10
Si Petros maka si Kornelos
1 Na, aniyaꞌ aꞌa ma lahat Kesareya niōnan si Kornelos. Kapitan iya ma dakayuꞌ baꞌanan sundalu Rōm, ya niōnan ‘Baꞌanan Itali’. 2 Si Kornelos itu dakayuꞌ aꞌa magtataꞌat. Sigām magtaiꞌanak magmatāw asal ma Tuhan. Aheya isab panulungna ma saga Yahudi sasuku kasigpitan, maka atukid iya anambahayang ni Tuhan. 3 Dakayuꞌ llaw saga lisag tꞌllu kohap, aniyaꞌ magpanyataꞌ ni si Kornelos, ati taꞌndaꞌna toꞌongan malaꞌikat min Tuhan. Ya pahꞌlling malaꞌikat ma iya, “O Kornelos!”
4 Pinatongan malaꞌikat inān eꞌ si Kornelos, jari niumagad iya. “Ai gawinu ma aku, tuwan?” yukna.
Yuk malaꞌikat, “Kapandogahan eꞌ Tuhan panabbutnu ilu maka panulungnu ma saga miskin, ati kinannal ka eꞌna. 5 Sohoꞌun saga tendognu pehēꞌ ni Joppa angāꞌ dakayuꞌ aꞌa niōnan Simun, ya niōnan isab Petros. 6 Inaꞌan iya paokom ma lumaꞌ si Simun, ya magaꞌadjal kuwit hayop. Inaꞌan lumaꞌna ma bihing tahik.”
7 Makalaꞌan paꞌin malaꞌikat bay ahꞌlling eꞌ, nilinganan eꞌ si Kornelos duwa ipatanna maka dakayuꞌ sundalu, tendogna lissi, aꞌa magtaꞌat ni Tuhan. 8 Kahakaꞌan sigām katꞌllungan itu eꞌ si Kornelos pasal kamemon bay tumꞌkka inān, boꞌ yampa sigām patulakna pehēꞌ ni Joppa.
9 Pagsalung, saga waktu ugtu na, ma song paꞌin atꞌkka tꞌllungan itu ni Joppa, pariyataꞌ si Petros ni karatagan atop lumaꞌ boꞌ anambahayang. 10 Mbal atꞌggol, lingantu iya ati bilahi iya amangan. Jari itu, pasaltaꞌ paꞌin niadjal kinakanna, aniyaꞌ paꞌndaꞌ ni iya. 11 Taꞌndaꞌna langit paukab maka aniyaꞌ taꞌndaꞌna saliꞌ luwa manta alambu bay niengkotan ma kaꞌmpat tōngna, inaꞌan tinontonan pareyoꞌ ni dunya. 12 Ya pakandung ma deyom manta inān kamemon ginisan hayop, maka saga ai-ai maglelehan, maka saga manuk-manuk. 13 Jari aniyaꞌ suwala takale eꞌ si Petros ahꞌlling ni iya, yuk-i, “Anꞌngge ka, Petros. Anumbaliꞌ ka pinaꞌan boꞌ ka amangan!”
14 Sagōꞌ anambung si Petros, yukna, “Ē, Panghūꞌ, mbal aku! Tꞌggolku allum halam aku bay makakakan haram atawa ai-ai alꞌmmis.”
15 Takalena suwala inān ahꞌlling pabīng, yukna, “Daꞌa ōnin haram bang tahalal eꞌ Tuhan!” 16 Min tꞌllu ahꞌlling buwattēꞌ boꞌ yampa pinaꞌangkat ai-ai inān pabīng ni sulgaꞌ.
17 Manjari itu, ma sabu si Petros masi angandongdong bang ai hatina ya bay taꞌndaꞌna inān, tatuliꞌ na lumaꞌ si Simun eꞌ saga aꞌa bay sinōꞌ pinaꞌan eꞌ si Kornelos. Inaꞌan na sigām angagad ma bowaꞌ lawang 18 angalingan. Atilaw sigām ni aꞌa lumaꞌ, yuk sigām, “Owaꞌ! Aniyaꞌ bahāꞌ paokom maitu aꞌa niōnan Simun, ya niōnan isab Petros?”
