14
Ma Daꞌira Ikuni
1 Ma lahat Ikuni paꞌin, pasōd si Paul maka si Barnabas ni deyom langgal Yahudi buwat kabiyaksahan sigā. Sidda apaslod bissala sigā angkan landuꞌ aheka saga aꞌa, Yahudi maka nggaꞌi ka Yahudi, amꞌnnal ma si Isa. 2 Sagōꞌ saga Yahudi ya agagga amꞌnnal, bay amidjakan saga aꞌa nggaꞌi ka Yahudi maka bay amalaꞌat atay sigām ni sasuku amꞌnnal ma si Isa. 3 Atꞌggol-tꞌggol ya kahantiꞌ disi Paul ma Ikuni. Halam aniyaꞌ tāw sigā amissalahan saga aꞌa pasal Panghūꞌ Isa. Maka si Isa bay amaniyaꞌan sigā kawasa pangahinang saga hinang makainu-inu maka saga paltandaꞌan, boꞌ supaya pinarassaya in lapal sigā pasal kaheya tabang Tuhan. 4 Abahagiꞌ duwa saga aꞌa ma daꞌira heꞌ. Aniyaꞌ sigām kaseheꞌ bay amogbogan saga Yahudi, aniyaꞌ isab kaseheꞌ amogbogan disi Paul. 5 Jari magisun saga aꞌa bangsa saddī maka saga Yahudi, beyaꞌ saga pagnakuraꞌan sigām. Ya pagisun sigām angalaꞌug maka amantung disi Paul. 6 Tataꞌu paꞌin pagisun itu eꞌ disi Paul, magtūy sigā alahi tudju ni daꞌira Listara maka daꞌira Derbe, ya ma lahat Likauna sampay ni saga kalumaꞌan ma sakalibut inaꞌan-i. 7 Ati pinasaplag eꞌ sigā mainaꞌan lapal ahāp pasal si Isa.
Ma daꞌira Listara
8 Sakali itu aniyaꞌ aningkōꞌ ma Listara inān aꞌa akuꞌil tapeꞌna, halam bay makalꞌngngan sangay min kapaganak ma iya. 9 Akale toꞌongan aꞌa itu ma bissala si Paul. Pinatongan iya pahāp, ati kinataꞌuwan eꞌ si Paul in aꞌa itu taga-pangandol ma si Isa in iya kauliꞌan du eꞌna. 10 Manjari pinatanog eꞌ si Paul suwalana, yukna, “Anꞌngge ka pabontol!” Magtūy pabuwang aꞌa inān anꞌngge maka eꞌna lumꞌngngan.
11 Pagꞌndaꞌ baꞌanan aꞌa inān ma bay tahinang si Paul eꞌ, magtūy sigām angolang ma bahasa sigām Likauna, yuk-i, “Itiyaꞌ saga tuhan magpasalupa manusiyaꞌ pareyoꞌ ni kitam.” 12 Manjari aniyaꞌ ōn tuhan ya pangōn saga aꞌa inān ma disi Paul. Si Siyus ya pangōn sigām ma si Barnabas, maka si Hermes ya pangōn sigām ma si Paul sabab in iya bibissalahun. 13 Ya lumaꞌ pangarapan ma tuhan Siyus, inaꞌan ma luwasan lawang daꞌira. Manjari aniyaꞌ sapiꞌ mandangan ginuyud ni atag lawang inān eꞌ imam maghinang ni tuhan Siyus. Aniyaꞌ isab tuhugan sumping tabowana sabab in iya maka kahekaꞌan aꞌa inān bilahi anumbaliꞌ sapiꞌ pangahulmat sigām ma disi Paul.
