8
Inaꞌan isab si Saul angahoꞌ ma pagpatay ma si Esteban.
Pangalaꞌug si Saul ma saga Bebeyaꞌan si Isa
1-2 Na, waꞌi kinubul si Esteban eꞌ saga aꞌa angisbat Tuhan. Pinagdohonan toꞌongan iya eꞌ sigām. Sakali itu, tinagnaꞌan min llaw inaꞌan, aheya katiksaꞌan pinatꞌkka ni saga jamaꞌa si Isa ma Awrusalam. Angkan sigām apulak-palik kamemon tudju ni kaluhaꞌan lahat Yahudi maka ni lahat Samariya. Luwal saga aꞌa bay kawakilan eꞌ si Isa ya tabba ma Awrusalam. 3 Sagōꞌ si Saul inān, atuyuꞌ angamula saga jamaꞌa si Isa. Sinōd eꞌna kalumaꞌan sigām, ubus lumaꞌ dakayuꞌ boꞌ dakayuꞌ. Sinaggaw isab eꞌna lꞌlla-dꞌnda boꞌ yampa kinalabusu.
Pinatanyag Lapal Ahāp ma Lahat Samariya
4 Sagōꞌ saga bebeyaꞌan si Isa akaukanat inān bay anganasihat lapal ahāp pasal si Isa piꞌingga-piꞌingga ya papeheꞌan sigām. 5 Buwat si Pilip: bay iya pehēꞌ ni dakayuꞌ daꞌira ma lahat Samariya anganasihatan saga aꞌa mainaꞌan ma pasal Al-Masi. 6 Pagkale paꞌin saga kahekaꞌan aꞌa mainaꞌan ma bissala si Pilip, maka pagꞌndaꞌ sigām ma paltandaꞌan makainu-inu ya tahinangna, kinale toꞌongan lapalna eꞌ sigām. 7 Aheka saga aꞌa bay paluwasan saitan. Atanog pangolang saga saitan saltaꞌ sigām pinaluwas. Aheka isab saga aꞌa kauliꞌan, saga akuꞌil maka saga aꞌa mbal makaosegan di-sigām, 8 angkan akōd toꞌongan saga aꞌa ma daꞌira inān.
Si Simun, Aꞌa Maghihikmat
9 Na, aniyaꞌ aꞌa niōnan si Simun maglahat ma daꞌira inān. Ataꞌu iya maghikmat maka ainu-inu ma kahinanganna saga aꞌa ma jadjahan Samariya inān. Maglaku-laku si Simun in iya babantugun. 10 Jari kinale iya eꞌ aꞌa kamemon mainaꞌan, ai na ka aꞌa areyoꞌ atawa alanga. Yuk sigām kamemon ma pasal si Simun inān, “Aꞌa itu taga-barakat deyoꞌ bay min Tuhan, angkan niōnan Barakat-Aheya.” 11 Atꞌggol na kapanginu-nginu sigām ma paghikmat si Simun angkan sigām akale toꞌongan ma iya. 12 Sagōꞌ amꞌnnal paꞌin saga aꞌa inān ma lapal ahāp ya pinagnasihat eꞌ si Pilip pasal pagparinta Tuhan maka ma pasal si Isa Al-Masi, magtūy sigām pinandi, dꞌnda maka lꞌlla, palsaksiꞌan in sigām ma si Isa na. 13 Ya du si Simun bay amꞌnnal isab. Aubus paꞌin iya bay pinandi, auli na iya ma si Pilip. Pagꞌndaꞌna ma saga paltandaꞌan maka hinang makainu-inu ya tahinang eꞌ si Pilip, ainu-inu iya toꞌongan.
14 Manjari itu takale eꞌ saga aꞌa kawakilan mahēꞌ ma Awrusalam pasal saga aꞌa Samariya bay makataimaꞌ lapal Tuhan, angkan sigām bay magpanohoꞌan ma si Petros maka si Yahiya pehēꞌ ni lahat Samariya. 15 Pagtꞌkka paꞌin disi Petros pinaꞌan, niamuꞌ-amuꞌan eꞌ sigā saga aꞌa Samariya boꞌ supaya sigām pinasambutan Rū Sussi. 16 Sabab in Rū Sussi halam giꞌ bay pahōp ni sigām minsan dakayuꞌ. Sagōꞌ bay sigām pinandi sadja, palsaksiꞌan in sigām sukuꞌ ma si Isa na. 17 Manjari pinatꞌnnaꞌ eꞌ si Petros maka si Yahiya tangan sigā ma saga aꞌa Samariya magpangandol inān, ati kaniyaꞌan sigām Rū Sussi.
18 Taꞌndaꞌ eꞌ si Simun in saga aꞌa inān pinahōpan Rū Sussi, pagpatꞌnnaꞌ tangan disi Petros ma sigām. Angkan iya bay arak amuwan sīn panambana si Petros maka si Yahiya. 19 Yukna ni sigā, “Buwaninbi isab aku kawasabi ilu, boꞌ supaya bang aniyaꞌ sai-sai kapatꞌnnaꞌan tanganku pinahōpan du isab iya Rū Sussi.”
