Kahinangan 9

Si Saul Papinda na ni si Isa Al-Masi

¹ Saltaꞌ ma waktu inān masi si Saul ananggup amapatay saga mulid Panghūꞌ Isa. Pehēꞌ iya ni Imam Muwallam ² angamuꞌ sulat kataddangan, binowa ni saga kalanggalan mahēꞌ ma daꞌira Damaskus. Jari bang aniyaꞌ tabākna mahēꞌ saga aꞌa ameyaꞌ ma kalꞌngnganan Panghūꞌ Isa Al-Masi, aniyaꞌ kapatutna anaggaw sigām lꞌlla-dꞌnda sampay amowa sigām pabīng ni Awrusalam boꞌ kinalabusu. ³ Manjari itu, ma labayan paꞌin si Saul asekot ni Damaskus, pataghaꞌ sadja aniyaꞌ sawa min deyom sulgaꞌ asinag ma katilibutna. ⁴ Pahantak iya magtūy ni tanaꞌ ati makakale iya suwala amissala, yuk-i, “Saul, O Saul! Angay aku pinjalaꞌnu?”

⁵ Anambung si Saul, yukna, “Sai sa kaꞌa ilu, Nakuraꞌ?”

Yuk suwala inān, “Aku si Isa, ya pinjalaꞌnu na paꞌin. ⁶ Sagōꞌ anꞌngge na ka,” yukna. “Pehēꞌ ka ni deyom daꞌira inān. Nihakaꞌan du ka mainaꞌan bang ai subay hinangnu.”

⁷ Saga aꞌa bay seheꞌ si Saul hal anꞌngge mainaꞌan, halam makapahꞌlling. Takale eꞌ sigām suwala inān boꞌ halam aniyaꞌ sai-na taꞌndaꞌ sigām. ⁸ Pabungkal si Saul min tanaꞌ bay kahantakanna boꞌ amakꞌllat matana, sagōꞌ mbal iya makaꞌndaꞌ. Angkan iya niambit eꞌ saga seheꞌna tudju ni deyom Damaskus. ⁹ Tꞌllumbahangi iya mbal makaꞌndaꞌ, maka halam isab iya bay amangan atawa anginum.

¹⁰ Aniyaꞌ ma Damaskus inān dakayuꞌ mulid si Isa Al-Masi niōnan si Ananiyas. Magpanyataꞌ Panghūꞌ Isa ni iya ahꞌlling, yukna, “O Ananiyas!”

“Itiyaꞌ aku, Panghūꞌ,” yukna.

¹¹ Yuk Panghūꞌ Isa ni iya, “Pasakap ka. Pehēꞌ na ka ni lān niōnan Lān Bontol. Panilawun ma lumaꞌ si Judas pasal dakayuꞌ aꞌa min Tarsus niōnan si Saul. Heꞌ na iya angamuꞌ-ngamuꞌ ni Tuhan buwattinaꞌan. ¹² Bay iya pataꞌuku bang ai song makani-iya. Bay ka saliꞌ taꞌndaꞌ eꞌna pasōd ni deyom paꞌataganna inān amatꞌnnaꞌ tangannu ma iya, boꞌ supaya iya makaꞌndaꞌ pabīng.”

¹³ Sagōꞌ anambung si Ananiyas, yukna, “Allō, Panghūꞌku, aheka bay angahakaꞌan aku pasal si Saul inān. Alaꞌat makalanduꞌ kahinanganna ma saga aꞌa sukuꞌnu ma Awrusalam eꞌ. ¹⁴ Maka itiyaꞌ na isab iya ma Damaskus itu. Bay iya kabuwanan kapatut eꞌ kaimaman alanga boꞌ tasaggawna sasuku magpanabbut ma ōnnu.”

¹⁵ Sagōꞌ anambung Panghūꞌ Isa, yukna, “Pehēꞌ na ka, sabab si Saul inān bay tapeneꞌku maghinang ma aku. Iya ya amatanyag ōnku pehēꞌ ni kabangsa-bangsahan ya nggaꞌi ka Yahudi, maka ni saga kasultanan, maka ni saga bangsa Israꞌil isab. ¹⁶ Baranku ya,” yuk Panghūꞌ Isa, “amanduꞌan iya pasal sukkal kamemon ya subay sandalanna ma sinosōng pagka aku ya pameyaꞌanna.”

