20 Sagōꞌ subay sigām pabeyaꞌantam sulat buwattitu: daꞌa kam amangan haram buwat ai-ai paglamas ni saga taꞌu-taꞌu, daꞌa kam maghinang kalaꞌatan dꞌnda maka lꞌlla, daꞌa kam amangan isi hayop bay pinꞌkkol, maka daꞌa amangan lahaꞌ. 21 Saga saraꞌ panohoꞌan si Musa pinagbassa na paꞌin sakahabaꞌ Sabtuꞌ ma kalanggalantam Yahudi. Lāgi in panduꞌ si Musa pinagnasihat na paꞌin ma kadaꞌirahan sangay min awal lagiꞌ.”
Sulat ni saga Almasihin ya Nggaꞌi ka Yahudi
22 Manjari magkagaraꞌan saga aꞌa kawakilan maka saga pagmattoꞌahan maka saga jamaꞌa inān kamemon, ameneꞌ saga aꞌa min deyoman sigām boꞌ pinapehēꞌ ni Antiyuk, pinaseheꞌ ma si Paul maka si Barnabas. Jari ya pineneꞌ inān si Judas Barsabbas maka si Silas. Duwangan itu asal pinagaddatan eꞌ dauranakan sigā bebeyaꞌan si Isa. 23 Aniyaꞌ isab sulat pinabowa ma sigā, yuk-i:
“Sulat itu deyoꞌ min kami dauranakanbi, saga aꞌa kawakilan maka pagmattoꞌahan maitu ma Awrusalam. Pinasampay itu ni kaꞌam saga dauranakan bangsa saddī ya maglahat mailu ma Antiyuk, ma Siriya, sampay saga ma Silisi.
Aheya pagaddat kami ma kaꞌam.
24 Takale kami aniyaꞌ konoꞌ saga lꞌlla min deyoman kami bay piꞌilu amasusa kaꞌam sampay anasaw pikilanbi ma sabab panduꞌ sigām. Sagōꞌ nggaꞌi ka min panohoꞌan kami ya angkan sigām amanduꞌ buwattēꞌ. 25 Angkan kami bay magisun kamemon subay ameneꞌ saga aꞌa maitu boꞌ sinōꞌ piꞌilu ni kaꞌam. Jari paseheꞌ kami sigām ma si Barnabas maka si Paul, bagay kami kinalasahan. 26 Disi Paul itu bay magmalillaꞌ ma kallum sigām ma sabab Panghūꞌtam si Isa Al-Masi. 27 Manjari itiyaꞌ na si Judas maka si Silas, bay sohoꞌ kami piꞌilu pabaran ni kaꞌam angahakaꞌan kaꞌam ai-ai bay tasulat kami itu. 28 Dauyunan kami maka Rū Sussi, in kaꞌam ilu subay mbal pinahunitan liyu min saga panohoꞌan itu, ya wajib bineyaꞌ: 29 daꞌa kam amangan ai-ai bay paglamas ni saga taꞌu-taꞌu, daꞌa kam amangan lahaꞌ, daꞌa kam amangan isi hayop bay pinꞌkkol, maka daꞌa isab kam maghinang kalaꞌatan dꞌnda maka lꞌlla. Bang halliꞌanbi heꞌ-i, makahāp toꞌongan ma kaꞌam.
Mura-murahan, wassalam.”
30 Jari itu pinalꞌngngan na saga aꞌa amowa sulat inān tudju ni Antiyuk. Pagtꞌkka paꞌin sigā pinaꞌan, pinatipun eꞌ sigā saga aꞌa dajamaꞌa mainaꞌan boꞌ niꞌndeꞌan sulat inān. 31 Pagbassa paꞌin, magtūy sigām kinōgan toꞌongan, sabab sulat inān makalasig atay sigām. 32 Atꞌggol-tꞌggol isab pamissala si Judas maka si Silas pamahogot maka pamakosog pangandol saga jamaꞌa inān, sabab aniyaꞌ kapandayan bay pamuwan Tuhan ma sigā magpalatun palmanna. 33 Palabay paꞌin daka pilangꞌllaw, pinatuntul sigā eꞌ saga dauranakan, yuk-i “Mura-murahan, bang paꞌin kam asalamat.” Jari amoleꞌ na sigā ni bay anohoꞌ sigā. 34 (Sagōꞌ si Silas bilahi lagiꞌ patꞌnnaꞌ mainaꞌan.) 35 In si Paul maka si Barnabas pahantiꞌ giꞌ ma Antiyuk, magbeyaꞌ maka baꞌanan aꞌa kaseheꞌ magpanduꞌ maka magnasihat lapal Panghūꞌ.
Pagbutas si Paul maka si Barnabas
36 Apuwas paꞌin daka pilambahangi, ahꞌlling si Paul ni si Barnabas, yukna, “Sūng kita patibaw pabīng ni saga dauranakanta bebeyaꞌan si Isa ma kadaꞌirahan kamemon bay pagnasihatanta lapal Tuhan eꞌ. Tibawta bang buwattingga na kahālan sigām.” 37 Si Barnabas inān bilahi amowa si Yahiya Markus paseheꞌ ma sigā, 38 sagōꞌ bang ma bistahan si Paul si Markus itu mbal tōp paneheꞌ, sabab bay iya angꞌbbahan sigām bay mahēꞌ giꞌ ma Pampiliya. Halam iya bay makatatas anabangan sigām. 39 Aheya paglugat si Paul maka si Barnabas angkan sigā magbutas. Malaingkan si Barnabas bay amowa si Markus ati atulak sigā karuwangan tudju ni pūꞌ Kiprus. 40 Si Paul ya ameneꞌ si Silas paseheꞌ ma iya. Sōng paꞌin sigā atulak min Antiyuk, pinajagahan sigā ma Tuhan eꞌ saga bebeyaꞌan si Isa mainaꞌan maka niamuꞌan tatabanganna. 41 Alaꞌan paꞌin si Paul minnēꞌ, palabay iya min lahat Siriya maka min lahat Silisi. Maingga-maingga lahat aniyaꞌ saga jamaꞌa si Isa magtipun, pinahogot eꞌna pangandol sigām.