9
Daꞌugan saga Bangsa Yahudi
1 Ma kasangpūꞌ ka tꞌllungꞌllaw ma bulan Adar, ya bulan kasangpūꞌ karuwa, taꞌabut na waktu pamatuman bay panohoꞌan sultan. Ya du inaꞌan llaw bay niholat asal eꞌ saga palbantahan bangsa Yahudi, ya llaw arak pangandaꞌug sigām. Sagōꞌ ya kaluwasanna, bangsa Yahudi ya angandaꞌug ma saga aꞌa abꞌnsihan sigām. 2 Bay magtipun saga bangsa Yahudi ma saga daꞌira ya katꞌnnaꞌan sigām ma katilibut paglahat ya beyaꞌ ma sultan Serses. Magsakap sigām angatuhan sasuku angamohot angalaꞌat sigām. Jari halam aniyaꞌ sai-sai bay makaꞌatu ma bangsa Yahudi ma llaw inaꞌan, sabab tināw ma sigām saga aꞌa kamemon min saddī-saddī bangsa. 3 Tinabangan isab bangsa Yahudi itu eꞌ kamemon saga aꞌa bangsahan ma kalahat-lahatan inān, eꞌ saga gubnul katapusan alanga, maka saga kagubnulan pasunuꞌ sampay saga wakil sultan, sabab sinōd du isab sigām tāw ma si Murdikay. 4 Alanga asal kagꞌllal si Murdikay itu ma deyom astanaꞌ maka atanyag na isab pagkaꞌaꞌana ma katilibut paglahat. Pasōng na paꞌin kawasana.
5 Jari tapapatay eꞌ saga bangsa Yahudi saga banta sigām, binonoꞌ maka kalis sampay abugtang na kamemon, ati tahinang eꞌ saga Yahudi ai-ai kabayaꞌan sigām ma sasuku abꞌnsihan sigām. 6 Lima hatus heka aꞌa bay tapapatay sigām ma kutaꞌ Susa sadja. 7 Bay isab tapapatay eꞌ sigām disi Parsandata, Dalpon, Aspata, 8 Porata, Adarya, Aridata, 9 Palmasta, Arisai, Aridai maka si Baysata, 10 sangpūꞌ puhuꞌ anak si Haman lꞌlla. Si Haman itu anak si Hammedata, banta asal saga bangsa Yahudi. Sagōꞌ halam aniyaꞌ pangaltaꞌ bay tataban eꞌ saga Yahudi ma waktu inaꞌan.
11 Ma llaw heꞌ-i du bay kahakaꞌan sultan bang pila puhuꞌ bay tapapatay ma kutaꞌ Susa. 12 Yuk sultan ni dayang-dayang Ester, “Bang hal ma kutaꞌ Susa itu lima hatus heka aꞌa maka sangpūꞌ puhuꞌ anak si Haman ya bay tapapatay eꞌ saga bangsa Yahudi, ai lagiꞌ bahāꞌ tahinang eꞌ sigām ma saga kaseheꞌan paglahat? Na, ai pangamuꞌnu, pamuwanku du ma kaꞌa. Minsan ai panganjunjungnu, tantu ka dūlanku.”
13 Ya sambung dayang-dayang Ester, “Bang makasulut ma kaꞌa, tuwan sultan, tugutin saga Yahudi ma Susa angahinang panohoꞌannu itu salung buwat du bay kapangahinang sigām llaw itu. Maka sohoꞌun ginantung bangkay saga anak si Haman lꞌlla sangpūꞌ hekana inān.”
14 Angkan magpanohoꞌan sultan, sinōꞌ bineyaꞌ pangamuꞌ si Ester itu. Pinatanyag panohoꞌanna ma daꞌira Susa ati ginantung bangkay saga anak si Haman sangpūꞌ hekana. 15 Manjari saga bangsa Yahudi ma Susa inān bay magdakayuꞌ ma kasangpūꞌ kaꞌmpat llaw ma bulan Adar, ati tapapatay eꞌ sigām tꞌllu hatus heka aꞌa ma Susa, sagōꞌ halam sigām bay anaban mainaꞌan. 16 Saltaꞌ, kaseheꞌan saga Yahudi ya ma saga paglahat beyaꞌ ma pagsultanan eꞌ, bay isab magdakayuꞌ angatu ma saga banta sigām boꞌ sigām makalimaya. Pitumpūꞌ ka lima ngibu heka aꞌa ya tapapatay eꞌ sigām, sagōꞌ halam sigām bay anaban minsan ai. 17 Tahinang saga kahinangan itu ma bulan Adar, ma kasangpūꞌ ka tꞌlluꞌngꞌllaw, ati taꞌabut paꞌin kasangpūꞌ ka mpat llawna in kahekaꞌan sigām bay pahali. Manjari in llaw inān tahinang eꞌ sigām llaw pagjamu maka paglami-lami.