20 Sagōꞌ sinambungan iya eꞌ si Petros, yuk-i, “ Ahāp lagiꞌ ka minulkaꞌan maka sīnnu ilu! Pangannalnu in kahāpan Tuhan tabꞌlli-bꞌlli maka sīn! 21 Halam aniyaꞌ palsukuꞌannu atawa lamudnu ma hinang kami itu, sabab mbal abontol ataynu ma pangꞌndaꞌ Tuhan. 22 Angkan koꞌ, taikutin na kalaꞌatannu ilu. Mikiampun ka ma Tuhan, kalu niampun pikilannu alaꞌat ilu. 23 Sabab kataꞌuwanku na, mamarahi pangihidnu. Saliꞌ ka tajallat eꞌ dusanu.”
24 Sakali anambung si Simun, yuk-i, “Amuꞌ-amuꞌinbi aku ni Tuhan supaya mbal patꞌkka ni aku ya yukbi ilu.”
25 Puwas eꞌ, aubus paꞌin eꞌ si Petros maka si Yahiya anaksiꞌ pasal si Isa sampay amasaplag lapal Tuhan ma saga aꞌa inān, pauntas na sigā tudju ni Awrusalam pabīng. Ma labayan lagiꞌ sigā, maghapit-hapit sigā ma baꞌanan kauman ma lahat Samariya boꞌ ninasihat eꞌ sigā lapal ahāp.
Si Pilip maka Bagꞌllal Bangsa Eteyopa
26 Na, aniyaꞌ malaꞌikat Tuhan amissala ni si Pilip, yuk-i, “Magsakap ka. Pehēꞌ ka ni lān tampal ni timul, ya dalosan Awrusalam maka Gasa.” Lān inaꞌan-i mbal na agon tapalabayan. 27 Angkan magsakap si Pilip boꞌ pauntas pehēꞌ. Manjari itu aniyaꞌ aꞌa bangsa Eteyopa bay ma Awrusalam amudji ni Tuhan. Aꞌa itu alanga kagꞌllalna, maka kinabili asal. Pangandol ma iya pangaltaꞌ si Kandake, ya dayang-dayang magnakuraꞌan lahat Eteyopa. 28 Na, amoleꞌ paꞌin bagꞌllal itu min Awrusalam, aningkōꞌ iya ma kalesana, maka eꞌna amassa Kitab ma jūd bay tasulat eꞌ nabi Isaya. 29 Sinohoꞌ si Pilip eꞌ Rū Tuhan, yuk-i, “Pinaꞌan ka paꞌabay ma kalesa inān.”
30 Jari paragan si Pilip pehēꞌ ati takalena bagꞌllal itu amassa min jūd nabi Isaya. Atilaw si Pilip ma iya, yukna, “Tahatinu bahāꞌ ya bassanu ilu?”
31 Yuk sambung bagꞌllal inān, “Mbal. Buwattingga kataꞌuku bang halam aniyaꞌ amahati ma aku?” Jari sinohoꞌ eꞌna si Pilip pariyataꞌ pinaꞌan boꞌ aningkōꞌ ma bihingna. 32 Na, ya na itu saga ayat Kitab bay tabassana heꞌ, yuk-i,
“Aꞌa itu saliꞌ hantang bili-bili magpabeyaꞌ sadja bang binowa sinumbaliꞌ.
Halam iya bay ahꞌlling minsan dakabtang.
Saliꞌ anak bili-bili mbal pabangaꞌ bang ginuntingan.
33 Tahinang iya panunggīngan,
maka halam tinꞌkkahan ni saraꞌ abontol.
Halam aniyaꞌ makasuli-suli pasal saga tubuꞌna,
sabab atobtob umulna ma deyom dunya itu.”
34 Yuk bagꞌllal ni si Pilip, “Hakaꞌin aku. Sai binissala eꞌ nabi itu? Baranna ka, atawa aꞌa saddī?” 35 Manjari anagnaꞌ si Pilip amissala, tinagnaꞌan min saga ayat Kitab bay tabassa eꞌ bagꞌllal eꞌ. Sinuli-sulihan iya eꞌ si Pilip pasal si Isa. 36 Manjari itu, ma sabu sigām palanjal ma palꞌngnganan, atꞌkka sigām ni lahat taga-boheꞌ. Yuk bagꞌllal ni si Pilip, “Ndaꞌun, aniyaꞌ itu boheꞌ. Bang halam du aniyaꞌ makababag, mikipandi na aku palsaksiꞌan in aku ma si Isa na.” [
37 Yuk si Pilip, “Bang ka amꞌnnal min deyom ataynu, makajari sadja.”
“Ahoꞌ,” yuk bagꞌllal, “amarassaya aku in si Isa Al-Masi asal Anak Tuhan.” ] 38 Magtūy magpanohoꞌan bagꞌllal pinahoggaꞌ kalesa. Jari pareyoꞌ sigā karuwangan ni boheꞌ boꞌ yampa iya pinandi eꞌ si Pilip. 39 Pagluwas sigā min boheꞌ, magtūy tabowa si Pilip alaꞌan minnēꞌ eꞌ Rū Panghūꞌ. Halam na iya taꞌndaꞌ pabīng eꞌ bagꞌllal inān. Palanjal iya ni patudjuhanna, maka eꞌna kinōgan toꞌongan. 40 Malaingkan si Pilip itu, waꞌi palahil ma lahat Asotus. Nilatag eꞌna kamemon saga kauman ma jadjahan inaꞌan maka eꞌna magnasihat lapal ahāp sampay atꞌkka ni lahat Kesareya.