7
Pinapatay si Haman eꞌ Sultan
1 Manjari, in sultan maka si Haman bay pehēꞌ ni pagjamuhan ya bay pinaniyaꞌ eꞌ dayang-dayang Ester. 2 Ma llaw inān, sabu sigām anginum binu-anggul, atilaw pabalik sultan ni si Ester yukna, “Na, hakaꞌin aku bang ai pangamuꞌnu, boꞌ ka dūlanku. Ai panganjunjungnu? Minsan santongaꞌ pagsultananku pamuwanku du ma kaꞌa.”
3 Ya sambung dayang-dayang Ester, “Bang aku makasulut ma kaꞌa, tuwan sultan, bang ka kaꞌamuhan isab ma pangamuꞌku, pamarūlun ma aku kallumku. Ya panganjunjungku isab ma kaꞌa, bang paꞌin liyusannu saga bangsaku min kamatay. 4 Sabab in aku maka saga bangsaku bay pinabꞌllihan supaya niligis maka nilaglag. Bang hal kami bay pinabꞌllihan binanyagaꞌ, bay na pasagaranku sabab palkalaꞌ buwattitu mbal patut pangalengogan sultan.”
5 Atilaw sultan Serses ma dayang-dayang Ester, yukna, “Sai sa makapikil magkajarihan angahinang laꞌat buwattilu? Waꞌi maingga aꞌa ilu?”
6 Ya sambung si Ester, “Ya banta kami, ya aꞌa abꞌnsihan kami, ya aꞌa jahallis, ya na si Haman!”
Na, magtūy tināw maka amidpid si Haman ma matahan sultan maka dayang-dayang. 7 Manjari, anꞌngge sultan kabowa astolna ati nibbahan eꞌna inumanna boꞌ paluwas ni halaman astanaꞌ. Saliꞌ taꞌndaꞌ-ndaꞌ eꞌ si Haman bang ai hukuman pinatꞌkkahan iya eꞌ sultan ma buwat gantaꞌanna, angkan magpaꞌbba iya mainaꞌan supaya magpatiaseꞌ ma dayang-dayang Ester ma pasal kallumna.
8 Ma pagbalik sultan min halaman ni bay pagjamuhan, taꞌndaꞌ eꞌna si Haman pakꞌppang ma tingkōꞌan ya pasandigan si Ester. Angkan angasla toꞌongan sultan, yukna, “Iya giꞌ itu! Ya makatawakkal angusibaꞌan dayang-dayang maitu giꞌ ma deyomanku?”
Ma halam giꞌ aubus bay hꞌlling sultan, magtūy tinambunan na kōk si Haman eꞌ saga sosohoꞌan sultan. 9 Ahꞌlling dakayuꞌ yunuk tendog sultan ya niōnan si Harbona, yuk-i, “Aniyaꞌ panganggantungan sangpūꞌ maka dda dꞌppa langkawna mainaꞌan ma atag lumaꞌ si Haman. Bay pinahinang eꞌna arak panganggantungan si Murdikay, ya aꞌa bay amaluwas llingna supaya ka nihāp, tuwan sultan!”