11
Amahati si Petros Pasal Kahinanganna
1 Sakali itu takale eꞌ saga aꞌa kawakilan maka saga dauranakan bebeyaꞌan si Isa ma sakalibut lahat Yahudiya, pasal saga aꞌa nggaꞌi ka Yahudi bay makataimaꞌ lapal Tuhan. 2 Pagtukad paꞌin si Petros pabalik ni Awrusalam, magtūy iya sinoway eꞌ saga Yahudi bebeyaꞌan si Isa kaseheꞌ, aꞌa masi amogbog ma addat sigām magislam. 3 Yuk sigām, “Oy! Kaꞌa ilu bay pasōd ni deyom lumaꞌ saga aꞌa halam magislam, magsalu maka sigām!”
4 Angkan sigām pinahati eꞌ si Petros pasal kahālanna inān kamemon, sangay min katagnaꞌna. 5 Yukna, “Bay paꞌin aku anambahayang ma daꞌira Joppa inān, aniyaꞌ bay paꞌndaꞌ ni aku. Taꞌndaꞌku saliꞌ manta alambu, niengkotan tōngna kaꞌmpat, tinontonan pareyoꞌ min langit, pinatongod ni atagku. 6 Taꞌndaꞌku ma deyomna inān saga hayop, sattuwa talun, maka ai-ai maglelehan ma tanaꞌ, maka saga manuk-manuk. 7 Jari aniyaꞌ suwala takaleku ahꞌlling ni aku, yuk-i, ‘Anꞌngge ka, Petros. Anumbaliꞌ ka pinaꞌan boꞌ ka amangan.’ 8 Sagōꞌ yukku, ‘Ē, Panghūꞌ! Mbal aku! Tꞌggolku allum halam aniyaꞌ kinakan haram atawa lꞌmmis bay palabay min bowaꞌku!’ 9 Sagōꞌ takaleku suwala heꞌ ahꞌlling pabīng min deyom sulgaꞌ, yukna, ‘Daꞌa niōnan haram ai-ai tahalal eꞌ Tuhan.’ 10 Min tꞌllu pinahꞌlling buwattēꞌ boꞌ yampa pinaꞌangkat ai-ai inān kamemon pabīng ni sulgaꞌ.
11 “Saltaꞌ paꞌin inān, aniyaꞌ atꞌkka ni lumaꞌ paokomanku tꞌllungan lꞌlla bay sinōꞌ pehēꞌ ni aku min lahat Kesareya. 12 Jari sinōꞌ aku eꞌ Rū Sussi subay mbal hawal-hawal ameyaꞌ ma sigām. Bay aku sineheꞌan isab eꞌ saga danakantam nnom puhuꞌ, aꞌa min Joppa. Pagtꞌkka kami ni Kesareya pasōd na kami ni deyom lumaꞌ si Kornelos eꞌ. 13 Nihakaꞌan kami eꞌ si Kornelos pasal aniyaꞌ malaꞌikat bay taꞌndaꞌna anꞌngge ma deyom lumaꞌna, amissala ma iya. Yuk malaꞌikat konoꞌ, ‘Sōꞌun aꞌanu pehēꞌ ni Joppa angāꞌ dakayuꞌ aꞌa niōnan Simun, ya niōnan isab Petros. 14 Binowahan ka eꞌna lapal, maka lappasan du ka sampay saga seheꞌnu karalumaꞌ ilu.’
15 “Makatagnaꞌ paꞌin aku amissala ni disi Kornelos,” yuk si Petros, “pahōp Rū Sussi ni sigām buwat bay kahōp ni kitam tagnaꞌ. 16 Manjari taentomku ya bay lling Panghūꞌ, ya yuk-i, ‘Boheꞌ ya bay pamandi saga aꞌa eꞌ si Yahiya, sagōꞌ saddī ya pamandi kaꞌam. Pinasangon du Rū Sussi ni deyom baranbi.’ 17 Na,” yuk si Petros, “apastiꞌ na, ya pamuwan eꞌ Tuhan ma saga aꞌa nggaꞌi ka Yahudi, saliꞌ du maka bay pamuwanna ma kitam Yahudi pagka Panghūꞌ Isa Al-Masi ya pamꞌnnalantam. Jari sai sa aku itu? Mbal tasaggaꞌku Tuhan.”
