YUNUS
1
JŪD YUNUS
Palbahagiꞌan Kitab Jabul
Kalahi si Nabi Yunus min Tuhan
1 Aniyaꞌ lapal PANGHŪꞌ-Yawe pasampay ni si Yunus anak si Amittai. 2 Yukna, “Pehēꞌ ka ni daꞌira Niniba, ya daꞌira aheya inān. Magnasihat ka pehēꞌ ni saga aꞌana. Pataꞌuhun sigām in daꞌira sigām song pinatꞌkkahan mulkaꞌ, sabab taꞌndaꞌku kalaꞌatan sigām.”
3 Sagōꞌ mbal bilahi si Yunus, gom paꞌin alahi iya min PANGHŪꞌ. Ya tudjuna lahat saddī niōnan Tarsis, angkan iya palūd ni Joppa amiha kappal pameyaꞌanna pehēꞌ. Pagbayadna paꞌin sukay, pariyataꞌ na iya boꞌ yampa patulak ni lahat Tarsis ya lahat palahianna min PANGHŪꞌ.
4 Manjari aniyaꞌ baliyu akosog pinatumbuk eꞌ PANGHŪꞌ ni dilaut kablangan eꞌ. Alandos goyak agon makakaꞌat kappal. 5 Sinōd tāw saga aꞌa kamemon maghihinang ma kappal inān ati angalemong sigām ni tuhan-tuhan sigām pakaniya-pakaniya bang paꞌin tinabangan. Puwas eꞌ tinimanan eꞌ sigām baꞌanan duwaꞌan ni tahik supaya angalampung kappal.
6 Sagōꞌ bay pareyoꞌ si Yunus ni deyom mohang. Palege iya mainaꞌan sampay ahaluk tulina. Manjari taꞌabut iya mainaꞌan eꞌ kapitan kappal. Yukna ma iya, “Oy! Makatuli giꞌ ka, ā! Pabungkal ka! Angamuꞌ-ngamuꞌ ka ni Tuhannu! Kalu kitam kinale ati lappasan kitam!”
7 Sakali magsuli-suli saga aꞌa maghinang ma kappal, yuk sigām, “Sūng, magkoꞌot-koꞌot kitam boꞌ kataꞌuwantam bang sai sababan balaꞌ itu.” Manjari magkoꞌot paꞌin sigām, ōn si Yunus ya takoꞌot.
8 Yuk saga aꞌa inān ma iya, “Hakaꞌin kami bang sai makasabab ya angkan kitam katꞌkkahan balaꞌ itu. Ai usahanu? Minningga ka? Ai lahatnu? Bangsa ai ka?”
9 Anambung si Yunus, yukna, “Aku itu bangsa Hibrani. Ya pagtaꞌatanku si Yawe, Tuhan tag-sulgaꞌ ya magpapanjari deya maka dilaut.”
10 Na, agꞌmma sumangat sigām pagka takale haka si Yunus in iya alahi min PANGHŪꞌ. “Arōy!” yuk sigām. “Daka ai tahinangnu itu!” 11 Sakali pakosog na paꞌin boꞌ pakosog goyak. Manjari tinilaw eꞌ sigām si Yunus, yuk-i, “Ai subay hinang kami ma kaꞌa supaya patꞌddoꞌ tahik itu?”
12 “Hūgunbi aku ni tahik,” yukna, “boꞌ patꞌddoꞌ pabalik. Kataꞌuwanku aku ya sababan angkan kam taluwaꞌ goyak aheya itu.”
13 Sagōꞌ mbal bilahi saga aꞌa ma kappal inān. Gom paꞌin sigām amuspus magtindayung kalu makasampay ni bihing. Sagōꞌ mbal takoleꞌ eꞌ sigām sabab akalap lagiꞌ goyak min bay dahū. 14 Puwas eꞌ angamuꞌ-ngamuꞌ sigām ni PANGHŪꞌ-Yawe. Yuk sigām, “O Yawe, maꞌaseꞌ ka. Daꞌa kami papatayun bang aꞌa itu amatay eꞌ kami. Daꞌa kami dusahin bang kami amꞌkkat nyawa aꞌa halam aniyaꞌ dusana. Kaꞌa sadja ya magbayaꞌ.” 15 Manjari binuhat eꞌ sigām si Yunus boꞌ nihūg ni tahik. Magtūy pahondong goyak ati tꞌddoꞌ na pabalik. 16 Minnēꞌ aheya tāw saga aꞌa inān ma PANGHŪꞌ si Yunus. Sakali aniyaꞌ kulban tinukbal eꞌ sigām ni PANGHŪꞌ eꞌ maka aniyaꞌ pagnajal sigām ma iya.
17 Malaingkan aniyaꞌ daing landuꞌ aheya bay pinabeyaꞌ eꞌ PANGHŪꞌ anꞌllon si Yunus. Manjari tꞌllungꞌllaw tꞌllumbahangi ya tꞌggol si Yunus ma deyom bꞌttong daing eꞌ.