Pasal Hinang Purim
18 Malaingkan saga Yahudi ma daꞌira Susa bay magtimuk ma kasangpūꞌ ka tꞌlluꞌngꞌllaw sampay ni sangpūꞌ ka mpat llaw ma bulan inān. Taꞌabut paꞌin kasangpūꞌ ka limangꞌllaw, ya na llaw kahali sigām, tahinang llaw inān pagjamu maka paglami-lami sigām. 19 Ya heꞌ sababanna angkan saga bangsa Yahudi ya patꞌnnaꞌ ma kareya-reyahan amogbogan llaw kasangpūꞌ ka mpat ma bulan Adar eꞌ. Ya na inān llaw pagjamu maka paglami-lami sigām, llaw isab pagbuwan-buwan sigām danseheꞌan.
20 Manjari tasulat eꞌ si Murdikay pasal saga kahālan itu. Aniyaꞌ isab sulat bay pinabeyaꞌ eꞌna ni kamemon bangsa Yahudi ma saga paglahat atā-asekot ya beyaꞌ ma pagsultanan si Serses. 21 Sinohoꞌ sigām amogbogan karuwa llaw itu sakahabaꞌ tahun ma bulan Adar, hatina kasangpūꞌ ka mpat llaw sampay kasangpūꞌ ka lima llaw. 22 Pangentoman koꞌ inān ma waktu bay kalimaya sigām min saga banta sigām, waktu isab kapamapinda kasusahan sigām ni kakōgan, maka karukkaꞌan sigām ni kalami-lamihan. Ya panulat isab eꞌ si Murdikay ma sigām, in llaw mulliya itu subay llaw pagjamu maka paglami-lami sigām, llaw isab pagbuwan-buwan pagkakan ni kaseheꞌan sigām maka waktu pagbuwan sarakka ma saga miskin.
23 Manjari magdakayuꞌ pikilan saga Yahudi pasal pagjamu ya bay tinagnaꞌan eꞌ sigām ma waktu inān, hatina subay binogbogan na paꞌin buwat bay panulat si Murdikay ma sigām eꞌ. 24 Angkan buwattēꞌ, sabab si Haman anak si Hammedata bangsa Agag, ya amantahan saga Yahudi, bay magisun angalaglag sigām kamemon. Bay iya magkoꞌot-koꞌot isab boꞌ tatugpang bang ai llaw pangalaglag maka pangaligis ma sigām. (‘Pur’ ya ōn pagkoꞌot eꞌ.) 25 Sagōꞌ kahakaꞌan paꞌin sultan pasal kaisunan si Haman itu, bay ya amaniyaꞌ sulat panohoꞌan boꞌ pinapelleng ni si Haman saga kalaꞌatan bay pagisunanna pasal bangsa Yahudi. Panohoꞌan sultan isab in si Haman subay ginantung pinapatay sambeyaꞌ maka bangkay saga anakna lꞌlla. 26 (‘Purim’ ya pangōn saga Yahudi ma llaw inān sabab ‘pur’ ya ōn pagkoꞌot eꞌ.) Manjari itu, ma sabab kamemon ya bay pinasulat inān eꞌ si Murdikay, maka ma sabab ai-ai bay taꞌndaꞌ eꞌ sigām maka bay kalabayan sigām, 27 aniyaꞌ niniyat eꞌ saga bangsa Yahudi. Hatina in duwa llaw Purim itu subay binogbogan sakahabaꞌ tahun eꞌ sigām magtubuꞌ-manubuꞌ sampay saga saddī bangsa ya palamud ma sigām. In untulan maka waktu bay pangidda ma jaman inaꞌan subay binogbogan na paꞌin eꞌ sigām. 28 Saga llaw Purim itu subay nientom maka binogbogan eꞌ kamemon saga Yahudi magtautaiꞌanak, magtubuꞌ-manubuꞌ, ma saga paglahat kamemon maka ma daꞌira kamemon. Subay mbal nibbahan atawa alungay min pangentom saga panubuꞌ sigām.
29 Manjari dayang-dayang Ester anak si Abihaꞌil, maka si Murdikay ya Yahudi, bay magdakayuꞌ amasulat sulat karuwana itu supaya pinasabꞌnnal saga panohoꞌan pasal Hinang Purim. Tuꞌud alanga kapatut sigām magpanohoꞌan buwattēꞌ. 30 Aniyaꞌ isab sulat bay pinabeyaꞌ eꞌ si Murdikay ni kamemon saga Yahudi ma dahatus duwampūꞌ ka pituꞌ paglahat ya beyaꞌ ma pagsultanan sultan Serses. Ya lapal sulat inān lapal pamahāp pangatayan maka pamohogot iman, 31 supaya pinatantu llaw Purim itu ma waktu bay pangidda eꞌ disi Murdikay ya Yahudi maka dayang-dayang Ester. Abeyaꞌ isab kamemon saga Yahudi. Bay sigām amatꞌnnaꞌan di-sigām waktu maka untulan ma pasal pagpuwasa maka pagdukka ya pameyaꞌan sigām magtubuꞌ-manubuꞌ. 32 Jari in kalꞌngnganan itu bay pinatuman ma panohoꞌan ya tapasulat eꞌ si Ester ma pasal Purim ati tasulat isab ma kitab pagsusulatan.