8
Saraꞌ Panohoꞌan Sultan Panabang ma saga Yahudi
1 Ma llaw heꞌ-i du, bay pamuwan eꞌ sultan Serses ma dayang-dayang Ester kamemon pangaltaꞌ bay sukuꞌ si Haman ya banta bangsa Yahudi. Si Murdikay isab bay binuwanan kapatut pahadil ni sultan, sabab kahakaꞌan eꞌ dayang-dayang Ester in iya maka si Murdikay maglahasiyaꞌ. 2 Nihurusan eꞌ sultan singsingna ati sōnganna ni si Murdikay. Ya na singsing taga-gindan bay ma si Haman tagnaꞌ, sagōꞌ tabawiꞌ na eꞌ sultan. Pinatꞌnnaꞌ isab si Murdikay eꞌ si Ester magatas-pikil ma bay pangaltaꞌ si Haman.
3 Pagubus, pabalik si Ester anganjunjung ma sultan, maka heꞌna pasujud maka anangis ma tapeꞌna. Ya pangamuꞌna bang paꞌin pinahalam kagaraꞌan si Haman bangsa Agag, arak pangamula saga bangsa Yahudi. 4 Pinabantang eꞌ sultan bastunna bulawan tudju ni si Ester ati pabuhat iya boꞌ anꞌngge ma dahuan sultan eꞌ.
5 Ahꞌlling si Ester, yukna, “Tuwan sultan, bang ka bilahi, maka bang ka kaꞌamuhan ma aku, maka bang taluwaꞌ isab ma kira-kirahannu, aniyaꞌ panganjunjungku ma kaꞌa. Tuwan, bang paꞌin ka amasulat panohoꞌan pamahalam saraꞌ bay pinasulat eꞌ si Haman anak si Hammedata, ya bangsa Agag eꞌ. Ya maksud si Haman subay nilaglag kamemon saga bangsa Yahudi ma katilibut pagsultanannu. 6 Buwattitu panganjunjungku sabab mbal kasandalanku bang tumꞌkka kalaꞌatan ni saga pagkahiku bangsa Yahudi. Ya lagiꞌna bang alaglag saga kakampunganku.”
7 Ya sambung sultan Serses ni si Ester maka ni si Murdikay bangsa Yahudi, yukna, “Ma sabab bay pangalaꞌat si Haman ma saga bangsabi angkan bay pamuwanku pangaltaꞌna ma dayang-dayang Ester. Bay iya ginantung isab pinapatay ma panganggantungan. 8 Na, ma buwattinaꞌan anulat ka saddī saraꞌ-panohoꞌan ma deyoꞌan ōnku. Sulatun bang ai kabayaꞌannu pasal saga bangsanu Yahudi. Pagubus, sāpin maka singsingku. Sabab ai-ai tasulat ma deyoꞌan ōnku mbal tapahalam bang bay na kasāpan eꞌ singsingku.”
9 Jari itu, ma katꞌllumbulan, karuwampūꞌ ka tꞌllungꞌllaw ma bulan Siban, pinalinganan saga magsusulat ya sosohoꞌan sultan. Tasulat eꞌ sigām kamemon panohoꞌan si Murdikay ma saga bangsa Yahudi, maka ma saga gubnul katapusan alanga, maka ma saga kagubnulan pasunuꞌ sampay saga aꞌa bangsahan ma saga dahatus maka duwampūꞌ maka pituꞌ paglahat tinagnaꞌan min lahat Indiya sampay ni lahat Eteyopa. Tasulat saga panohoꞌan itu ma bahasa maka sulatan sigām pakaniya-pakaniya maka ma bahasa bangsa Yahudi. 10 Tasulat kamemonna itu eꞌ si Murdikay ma deyoꞌan ōn sultan Serses boꞌ sināpan maka singsingna. Pagubus, pinabowa eꞌna ma saga magbobowa sulat ya pakuraꞌ ma saga kuraꞌ alꞌkkas ya asal sinakapan sultan.
11 Bang ma panohoꞌan sultan itu, in bangsa Yahudi kabuwanan kapatut magdakayuꞌ angatuhan di-sigām. Binuwanan sigām kapatut amonoꞌ maka angalaglag saga sundalu, minsan ai bangsa, minsan maingga lahat, sasuku ya parugpak ma sigām maka anak-hꞌnda sigām. Binuwanan sigām kapatut isab angalangpas pangaltaꞌ saga palbantahan sigām. 12 Jari niꞌiddahan llaw kasangpūꞌ ka tꞌllu ma bulan Adar, ya bulan kasangpūꞌ ka duwa. Ya na llaw kapangahinang saga Yahudi ma panohoꞌan itu mainaꞌan ma kamemon saga paglahat ya sukuꞌ sultan Serses. 13 Jari in saraꞌ-panohoꞌan itu sinōꞌ sinulat pinaheka boꞌ pinatanyag ni kamemon paglahat maka ni kamemon manusiyaꞌ ya magsaddī-saddī bangsa, boꞌ supaya sakap saga bangsa Yahudi amalos ma saga banta sigām bang taꞌabut na llaw bay pangidda heꞌ. 14 Pinaraiꞌ-daiꞌ eꞌ sultan saga aꞌa magbobowa sulat ati pauntas na ma saga kuraꞌ ya asal sinakapan sultan. Pinasaplag isab panohoꞌan itu ma kutaꞌ Susa.
15 Manjari paluwas si Murdikay min matahan sultan maka eꞌna magbinadjuꞌ sꞌmmek bangsahan walnaꞌ bilu maka poteꞌ. Magsinaruk isab iya korona bulawan aheya, magjuba iya kakanaꞌ taluk ahāp hinanganna. Ati aheya paglami-lami ma daꞌira Susa ma waktu inān. 16 Aheya kakōgan maka kalasigan ma saga Yahudi, pinagmahaltabatan isab sigām eꞌ kamemon. 17 Sakali aniyaꞌ aheya toꞌongan kakōgan saga bangsa Yahudi ma kamemon paglahat maka daꞌira ya bay kapasampayan saraꞌ panohoꞌan sultan inān. Magjamu sigām maka maglami-lami. Aheka isab saddī bangsa bay magyahudi-yahudi di-sigām ma sabab kaheya tāw sigām ma bangsa Yahudi.