3
1 Puwas eꞌ pasampay lapal PANGHŪꞌ ni si Yunus, kaminduwana na. 2 Yukna, “Pehēꞌ ka ni Niniba, ya daꞌira aheya inān. Magnasihat ka ma sigām ya lapal pangahakaku itu ma kaꞌa.”
3 Jari bineyaꞌ eꞌ si Yunus panohoꞌan PANGHŪꞌ ati pehēꞌ iya ni Niniba. Aheya sidda daꞌira Niniba inān, saga tꞌllungꞌllaw nilꞌngngan. 4 Na, makalꞌngngan paꞌin si Yunus dangꞌllaw, magnasihat na iya. Yukna, “Taꞌabut mpatpūꞌ-ngꞌllaw minnitu nilubu daꞌira Niniba itu.” 5 Pagkale saga aꞌa Niniba ma lapal Tuhan itu, magtūy sigām amꞌnnal ma iya. Magdakayuꞌ sigām garaꞌ subay magpuwasa, jari saga aꞌa inān kamemon aheya-arikiꞌ magsinꞌmmek karut paltandaꞌan in sigām pataikut na min dusa sigām.
6 Na, makasampay paꞌin haka itu ni sultan ma lahat Niniba, magtūy iya anꞌngge min paningkōꞌanna pagsultanan. Nihurusan pamakayna bangsahan boꞌ magsꞌmmek karut maka eꞌna aningkōꞌ ma abu. 7 Pagubus, aniyaꞌ lling bay pinatanyag eꞌ sultan itu ma saga aꞌa Niniba, yukna, “Lling itu min sultan maka saga aꞌana bangsahan: Ai na ka manusiyaꞌ atawa hayop, subay daꞌa amangan atawa anginum, maka mbal animtim minsan ai. 8 Kamemon saga manusiyaꞌ maka kamemon hayop subay pinatꞌnnaꞌan karut. In kamemon aꞌa subay amuspus angamuꞌ duwaꞌa ni Tuhan. Subay nibbahan eꞌ sigām in kahinangan sigām asabul maka jahulakaꞌ. 9 Kalu mura-murahan apinda pikilan Tuhan boꞌ maꞌaseꞌ. Jari mbal lanjalanna mulkaꞌna ati kitam itu mbal magmula.”
10 Na, pagꞌndaꞌ Tuhan ma bay kahinangan sigām eꞌ, in sigām pataikut na min kalaꞌatan bay kabiyaksahan sigām, jari apinda pikilanna. Maꞌaseꞌ iya ma sigām ati halam nilanjalan niyatna angamulkaꞌan sigām.