12
Kalꞌppa si Petros min Kalabusu
1 Ma waktu inaꞌan, anagnaꞌ sultan Herod anaggaw saga jamaꞌa si Isa kaseheꞌan bahasa nilaꞌugan. 2 Bay paponggolanna kōk si Yakub ya danakan si Yahiya. 3 Jari makataꞌu paꞌin si Herod in saga Yahudi inān kasulutan ma hinangna, bay isab sohoꞌna sinaggaw si Petros. Ya waktu panaggaw ma si Petros itu pasaltaꞌ ma Hinang Tinapay Halam Pasuligna. 4 Tasaggaw paꞌin si Petros, sinohoꞌ iya kinalabusu eꞌ sultan. Mpat baꞌan sundalu bay sinōꞌ anganjagahan si Petros, mpat-mpat sigām ma dambaꞌan. Ya garaꞌ si Herod subay pinalabay giꞌ Hinang Paglakad boꞌ yampa nihukum si Petros ma mata mairan.
5 Angkan tinahan si Petros ma deyom kalabusu, sagōꞌ angamuꞌ-ngamuꞌ saga aꞌa jamaꞌa si Isa ma sababna.
6 Na, ma sangom song pangahukum sultan Herod ma si Petros, inaꞌan iya atuli ma llot duwa sundalu. Binaggot iya maka duwa kilikili, maka aniyaꞌ isab saga sundalu anganjagahan lawang kalabusu inān. 7 Pataghaꞌ aniyaꞌ dakayuꞌ malaꞌikat min Panghūꞌ panyataꞌ pehēꞌ, maka asawa deyom kalabusu. Niꞌntanan iya ma bahana eꞌ malaꞌikat eꞌ, kinudjal boꞌ binatiꞌ. “Palꞌkkas ka!” yuk malaꞌikat itu. “Pabungkal ka!” Magtūy apakpak kilikili min tangan si Petros. 8 Yuk malaꞌikat ni iya, “Asintoron ka maka ataumpaꞌ.” Bineyaꞌ magtūy eꞌ si Petros. “Sulugun badjuꞌnu boꞌ ka paturul ma aku,” yuk malaꞌikat. 9 Manjari tinurul malaꞌikat inān eꞌ si Petros paluwas min kalabusu. Saguwāꞌ halam kinataꞌuwan eꞌ si Petros bang bꞌnnal ya hinang malaꞌikat inān atawa mbal. Pangannalna hal bay pabagala ni iya. 10 Palabay sigā min jaga dakayuꞌ boꞌ ni jaga pasunuꞌ, sampay sigā makaꞌabut ni tambol basiꞌ ya ma lawang paluwasan ni daꞌira. Magtūy aukaban di-na tambol inān, ati paluwas sigā minnaꞌan. Lumꞌngngan sigā ma katahaꞌan dakayuꞌ lān inān, jari saruꞌun-duꞌun du alaꞌan malaꞌikat min si Petros.
11 Paglaꞌan malaꞌikat, na yampa tasayu eꞌ si Petros ya bay talabayna. Yukna, “Ā, kataꞌuwanku na, bꞌnnal toꞌongan koꞌ itu. Malaꞌikat eꞌ bay pinabeyaꞌ eꞌ Tuhan amalꞌppa aku min deyom pangꞌntanan si Herod maka min kalaꞌatan kamemon ya kinabayaꞌan eꞌ saga Yahudi nihinang ma aku.”
12 Tasayuna paꞌin, magtūy iya pehēꞌ ni lumaꞌ si Mariyam, inaꞌ si Yahiya Markus. Aheka aꞌa bay magtimuk mainaꞌan angamuꞌ-ngamuꞌ ni Tuhan. 13 Kinukuꞌ eꞌ si Petros lawang lumaꞌ ati aniyaꞌ ipatan dꞌnda niōnan Roda pehēꞌ angꞌndaꞌ bang sai. 14 Tapanhidna lagam si Petros. Jari lumanduꞌan kakōganna, angkan halam minsan taukabna lawang. Gom paꞌin iya paraiꞌ-daiꞌ pareyom pabīng boꞌ angahakaꞌan kaseheꞌanna in si Petros inaꞌan anꞌngge ma luwasan. 15 “Oy! Binelaw koꞌ kaꞌa ilu!” yuk sigām ni si Roda. Sagōꞌ binalik-balikan eꞌna, in si Petros bꞌnnal inaꞌan. Jari yuk sigām, “Malaꞌikatna koꞌ heꞌ.”
16 Sagōꞌ halam pahali angukuꞌ si Petros, angkan niukab eꞌ sigām lawang. Pagꞌndaꞌ sigām ma si Petros, takꞌbbal atay sigām. 17 Aninyal si Petros, anohoꞌ sigām daꞌa ahidjul boꞌ hakaꞌanna sigām bang buwattingga eꞌ Tuhan bay amalꞌppa iya min deyom kalabusu. Yuk si Petros, “Hakaꞌinbi konoꞌ si Yakub maka saga danakantam kaseheꞌ pasal ītu.” Puwas eꞌ alaꞌan iya minnēꞌ tudju ni lahat saddī.
18 Pagkꞌllat llaw paꞌin, aheya kahiluhalaꞌan ma saga sundalu bay jaga inān sabab waꞌi daka maꞌai si Petros. 19 Anguldin sultan Herod, sinōꞌ piniha toꞌongan si Petros. Sagōꞌ halam iya tabāk. Manjari sinumariya eꞌ si Herod saga jaga heꞌ boꞌ sohoꞌna sigām pinapatay. Puwas eꞌ palūd sultan Herod min lahat Yahudiya paliyu ni Kesareya, patꞌnnaꞌ mahēꞌ daka pilangꞌllaw.
Kamatay Sultan Herod
20 Ma masa inān akagit toꞌongan atay sultan Herod ma saga aꞌa ma lahat Tira maka ma lahat Sidun, angkan saga aꞌa min karuwa daꞌira heꞌ bay magbeyaꞌ paꞌalop ni iya. Dahū binagay eꞌ sigām si Blastus, dakayuꞌ bataꞌan ya pangandolan sultan, supaya iya amogbogan sigām. Manjari pehēꞌ na sigām ni si Herod pamaꞌap, sabab min lahat sultan ya pangāꞌan sigām balanjaꞌ.
21 Sakali itu, taꞌabut paꞌin llaw bay tinugilaꞌ, amakay na si Herod pakayanna pagsultan. Aningkōꞌ iya ma tingkōꞌan pagsultananna, maka eꞌna amaluwas bissalana ma katimukan aꞌa inān. 22 Angolang pakosog saga aꞌa inān. “Nggaꞌi ka manusiyaꞌ ya amissala ilu,” yuk sigām, “sagōꞌ dakayuꞌ tuhan!” 23 Magtūy si Herod taluwaꞌ balaꞌ eꞌ malaꞌikat Tuhan sabab halam bay paheyana Tuhan. Manjari itu amatay iya eꞌ ulat bay amangan isina.