6
Kapananglit ma si Murdikay
1 Ma sangom heꞌ mbal makatuli sultan angkan bay sohoꞌna ningāꞌ kitab Pagsusulatan Sultan ya panulatan saga kahālan ma pagsultananna. Sinohoꞌ binassa ma matahanna. 2 Pagbassa itu, taꞌndaꞌ ma deyom kitab in sulat pasal si Murdikay maka kapanumbungna pasal kagaraꞌan si Bigta maka si Teres, duwangan tendog sultan ya magjajaga ma bowaꞌ lawang astanaꞌ. Bay sigām magisun amapatay sultan Serses. 3 Atilaw sultan yukna, “Ai pagmahaltabat maka tungbas bay tataimaꞌ eꞌ si Murdikay ma kahinangan itu?”
Yuk sambung saga sosohoꞌanna, “Halam.”
4 Yuk sultan, “Sai sa ma halaman eꞌ?” Sabu bahaꞌu bay pasōd si Haman ni halaman ya min luwasan astanaꞌ. Angamaksud iya angamuꞌ ni sultan bang paꞌin sohoꞌna ginantung si Murdikay ma panganggantungan ya bay pahinangna.
5 Ya sambung saga sosohoꞌan sultan, “Si Haman koꞌ heꞌ, angalagaran kaꞌa.”
Yuk sultan, “Pasōrun iya piꞌitu.” 6 Pagsōd paꞌin si Haman, tinilaw iya eꞌ sultan, “Ai patut nihinang ma aꞌa bang kabayaꞌan sultan magmahaltabatan iya?”
Manjari amikil-mikilan di-na si Haman yukna, “Sai lagiꞌ bahāꞌ aꞌa pinagmahaltabatan eꞌ sultan saddī min aku?” 7 Angkan ya sambungna ni sultan, “Bang aniyaꞌ aꞌa gantaꞌ pinagmahaltabatan eꞌ sultan, 8 in aꞌa inān subay binowahan badjuꞌ bay pamadjuꞌ sultan, maka kuraꞌ isab bay panguraꞌan sultan, kuraꞌ pinaꞌalti maka porong bulawan. 9 Manjari sohoꞌun pangandol badjuꞌ maka kuraꞌ itu ni dakayuꞌ aꞌanu, ya bangsahan toꞌongan. Jari in aꞌa ya kabayaꞌannu pinagmahaltabatan, subay pinabadjuꞌan sꞌmmek sultan boꞌ pinakuraꞌ. Maka in aꞌa bangsahan inān subay parahū min iya anondaꞌ kuraꞌna ma mata mairan, maka eꞌna amatanyag lling ma kamemon saga aꞌa yukna, ‘Buwattitu ya tahinang ma aꞌa bang kabayaꞌan sultan magmahaltabatan iya!’ ”
10 Yuk panohoꞌan sultan ma si Haman, “Na, pasaꞌut ka angāꞌ badjuꞌ maka kuraꞌ heꞌ boꞌ hinangun kamemon bay pahꞌllingnu ilu ma si Murdikay aꞌa Yahudi ya aningkōꞌ ma lawang kutaꞌ inān. Daꞌa palehom-lehomun ai-ai ya bay pahꞌllingnu.”
11 Manjari, ningāꞌ eꞌ si Haman in badjuꞌ sultan maka kuraꞌna. Pinasulug eꞌna ma si Murdikay, ati tinondaꞌ kuraꞌ ya pakuraꞌanna ma mata mairan. Pinatanyag isab lling itu eꞌ si Haman, yukna, “Buwattitu ya tahinang ma aꞌa bang kabayaꞌan sultan magmahaltabatan iya!”
12 Pagubus paꞌin, pabalik na si Murdikay ni lawang kutaꞌ. Saguwāꞌ si Haman bay magdaiꞌ-daiꞌ amoleꞌ ni lumaꞌna maka eꞌna anurungan kōkna paltandaꞌan karukkaꞌanna maka kaiyaꞌanna. 13 Manjari nihakaꞌan eꞌna hꞌndana si Seresa maka kamemon saga bagayna ma pasal kamemon ya bay patꞌkka ni iya.
Ahꞌlling hꞌndana maka saga aꞌa ya anganggaraꞌ ma iya, yuk-i, “Pagga luggiyaꞌ bangsa Yahudi si Murdikay ya aꞌa amareyoꞌ kaꞌa, tantu ka mbal makaꞌatu ma iya. Gom paꞌin ka magkangīꞌ-ngīꞌ ma sababna!” 14 Sabu sigām masi magsuli-suli, atꞌkka pinaꞌan saga yunuk sultan amasaꞌut si Haman pehēꞌ ni paglami-lamihan ya bay pinaniyaꞌ eꞌ dayang-dayang Ester.