19 Sasang si Petros masi angandongdong bang ai hatina bay taꞌndaꞌna inān, na, ahꞌlling Rū Tuhan ni iya, yukna, “Simun, ilu aniyaꞌ tꞌllungan aꞌa amiha kaꞌa. 20 Anꞌngge na ka boꞌ ka pareyoꞌ. Daꞌa ka hawal-hawal ameyaꞌ ma sigām sabab aku ya bay anohoꞌ sigām piꞌitu.”
21 Angkan pareyoꞌ si Petros ati yukna ni tꞌllungan inān, “Aku na koꞌ ya aꞌa pihabi ilu. Ai gawibi?”
22 Yuk tꞌllungan inān, “Bay kami sinōꞌ piꞌitu eꞌ Kapitan Kornelos. Aꞌa ahāp addatna. Magtataꞌat iya ma Tuhan maka pinagaddatan eꞌ saga Yahudi kamemon. Bay iya nihakaꞌan eꞌ malaꞌikat sussi, sinōꞌ anambukuhan kaꞌa. Jari pehēꞌ na ka ni lumaꞌna supaya takalena bang ai pamissalanu ma iya.” 23 Manjari tꞌllungan inān bay sinōꞌ pasōd eꞌ si Petros, ati nihulmat eꞌna ma sangom inān.
Pagsubu paꞌin, magsakap na si Petros boꞌ ameyaꞌ ma saga aꞌa inān. Aniyaꞌ isab saga dauranakanna bebeyaꞌan si Isa min Joppa aneheꞌan sigām. 24 Pagꞌllaw dakayuꞌ, atꞌkka na sigām ni Kesareya. Inaꞌan asal si Kornelos angalagaran sigām, maka inaꞌan isab saga kampungna maka saga panonna bay sohoꞌna patipun pinaꞌan. 25 Sōng paꞌin pasōd si Petros, sinampang iya eꞌ si Kornelos. Pasujud iya ma dahuwan si Petros angahulmat iya. 26 Sagōꞌ sinōꞌ iya anꞌngge eꞌ si Petros. “Pabuhat ka,” yukna. “Manusiyaꞌ du aku, saliꞌ kaꞌa.”
27 Magsuli-suli sigā karuwangan sabu sigā pareyom ati aheka aꞌa taꞌndaꞌ eꞌ si Petros magtimuk mainaꞌan. 28 Yukna ni sigām, “Kataꞌuwanbi, bang ma agama kami Yahudi, mbal kami makajari maglamud maka bangsa nggaꞌi ka Yahudi. Mbal kami makajari minsan patibaw ni buwat kaꞌam itu. Sagōꞌ bay aku pinataꞌu eꞌ Tuhan subay halam aniyaꞌ manusiyaꞌ bistaku haram atawa alꞌmmis. 29 Angkan koꞌ, pagka aku bay tambukuhanbi piꞌitu, halam aku maginꞌmbal. Sagōꞌ tilawta kam, ai panambukuhanbi aku?”
30 Anambung si Kornelos, yukna, “Aniyaꞌ na tꞌllungꞌllaw palabay, saga buwattēꞌ waktu, bay aku ma deyom lumaꞌ itu anambahayang lisag tꞌllu kohap. Taghaꞌ aniyaꞌ anꞌngge paharap ni aku dakayuꞌ aꞌa angillap pamakayna. 31 Ahꞌlling aꞌa heꞌ ni aku, yukna, ‘Kornelos! Takale na eꞌ Tuhan ya bay amuꞌnu, maka kinannal isab eꞌna bay panulungnu ma saga miskin. 32 Sōꞌun aꞌanu ni Joppa angāꞌ piꞌitu dakayuꞌ aꞌa niōnan Simun, ya niōnan isab Petros. Inaꞌan iya paokom ma si Simun, aꞌa magaꞌadjal kuwit hayop. Inaꞌan lumaꞌna ma bihing tahik.’ 33 Na, ya heꞌ poꞌonna angkan ka bay tambukuhanku piꞌitu magtūy,” yuk si Kornelos. “Magsukul isab aku ni kaꞌa sabab itiyaꞌ na ka maitu. Maka itiyaꞌ isab kami kamemon magtimuk ma pangꞌndaꞌ Tuhan boꞌ kami akale ma ai-ai bay panohoꞌan kaꞌa eꞌ Panghūꞌ.”
