13
Si Barnabas maka si Saul Pinatuntul
1 Na, ma saga jamaꞌa si Isa ma Antiyuk, aniyaꞌ saga aꞌa magpalatun lapal min Tuhan, maka aniyaꞌ isab magpanduꞌ saga lapalna. Sigām itu ya na si Barnabas, si Simiyun ya niranglay Ettom, si Lukiyus min Kirini, si Saul, maka si Manaꞌen ya bay dasuligan maka gubnul Herod. 2 Manjari itu, ma sabu paꞌin sigām amudji Tuhan maka amuwasa, amissala Rū Sussi, yuk-i, “Pasaddihinbi aku si Barnabas maka si Saul ilu, boꞌ tahinang ya pamahinangku ma sigām.” 3 Aubus paꞌin eꞌ sigām angamuꞌ-ngamuꞌ ni Tuhan maka amuwasa, amatꞌnnaꞌ sigām tangan ma duwangan itu boꞌ yampa pinalanjal.
Ma Pūꞌ Kiprus
4 Manjari, pagka si Barnabas maka si Saul itu sinōꞌ palꞌngngan eꞌ Rū Sussi, palūd sigā tudju ni Siluki boꞌ yampa aleha minnēꞌ tudju ni pūꞌ Kiprus. 5 Atꞌkka paꞌin sigā ni pūꞌ inān, ni kauman Salamis, ninasihat eꞌ sigā lapal Tuhan ma deyom saga kalanggalan Yahudi. Si Yahiya Markus ya aneheꞌan sigā anabang.
6 Alatag eꞌ sigā kaluhaꞌan pūꞌ inān sampay taꞌabut kauman Papos. Jari aniyaꞌ talanggal eꞌ sigā mainaꞌan aꞌa maghikmat, ōnna si Bal-Isa, bangsa Yahudi. Magnahuꞌ-nahuꞌ iya amalatun lapal min Tuhan. 7 Magbagay asal si Bal-Isa maka si Sirgus Paulus, ya gubnul ma pūꞌ inān. Gubnul itu asal alalom pangitaꞌuna. Na, pinalinganan si Barnabas maka si Saul eꞌ gubnul sabab bilahi iya akale lapal Tuhan.
8 Sagōꞌ sinaggaꞌ duwangan itu eꞌ aꞌa maghikmat inān. (Elimas ōnna dakayuꞌ.) Ya poꞌon anaggaꞌ si Elimas itu, sabab mbal bilahi bang gubnul inān gantaꞌ magkahagad ma lapal Tuhan. 9 Jari kahōpan Rū Sussi si Saul (ya niōnan isab si Paul). Pinandang eꞌna aꞌa maghikmat inān. 10 Yuk si Paul ma iya, “Anak saitan! Pangangakkal! Jahulakaꞌ! Ai-ai makahāp saggaꞌnu sadja. Mbal ka pahali amabengkok kalꞌngnganan bꞌnnal ya min Panghūꞌ! 11 “Buwattinaꞌan tꞌkkahan ka balaꞌ min Tuhan. Abuta du ka, atꞌggol-tꞌggol ya mbal kaꞌndaꞌnu sawa llaw.”
Saruꞌun-duꞌun du angalendom pangꞌndaꞌ si Elimas, ati paꞌagap-agap iya amiha aꞌa angambit iya. 12 Pagꞌndaꞌ inaꞌan-i eꞌ gubnul, magkahagad na iya sabab ainu-inu iya ma pamanduꞌ si Paul pasal Panghūꞌ Isa.
Atꞌkka disi Paul ni Antiyuk ma Lahat Pisidiya
13 Na, aleha disi Paul min Papos tudju ni Perga, dakayuꞌ daꞌira ma lahat Pampiliya. Atꞌkka paꞌin sigām pinaꞌan, angꞌbba si Yahiya Markus min sigā ati amoleꞌ pehēꞌ ni Awrusalam. 14 Pauntas si Paul maka si Barnabas min Perga sampay atꞌkka na ni Antiyuk, ya Antiyuk mahēꞌ ma lahat Pisidiya. Pagꞌllaw Sabtuꞌ, llaw mulliya ma bangsa Yahudi, pasōd sigā ni deyom langgal Yahudi aningkōꞌ mainaꞌan. 15 Aniyaꞌ binassa mainaꞌan min Kitab Tawrat maka min Kitab Kanabi-nabihan. Puwas eꞌ anambuku saga nakuraꞌ langgal ma disi Paul, yuk-i, “Saga danakan, bilahi kami bang aniyaꞌ bissalabi pamatꞌttog iman saga aꞌa itu.”