18 Makakale paꞌin saga Yahudi inān ma bissala si Petros eꞌ, halam aniyaꞌ panganjawab sigām saddī. Sinanglitan Tuhan eꞌ sigām, yuk-i, “Bang buwattēꞌ kahālanna, saga kabangsahan nggaꞌi ka Yahudi kabuwanan du isab kahāpan eꞌ Tuhan boꞌ supaya sigām angꞌbba min dusa sigām sampay pinaniyaꞌan kallum kakkal.”
Palhimpunan saga Jamaꞌa si Isa ma Antiyuk
19 Na, ma waktu bay pamapatay ma si Esteban, apulak-palik saga aꞌa magpangandol ma si Isa pagka sigām nilaꞌugan. Aniyaꞌ sigām kaseheꞌ bay makasampay ni lahat Piniki, ni pūꞌ Kiprus, sampay isab ni daꞌira Antiyuk. Ninasihat eꞌ sigām lapal ahāp, boꞌ Yahudi sadja ya pinakalehan. 20 Sagōꞌ aniyaꞌ sigām kaseheꞌ aꞌa min Kiprus maka min Kirini bay pehēꞌ ni Antiyuk, ati magnasihat lapal ahāp pasal Panghūꞌ Isa sampay ni saga aꞌa nggaꞌi ka Yahudi. 21 Inaꞌan kawasa Tuhan ma pagnasihat sigām, angkan aheka toꞌongan saga aꞌa Antiyuk bay magkahagad sampay papinda ni Panghūꞌ Isa.
22 Jari itu takale eꞌ saga jamaꞌa si Isa ma Awrusalam pasal inaꞌan, angkan bay pinapinaꞌan eꞌ sigām si Barnabas ni Antiyuk. 23 Atꞌkka paꞌin si Barnabas pinaꞌan, taꞌndaꞌna ya kaheya tabang Tuhan ma saga aꞌa inān. Kinōgan iya maka eꞌna anohoꞌ sigām patꞌttog angandol ma Panghūꞌ min deyom atay sigām. 24 Si Barnabas itu ahāp addatna, aꞌa iya kahōpan asal eꞌ Rū Sussi maka akosog pangandolna. Manjari aheka aꞌa ma Antiyuk bay tabowana angandol ma Panghūꞌ Isa.
25 Puwas eꞌ, pehēꞌ na si Barnabas ni daꞌira Tarsus amiha si Saul. 26 Tabākna paꞌin, binowa eꞌna si Saul pabīng ni Antiyuk. Dantahun ya tꞌggol si Barnabas maka si Saul patꞌnnaꞌ ma jamaꞌa si Isa mainaꞌan, ati aheka toꞌongan saga aꞌa bay pinanduꞌan eꞌ sigā karuwangan. Ma Antiyuk ya bay tagnaꞌ pangōn ‘Almasihin’ ma saga bebeyaꞌan si Isa.
27 Manjari itu, ma timpu heꞌ-i du, aniyaꞌ bay palūd min Awrusalam tudju ni Antiyuk saga aꞌa magpalatun lapal min Tuhan. 28 Aniyaꞌ dangan min sigām niōnan Agabus bay anꞌngge angallam ma pasal waktu sinōng, boꞌ min kawasa Rū Sussi. Yuk si Agabus, “Aniyaꞌ gotom song patꞌkka ni kalahat-lahatan kamemon.” (Subay na waktu kapagsultan sultan Klaudi boꞌ yampa patꞌkka gotom itu.) 29 Angkan saga kamuliran ma Antiyuk bay anganiyat amabeyaꞌ tulung ni saga dauranakan ma lahat Yahudiya, pila-pila takoleꞌ eꞌ sigām dangan maka dangan. 30 Jari sīn inān bay pinabowa ma si Barnabas maka ma si Saul tudju ni saga pagmattoꞌahan ma katipunan jamaꞌa si Isa ma Awrusalam.