Pamissala si Petros
34 Na, tinagnaꞌan eꞌ si Petros pamissalana ma saga aꞌa inān, yukna, “Buwattinaꞌan kamattanan na aku. Bꞌnnal toꞌongan, in manusiyaꞌ mbal pinagbiddaꞌ eꞌ Tuhan. 35 Sasuku magmatāw ma Tuhan sampay angahinang kabontolan, tinaimaꞌ du eꞌna minsan ai bangsa. 36 Kataꞌuwanbi lapal ya bay pinasampay eꞌ Tuhan ni bangsa Yahudi, lapal ahāp pasal kapaghāp manusiyaꞌ maka Tuhan sabab min bay tahinang eꞌ si Isa Al-Masi, ya pagpanghūꞌan asal ma kamemon. 37 Kataꞌuwanbi du pasal pakaradjaꞌan bay pinaniyaꞌ ma kaluhaꞌan lahat Yahudiya, ya tinagnaꞌan mahēꞌ ma lahat Jalil pagubus pandi taubat ya bay panganasihat eꞌ si Yahiya. 38 Kataꞌuwanbi pasal si Isa, aꞌa Nasaret, in iya bay pinaniyaꞌan Rū Sussi eꞌ Tuhan, maka binuwanan barakat. Bay iya angalatag kalumaꞌan maghinang ahāp. Maka sasuku isab bay ma pangꞌntanan nakuraꞌ saitan kauliꞌan eꞌna, sabab inaꞌan asal Tuhan ma iya.
39 “Jari kami itu,” yuk si Petros, “amuwan saksiꞌ ma pasal kamemon bay tahinang eꞌ si Isa ma lahat Yahudiya sampay ma Awrusalam. Bay iya pinagantung ma hāg pinapatay. 40 Malaingkan, taꞌabut paꞌin tꞌllumbahangi min kamatayna, bay iya pinakallum pabīng eꞌ Tuhan ati paꞌndaꞌanna iya ni saga aꞌa. 41 Nggaꞌi ka aꞌa kamemon bay pamaꞌndaꞌan. Luwal kami, ya tapeneꞌ eꞌ Tuhan subay anaksiꞌ ma pasal si Isa, hatina kami ya bay magsalu maka iya ma kallumna pabīng min kamatayna. 42 Sinōꞌ kami eꞌ si Isa itu magnasihat lapal ahāp ni saga aꞌa. Sinōꞌ isab kami anaksiꞌ ma pasalna, in iya kabuwanan kapatut eꞌ Tuhan angahukum ma manusiyaꞌ kamemon, ma saga allum giꞌ sampay ma saga magpatayan. 43 Ya du isab kanabi-nabihan kamemon, bay makasaksiꞌ isab ma pasalna. Ya yuk sigām, sasuku angandol ma si Isa niampun du paldusahan sigām sabab min kawasa ōnna.”
44 Saltaꞌ paꞌin si Petros amissala, pahōp Rū Sussi ma saga aꞌa inān ya akale ma lapalna. 45 Ainu-inu saga Yahudi magpangandol ma si Isa, ya bay seheꞌ si Petros min Joppa. Ya angkan sigām ainu-inu sabab pamuwan eꞌ Tuhan Rū-na Sussi sampay ma saga aꞌa nggaꞌi ka bangsa Yahudi. 46 Takale eꞌ sigām disi Kornelos amissala saga bahasa saddī maka eꞌ sigām ananglitan Tuhan. Ahꞌlling si Petros, yukna, 47 “Saga aꞌa itu kaniyaꞌan na Rū Sussi saliꞌ du maka kitam. Halam aniyaꞌ makasaggaꞌ bang sigām itu pinandi.” 48 Angkan sigām sinōꞌ eꞌ si Petros subay pinandi, paltandaꞌan in sigām ma si Isa Al-Masi. Jari itu niamuꞌ eꞌ disi Kornelos si Petros sinōꞌ lagiꞌ pahantiꞌ ma sigām pila-pilangꞌllaw.