16 Anꞌngge si Paul maka eꞌna aninyal boꞌ yampa iya amissala ni saga aꞌa. Yukna, “Kaꞌam saga pagkahiku bangsa Israꞌil, sampay kaꞌam ya amudji Tuhan min bangsa saddī, kalehunbi aku. 17 Saga kaꞌmboꞌ-mboꞌan kami bay tapeneꞌ eꞌ Tuhan, ya asal pagtuhanan kami bangsa Israꞌil. Pinaheya eꞌna bangsa Israꞌil waktu kamahēꞌ sigām ma lahat Misil. Pinaluwas sigām eꞌna min lahat inān min kosog kawasana. 18 Mpatpūꞌ tahun sigām sinabalan eꞌ Tuhan ma lahat paslangan. 19 Pituꞌ bangsa bay pinakaꞌat eꞌ Tuhan ma lahat Kanaꞌan, ati pamasukuꞌ eꞌna lahat inān ma saga aꞌa sukuꞌna. 20 Ya tꞌggol saga pakaradjaꞌan inān saga mpat hatus maka limampūꞌ tahun.
“Puwas eꞌ,” yuk si Paul, “pinatꞌnnaꞌan sigām eꞌ Tuhan saga aꞌa maghukum. Taꞌabut paꞌin ni nabi Samwel ya na heꞌ katobtobanna. 21 Puwas eꞌ, angamuꞌ sigām sultan magagian sigām, angkan pineneꞌ eꞌ Tuhan si Saul anak si Kīs, tubuꞌ si Benjamin. Ati si Saul ya pinatꞌnnaꞌ magsultanan sigām ma deyom mpatpūꞌ tahun. 22 Manjari si Saul eꞌ bay nilaꞌanan eꞌ Tuhan min pagsultananna, ati si Daꞌud ya pinagantiꞌ magsultan. Ya na itu bay pangallam Tuhan ma pasal si Daꞌud eꞌ, yukna, ‘Si Daꞌud, anak si Jesse itu, aꞌa makasulut atayku. Nihinang eꞌna kamemon kabayaꞌanku.’
23 “Na,” yuk si Paul, “min tubuꞌ si Daꞌud asal si Isa, ya bay pinatꞌnnaꞌ eꞌ Tuhan angalappas ma bangsa Israꞌil, panuhulna janjiꞌna bay ma masa awal eꞌ. 24 Ma halam giꞌ bay tinagnaꞌan eꞌ si Isa hinangna, bay magnasihat si Yahiya ma bangsa Israꞌil kamemon. Sinōꞌ sigām eꞌ si Yahiya angꞌbba min dusa, ati pinandi taubat. 25 Na, song paꞌin aubus eꞌ si Yahiya ai-ai bay pamahinang iya eꞌ Tuhan, amissala iya ma bangsa Israꞌil, yukna, ‘Bang ma pamikilbi, sai bahāꞌ aku itu? Nggaꞌi ka aku ya lagaranbi. Sagōꞌ aniyaꞌ aꞌa dangan pasunuꞌ min aku. Mbal aku tōp minsan angahubaran engkot taumpaꞌna.’
26 “Na, saga danakanku bangsa Israꞌil, sasuku kam panubuꞌ si Ibrahim, sampay kaꞌam min kabangsahan saddī ya angisbat Tuhan, kitam koꞌ ya pinakalehan lapal itu, manjari lappasan du kitam min hukuman dusa. 27 Saga aꞌa Awrusalam maka saga nakuraꞌ sigām, halam makakilā ma si Isa. Malaingkan, pagka iya pinatꞌnnaꞌan eꞌ sigām hukuman ni kamatay, tatuman eꞌ sigām pagkallam kanabi-nabihan ya pinagbassa ma saga langgal Yahudi kahabaꞌ Sabtuꞌ. 28 Minsan halam aniyaꞌ tabāk eꞌ sigām sababan pamapatay iya, bay sigām angamuꞌ ni gubnul Pilatu sinōꞌ iya pinapatay. 29 Manjari itu, aubus paꞌin pinamattan eꞌ saga aꞌa Awrusalam kamemon bay tasulat ma deyom Kitab pasal si Isa, pinareyoꞌ mayatna min hāg boꞌ yampa kinubul. 30 Saguwāꞌ pinakallum iya eꞌ Tuhan min kamatayna. 31 Jari allum paꞌin iya pabīng, araran iya taꞌndaꞌ eꞌ saga aꞌa bay seheꞌna magbeyaꞌ, min lahat Jalil giꞌ sampay ni Awrusalam. Jari ma buwattinaꞌan saga aꞌa bay seheꞌna heꞌ anaksiꞌ na ma pasalna ni saga bangsa Israꞌil.
32 “Na,” yuk si Paul, “itiyaꞌ kami maitu amasampayan kaꞌam lapal ahāp. Hatina ya bay panganjanjiꞌ Tuhan ma kaꞌmboꞌ-mboꞌantam 33 tatuman na ma kitam saga panubuꞌ sigām. Sabab tapakallum eꞌna si Isa. Magmattan toꞌongan ya bay tasulat ma deyom Kitab Jabul, ma kalangan karuwana. Yuk Tuhan eꞌ,
‘Kaꞌa ya anakku,
llaw itu pamataꞌuku in aku mmaꞌnu.’
34 Ya na itu isab pangallam Tuhan pasal pamakallumna si Isa pabalik min kamatayna, mbal pinahaluꞌ ma deyom gumi. Yukna,
‘Buwananta ka saga kahāpan tantu,
ya kahāpan bay janjiꞌku ma si Daꞌud.’
