4
Akagit atay si Yunus ma sabab kaꞌaseꞌ PANGHŪꞌ
1 Saguwāꞌ akagit atay si Yunus, halam toꞌongan iya kasulutan. 2 Angamuꞌ-ngamuꞌ iya ni PANGHŪꞌ, yukna, “O Yawe, ya na koꞌ itu bay kagawahanku mahēꞌ lagiꞌ aku ma lahatku. Angkan na aku bay pasaꞌut alahi tudju ni lahat Tarsis. Kataꞌuwanku kasuddahannu, in kaꞌa-i Tuhan pananabang maka patiaseꞌun, mbal magdaiꞌ-daiꞌ angastol. Patilasahun ka asal, ataꞌu amindahan niyatnu arak amatꞌkka balaꞌ. 3 Angkan koꞌ, PANGHŪꞌ, bꞌkkatun na napasku sabab ahāp lagiꞌ aku amatay.”
4 Sagōꞌ anambung PANGHŪꞌ ma iya yukna, “Aniyaꞌ bahāꞌ kapatutnu angastol buwattilu?”
5 Puwas eꞌ paluwas si Yunus min daꞌira inān maka eꞌna aningkōꞌ ma luwasan, tampal ni sobangan. Aniyaꞌ panggung tahinangna mainaꞌan, jari aningkōꞌ iya ma sindunganna angagad-ngagad boꞌ kataꞌuwanna bang ai katobtoban daꞌira heꞌ. 6 Sakali aniyaꞌ bahan dahunan pinatomoꞌ eꞌ PANGHŪꞌ-Yawe pamalimbu kōk si Yunus boꞌ mbal alaꞌat palasahanna. Jari kinōgan si Yunus ma sabab bahan eꞌ. 7 Sagōꞌ pagdaiꞌ-llaw, aniyaꞌ ulat pinapehēꞌ eꞌ Tuhan amangan batang bahan boꞌ angalanos. 8 Alanga paꞌin llaw, aniyaꞌ isab baliyu pabeyaꞌna min sobangan, baliyu landuꞌ apasuꞌ, jari kasilakan kōk si Yunus sampay iya kinapiyalu. Bilahi na iya amatay, yukna, “Gom giꞌ aku amatay.”
9 Manjari ahꞌlling Tuhan ma si Yunus, yukna, “Taga-kapatut ka bahāꞌ angastol ma sabab kalanos bahan eꞌ?”
“Ahoꞌ,” yuk sambung si Yunus. “Ahāp lagiꞌ aku amatay sabab mbal kasandalanku kaꞌastolku itu.”
10 Sagōꞌ anambung PANGHŪꞌ, yukna, “Bahan ilu bay pasahaꞌ waktu sangom boꞌ pakꞌllos waktu llaw. Nggaꞌi ka kaꞌa ya bay angipat iya atawa amatomoꞌ, boꞌ paꞌin pagsusahannu. 11 Ya lagiꞌna saga aꞌa ma daꞌira Niniba itu. Labi sigām dahatus maka duwampūꞌ ngibu puhuꞌ, aꞌa mbal makasilang gibang min kowana bang ai biddaꞌna. Aheka isab kahayop-hayopan mainaꞌan. Angkan subay pagsusahanku daꞌira itu maka saga aꞌana landuꞌ aheka.”