¹⁷ Jari pehēꞌ si Ananiyas ni lumaꞌ pahantiꞌan si Saul boꞌ pasōd. Pinatꞌnnaꞌ eꞌna tanganna ma si Saul, ati yukna, “Saul, magdanakan na kita. Itiyaꞌ aku sinōꞌ piꞌitu eꞌ Panghūꞌ Isa, ya bay magpaꞌndaꞌ ni kaꞌa ma labayan ma waktu kapiꞌitunu. Sinōꞌ aku piꞌitu boꞌ ka makaꞌndaꞌ pabīng, boꞌ ka pinahōpan Rū Sussi.” ¹⁸ Saruꞌun-duꞌun aniyaꞌ saliꞌ sisik daing ahūg min mata si Saul, jari makaꞌndaꞌ iya pabīng. Anꞌngge iya boꞌ yampa pinandi palsaksiꞌan in iya ma si Isa na. ¹⁹ Aubus paꞌin iya bay amangan, pabalik na kosogna.

Magnasihat si Saul ma Daꞌira Damaskus

Na, pahantiꞌ si Saul daka pilambahangi ma saga mulid si Isa ma Damaskus inān. ²⁰ Anagnaꞌ iya magtūy magnasihat ma deyom kalanggalan Yahudi mainaꞌan. “Si Isa itu,” yukna, “tuman anak Tuhan!” ²¹ Ainu-inu aꞌa kamemon sasuku akale ma iya. Yuk sigām, “Ya na koꞌ itu aꞌa bay ma Awrusalam ya angamula sasuku anabbut ma ōn si Isa. Maka ya maksudna konoꞌ piꞌitu anaggaw sasuku ameyaꞌ ma si Isa, boꞌ yampa sigām bowana pabīng ni Awrusalam, ni saga imam alanga heꞌ.” ²² Sagōꞌ ya pagnasihat si Saul pakꞌnnop na paꞌin kosogna. Minnēꞌ manyatakan toꞌongan pasal si Isa, in iya bꞌnnal Al-Masi, angkan saga Yahudi maglahat ma Damaskus mbal makajawab ma iya.

²³ Atꞌggol-tꞌggol paꞌin minnēꞌ, magisun saga Yahudi amapatay si Saul, ²⁴ daipara kahakaꞌan iya pasal pagisun eꞌ. Llaw-sangom, nijagahan eꞌ sigām saga lawang pagluwasan min daꞌira inān boꞌ supaya iya pinapatay. ²⁵ Sagōꞌ sangom paꞌin lahat, binowa si Saul eꞌ saga anak-mulidna pinatingkōꞌ ma deyom ambung aheya boꞌ yampa tinonton min dakayuꞌ tandawan tudju ni luwasan daꞌira inān.

Patibaw si Saul ni Awrusalam

²⁶ Pagtꞌkka si Saul ni Awrusalam, pasulay iya palamud ma saga kamuliran si Isa mahēꞌ. Sagōꞌ tināw sigām ma iya sabab mbal sigām amꞌnnal in iya mulid si Isa na. ²⁷ Daipara si Barnabas bay amakilā si Saul ni saga aꞌa kawakilan. Bay isab sigām pataꞌuna pasal pakaꞌndaꞌ si Saul ma Panghūꞌ Isa, ma labayan tudju ni Damaskus. Bay iya konoꞌ binissalahan isab eꞌ si Isa mainaꞌan. Nihaka isab eꞌ si Barnabas pasal si Saul mbal tināw magnasihat ma pasal si Isa ma deyom daꞌira Damaskus eꞌ. ²⁸ Manjari patꞌnnaꞌ si Saul ma saga kamuliran si Isa ma Awrusalam. Halam aniyaꞌ hawal-hawalna angalatag deyom daꞌira magnasihatan saga aꞌa min kawasa ōn si Isa. ²⁹ Magbissala isab iya sampay magjawab maka saga Yahudi ya asal amissala bissala Girīk sagōꞌ pasulay sigām amapatay iya. ³⁰ Pagtaꞌu paꞌin inaꞌan-i eꞌ saga dauranakanna bebeyaꞌan si Isa, magtūy sigām amowa si Saul palūd ni Kesareya boꞌ yampa pinalaus minnēꞌ tudju ni Tarsus.