35 Takallam isab ma ayat kitab dakayuꞌ, ya yuk-i,
‘Mbal pasagarannu angahaluꞌ ma deyom gumi
sosohoꞌannu asussi atayna.’
36 “Si Daꞌud ma waktu bay kallumna, bay makahinang kamaksuran Tuhan. Puwas eꞌ amatay iya. Takubul iya ma atag bay pangubulan saga kamattoꞌahanna ati angahaluꞌ na baranna. 37 Sagōꞌ ya pinakallum eꞌ Tuhan min kamatayna itu, halam angahaluꞌ.
38-39 “Na, saga dauranakanku, subay kataꞌuwanbi toꞌongan, minsan buwattingga eꞌbi amogbogan saraꞌ si Musa mbal du kam makapuwas min dusa. Sagōꞌ sasuku kam angandol ma si Isa, apuwas na kam min dusabi kamemon. Angkan lapal pasal si Isa itu ninasihatan kaꞌam na boꞌ kataꞌuwanbi aniyaꞌ kaꞌampunan dusabi. 40 Na, kamayaꞌ-mayaꞌ kam boꞌ mbal patꞌkka ni kaꞌam ya bay tasulat eꞌ kanabi-nabihan, ya yuk-i,
41 ‘Kaꞌam pangungudjuꞌ ilu, ndaꞌunbi ba!
Painu-inuhanta kam toꞌongan boꞌ kam magmula, yuk Tuhan.
Sabab aniyaꞌ hinangku ma waktu kallumbi lagiꞌ,
hinang mbal kahagadbi, minsan kam pinahati.’ ”
Minnēꞌ aubus bissala si Paul.
42 Jari itu, makaluwas paꞌin si Paul maka si Barnabas min langgal eꞌ, sinōꞌ sigām pabīng eꞌ saga aꞌa inān ma Sabtuꞌ balik amissala pabalik ma pasal inaꞌan-i. 43 Makalaꞌan paꞌin isab saga aꞌa bay ma langgal eꞌ, aheka saga aꞌa bay paturul ma si Paul maka si Barnabas, saga bangsa Yahudi maka saga aꞌa bangsa saddī ameyaꞌ na ma agama Yahudi. Binissalahan saga aꞌa inān eꞌ disi Paul, sinōꞌ sigām patꞌttog ma tatabangan Tuhan.
44 Pagsabtuꞌ balik paꞌin, agon kamemon saga aꞌa min daꞌira Antiyuk inān magtipun pinaꞌan akale ma lapal Tuhan. 45 Saguwāꞌ, pagꞌndaꞌ saga Yahudi kaseheꞌan ma baꞌanan aꞌa sikatimukan inān, magtūy sigām angihid ma si Paul, angkan nijawab bissalana eꞌ sigām. Pinahinaꞌ isab iya.
46 Sagōꞌ gom paꞌin paesog si Paul maka si Barnabas amissala. Yuk sigā ma saga aꞌa angihid eꞌ, “Kaꞌam saga Yahudi wajib nilapalan palman Tuhan dahū. Sagōꞌ, pagka sulakbi palman itu ati mbal kam amista di-bi in kaꞌam tōp pinaniyaꞌan kallum taptap ni kasaumulan, ahāp lagiꞌ kami angꞌbba min kaꞌam. Papinda na kami magnasihat ni saga kabangsahan saddī. 47 Sabab ya itu bay panohoꞌan Tuhan ma kami, yuk-i,
‘Saliꞌ kam sapantun sawa patꞌnnaꞌku pamasawa saga kabangsahan saddī,
supaya makaꞌabut lapal itu ni mpat pidju alam,
hatina in manusiyaꞌ kamemon makajari lappasan.’ ”
48 Takale paꞌin bissala itu eꞌ saga aꞌa bangsa saddī, magtūy sigām kinōgan ati pinaheya eꞌ sigām lapal Tuhan. Manjari magkahagad na ma si Isa sasuku tapeneꞌ eꞌ Tuhan pinaniyaꞌan kallum taptap ni kasaumulan.
49 Patanyag na paꞌin lapal Tuhan ma kaluhaꞌan lahat inān. 50 Saguwāꞌ saga pagnakuraꞌan ma daꞌira Antiyuk inān maka saga dꞌnda bangsahan ya magtaꞌat ni Tuhan, bay niꞌisihan lling eꞌ saga Yahudi. Sinōꞌ sigām angalaꞌat si Paul maka si Barnabas, angkan sigā duwangan itu bay pinalaꞌan eꞌ saga aꞌa inān min jadjahan eꞌ-i. 51 Sakali pinaspasan eꞌ disi Paul bagunbun min tapeꞌ sigā, saksiꞌ in sigā papuwas na min saga aꞌa ma lahat inān. Puwas eꞌ palanjal sigām tudju ni lahat Ikuni. 52 Sagōꞌ saga kamuliran si Isa ma daꞌira eꞌ, kinōgan makalanduꞌ maka kahōpan isab eꞌ Rū Sussi.