14 Sagōꞌ pagtaꞌu si Barnabas maka si Paul bang ai song nihinang eꞌ saga aꞌa inān, magtūy gineret sꞌmmek sigā, tandaꞌ sin susa sigā. Sakali paragan sigā ni tꞌngngaꞌ pagtimukan aꞌa inān maka eꞌ sigā angolang, yuk-i, 15 “Oy, saga tuwan! Angay buwattilu hinangbi ma kami? Manusiyaꞌ du kami buwat kaꞌam. Ya poꞌon kami piꞌitu sabab lapal ahāp ya pangahaka kami ma kaꞌam, supaya kam pataikut min pagtuhananbi ilu, ya halam aniyaꞌ kapūsanna. Bay kami piꞌitu boꞌ kam papinda ni Tuhan ya kakkal salama-lama, ya bay amapanjari langit maka gintanaꞌan maka tahik sampay kakayaꞌ-kayaꞌanna kamemon. 16 Ma masa awal in kabangsa-bangsahan kamemon bay pinasagaran eꞌ Tuhan ameyaꞌ ma ai-ai kabayaꞌan sigām. 17 Sagōꞌ minsan buwattēꞌ, aniyaꞌ na paꞌin saksiꞌ pamamattan manusiyaꞌ pasal kapagtuhanna. Pinaꞌndaꞌan eꞌna kahāpna, binuwanan kam ulan pamusug tinanombi boꞌ aniyaꞌ buwaꞌna bang taꞌabut musimna. Pinaniyaꞌan kam pagkakan aheka, maka pinalasig ataybi.” 18 Minsan buwattēꞌ pamahati disi Paul mbal agon pahawid saga aꞌa. Subay magkulban toꞌongan ni sigām.
19 Manjari itu aniyaꞌ atꞌkka ni daꞌira Listara heꞌ saga Yahudi bay min Antiyuk ma Pisidiya maka aniyaꞌ min Ikuni. Jari tabowa-bowa eꞌ sigām saga katimukan aꞌa inān, ati pinagbantung si Paul. Puwas eꞌ ginuyud iya eꞌ sigām tudju paluwas min kalumaꞌan inān pagka kinabāꞌ amatay na. 20 Sagōꞌ kapagtimukan paꞌin si Paul eꞌ saga bebeyaꞌan si Isa, magtūy iya anꞌngge boꞌ pabīng ni deyom daꞌira. Pagkꞌllat llaw dakayuꞌ, palanjal iya maka si Barnabas tudju ni Derbe.
Pabalik disi Paul ni Antiyuk ma Siriya
21 Mahēꞌ paꞌin sigā ma Derbe, ninasihat eꞌ sigā lapal ahāp ni saga aꞌa mahēꞌ, ati aheka tabowa ameyaꞌ ma si Isa. Puwas eꞌ, pabīng sigā ni Antiyuk labay min Listara maka Ikuni. 22 Pinahogot eꞌ disi Paul iman saga bebeyaꞌan si Isa mahēꞌ. Sinōꞌ sigām patꞌttog angandol ma Tuhan. Yuk panduꞌ disi Paul, “Subay aheka katiksaꞌan kalabayanta boꞌ kita pinasōd ni deyom pagparintahan Tuhan.” 23 Aniyaꞌ aꞌa ginꞌllal eꞌ sigā pagmattoꞌahan saga jamaꞌa si Isa Al-Masi, maingga-maingga aniyaꞌ lahat pagtipunan sigām. Amuwasa disi Paul sampay angamuꞌ-ngamuꞌ boꞌ pajagahanna saga aꞌa inān ma Tuhan, ya pangandolan na eꞌ sigām. 24 Tauntas paꞌin lahat Pisidiya eꞌ disi Paul, atꞌkka sigā ni Pampiliya. 25 Palanjal isab ni daꞌira Perga, boꞌ ninasihat eꞌ sigā lapal Tuhan mainaꞌan. Puwas eꞌ palūd sigām tudju ni Attali.
26 Aleha na sigā minnēꞌ boꞌ pabīng ni Antiyuk dakayuꞌ, ni saga bebeyaꞌan si Isa ya bay amajagahan sigā ma Tuhan boꞌ makahinang ai-ai pangahandakna. 27 Makatandan paꞌin sigā ni Antiyuk, pinatipun eꞌ sigā saga jamaꞌa si Isa mainaꞌan. Nihakaꞌan sigām eꞌ disi Paul kamemon bay tahinang sigā, ma sabab tabang min Tuhan. Kabuwanan labayan konoꞌ saga bangsa nggaꞌi ka Yahudi boꞌ supaya makapangandol ma si Isa. 28 Atꞌggol disi Paul paralahat ma saga bebeyaꞌan si Isa mainaꞌan ma Antiyuk.