³¹ Na, yampa taga-kasannangan saga jamaꞌa si Isa ma kaluhaꞌan lahat Yahudiya maka ma lahat Jalil, maka mahēꞌ ma lahat Samariya. Tinabang sigām eꞌ Rū Sussi angkan angahogot iman sigām kamemon. Pasōng isab heka sigām, maka eꞌ sigām magmahaltabat toꞌongan ma Tuhan.

Si Petros ma Lahat Lidda maka Joppa

³² Manjari itu maglꞌngngan na si Petros angalatag kalahatan. Aniyaꞌ isab waktu, pehēꞌ iya ni daꞌira Lidda anibaw saga aꞌa sukuꞌ Tuhan mahēꞌ. ³³ Jari aniyaꞌ talanggalna mahēꞌ aꞌa niōnan si Aneyas. Aꞌa itu amatay ugatna, waluntahun na iya halam bay makabungkal min palegehanna. ³⁴ Yuk si Petros ni iya, “Aneyas, kauliꞌan na ka eꞌ si Isa Al-Masi. Pabungkal ka, momosun patulihannu ilu!” Magtūy pabungkal si Aneyas itu. ³⁵ Taꞌndaꞌ iya eꞌ saga aꞌa kamemon ya maglahat ma Lidda maka ma lahat Saron inān, ati papinda saga aꞌa inān amꞌnnal ma Panghūꞌ Isa.

³⁶ Na, aniyaꞌ ma lahat Joppa inān dakayuꞌ dꞌnda mulid si Isa, niōnan si Tabita. Dorkas ya ōn si Tabita itu bang ma bahasa Girīk, hatina ‘usa’. Dꞌnda inān maghinang sadja kahāpan, maka anabang ma saga aꞌa miskin. ³⁷ Jari ma waktu inaꞌan-i taluwaꞌ saki si Tabita itu ati amatay. Tasussi paꞌin mayatna, pinalege iya ma dakayuꞌ bilik ma diyataꞌ angkap. ³⁸ Lahat Joppa inān mbal du alawak toꞌongan min Lidda. Sakali itu, takale paꞌin eꞌ saga kamuliran si Isa ma Joppa in si Petros inaꞌan ma Lidda, magtūy sigām anohoꞌ duwa lꞌlla pehēꞌ amowa lapal ni si Petros. Yuk lapal eꞌ, “Pasaꞌut ka piꞌitu.”

³⁹ Pagtaꞌu paꞌin si Petros, magtūy iya magsakap ameyaꞌ ma duwangan inān. Pagtꞌkkana ni Joppa binowa iya pariyataꞌ ni bilik. Jari pinagtimukan iya eꞌ saga kabaluhan dꞌnda magpanangis na paꞌin. Pinaꞌndaꞌan ni iya eꞌ sigām saga badjuꞌ indaginis bay tahinang eꞌ si Dorkas waktu bay kallumna giꞌ.

⁴⁰ Na, pinaluwas sigām kamemon eꞌ si Petros min deyom bilik inān boꞌ yampa iya angōk-tuꞌut angamuꞌ-ngamuꞌ ni Tuhan. Puwas eꞌ paꞌalop iya ni mayat dꞌnda inān. Yukna, “Tabita, pabungkal ka!” Sakali pinakꞌllat eꞌ si Tabita matana, ati punduk iya pagꞌndaꞌna ma si Petros. ⁴¹ Pinaꞌabut eꞌ si Petros tanganna panabang iya boꞌ makatꞌngge. Puwas eꞌ nilinganan eꞌ si Petros saga aꞌa angandol inān maka saga balu ati sōnganna si Tabita ni sigām, allum na. ⁴² Pahayag suli-suli pasal kallum si Tabita itu ni aꞌa kamemon ma Joppa, angkan aheka angandol ma Panghūꞌ Isa. ⁴³ Atꞌggol-tꞌggol katꞌnnaꞌ si Petros ma Joppa inān. Paokom iya ma lumaꞌ si Simun, aꞌa magadjal kuwit hayop.