Yunus 2

Angamuꞌ-ngamuꞌ si Yunus

¹ Ma deyom bꞌttong daing paꞌin si Yunus, angamuꞌ-ngamuꞌ iya ni si Yawe ya Tuhanna. ² Yukna,

“Pagka aku ma deyom kasigpitan

bay lingananku PANGHŪꞌ

ati kasambungan aku eꞌna.

Pagka aku ma lahat kamatayan,

bay aku angamuꞌ tabang, ati takalenu pangamuꞌku.

³ Bay aku larukannu pehēꞌ ni sꞌllang

ni lalom tegob-tegoban, ni buliluk sꞌllog.

Bay aku tabowa eꞌ abalnu,

Bay aku kasampoyakan eꞌ goyaknu.

⁴ Ya pangannalku, ‘In aku palawaknu min matahannu.’

Magniyat aku mbal na makaꞌndaꞌ pabalik

ma langgalnu sussi.

⁵ Agon-agon aku alembo ma tahik,

Alimun aku ma tahik tegob-tegoban,

Kaleboran aku eꞌ sagmot tahik.

⁶ Patꞌnde aku sampay ni deyoꞌ katapusan.

Paꞌabut aku ni lahat kamatayan,

ni lahat atambol lawangna salama-lama.

Daipara kaꞌa Tuhan, kaꞌa Panghūꞌku,

bay angalappasan aku min deyoꞌ katobtoban.

⁷ Song paꞌin abꞌkkat napasku,

taentomku kaꞌa, O PANGHŪꞌ.

Bay sabbutku ōnnu,

bay pasampayku panganduwaꞌaku ni kaꞌa,

ni deyom langgalnu sussi.

⁸ Sai-sai ameyaꞌan tuhan-tuhan halam pūsna

alungay pangandolna ma kaꞌa.

⁹ Sagōꞌ aku itu anukbalan kulban ni kaꞌa

hinabu angalang pamudji.

Tumanku bay najalku ni kaꞌa,

sabab kaꞌa ya si Yawe ya PANGHŪꞌ maglalappas.”

¹⁰ Puwas eꞌ, in daing aheya tasohoꞌ eꞌ PANGHŪꞌ anguttaꞌan si Yunus pehēꞌ ni bihing tampe.